[42] Luke 4

¹O Jisu ni sa tuberi Koya tiko na Yalo Tabu ena Nona lesu mai na Joritani, sa qai tuberi Koya yani na Yalo Tabu vata ga o ya kina vanua liwa,

²E vasagavulu na siga na Nona temaki tiko mai vua na tevoro, ka sega ni bau kania ena veisiga o ya e dua na kakana, ni sa oti vinaka na veisiga oqori, a sa qai viakana.

³Sa tukuna vei Koya na tevoro, "kevaka o iko na luve ni Kalou dina, na vatu oqo mo vakarota mada mei buli madrai."

⁴Ia sa tukuna vua o Jisu, ka vaka, "sa volai, ena sega ni bula na tamana ena madrai duadua ga, ia ena vosa kecega ni Kalou."

⁵Sa qai kauti Koya na tevoro kina dua na ulunivanua cecere, ena loma ga ni dua na gauna lekaleka e vakaraitaka taucoko kina vei Koya, na vei matanitu kecega e vuravura.

⁶Sa tukuna vei Koya na tevoro, o iko ga au na solia vei iko na kena lewa kei na kedra i ukuuku talei, ni'u sa lewa tu, ka'u na solia vei koya sa lomaqu kina.

⁷"O koya oqo, kevaka walega mo cuva e mataqu na veika taucoko oqori au na solia vei iko."

⁸A sa vosa vei koya o Jisu ka vaka, "Mo lako tani ki dakuqu, Setani! Ni sa volai, mo cuva ga vei Jiova na nomu Kalou, ka mo qaravi koya duadua ga."

⁹A sa kauti Koya ki Jerusalemi ka vakatikora ena dela ni vale ni soro ecake, sa qai tukuna vua, kevaka o iko na luve ni Kalou dina mo rika sobu mai keri ki ke.

¹⁰"Ni sa volai: 'Ni na vakaroti ira na Nona agilosi o Koya ena vukumu, me ra taqomaki iko;

¹¹kei 'na ligadra me ra na keveti iko cake, de o qai taulaka na yavamu ena vatu.'"

¹²Sa tukuna vua o Jisu, ka vaka, sa tukuni talega, mo kakua ni o via temaki Jiova na nomu Kalou ena veika vakalialia.'"

¹³Ni sa vakaotia kece na tevoro nona veitemaki tiko, a sa lako tani mai vua ka la'ki vakavakarautaki koya mai, me na dua tale na kena gauna.

¹⁴A sa lesu tale ki Kaleli o Jisu ena kaukauwa ni Yalo Tabu, ka sa kuruseta taucoko na vanua vakavolivolita na kena i tukutuku.

¹⁵Sa dua na ka na nodra vakacaucautaki Koya o ira kecega, ena nona vakatavuvuli ena nodra dui veivale ni lotu.

¹⁶Ena Nona a lako ki Nasareci, na koro a susugi cake mai kina, me vaka ga na Nona i valavala ena siga ni vakacecegu me dau lako kina vale ni lotu, a sa tucake me wilika nai Vola Tabu.

¹⁷Sa soli vua nai vola i Aisea na parofita. Ni sa cereka nai vola, sa raica na tikina sa volai tu kina, ka vaka:

¹⁸"sa tu vei Au na Yalo i Jiova, ni sa lumuti Au o Koya me'u vunautaka nai tukutuku vinaka vei ira na dravudravua; a sa talai Au mai o Koya me'u tavoya na wai ni mata vei ira era sa rarawa, me'u vunautaka na veisereki vei ira na bobula kei na rai tale vei ira sa mataboko, me'u vakacegui ira era sa yaluma;

¹⁹me'u vunautaka ni sai koya oqo na yabaki i Jiova."

²⁰Sa viviga tale nai vola, ka solia lesu vei koya na dauveiqaravi sa qai dabe sobu era. Sa coba kece ga vua na matadra taucoko na tiko ena loma ni vale ni lotu oqo.

²¹Sa qai tukuna vei ira o Koya, "E daidai sara ga nai Vola Tabu oqo sa vakataucokotaki kina, me vaka dou sa rogoca ena kena wiliki."

²²A ra sa vakacerecerei Koya taucoko ka qoroqoro ena vuku ni vosa e rogorogo matau sa lako mai na gusuna. A ra sa tukuna, "sa sega li ni o Koya ga oqo na luvei Joseva?"

²³Sa tukuna vei ira o Koya, "E dina ni dou na tukuna na vosa vakaibalebale oqo me baleti Au, "Vuniwai, mo vakabulai iko mada! Na ka kece keimami rogoca ni o cakava mai Kapenaumi, mo cakava talega eke e Nomu vanua.

²⁴A sa tukuna o Koya, Au tukuna vakaidina vei kemudou, e sega ni dua na parofita me ciqomi ena nona vanua dina.

²⁵Ia na ka dina, Au tukuna oqo vei kemudou, e levu na yada era tiko e Isireli ena gauna i Ilaijia, ena gauna ea tasogo kina o lomalagi me tolu na yabaki ka vula ono, e dua na dausiga levu e a tara na vanua taucoko;

²⁶"Ia e sega ni dua vei ira me talai kina o Ilaijia, ki Sarifaci ga ena yasayasa vaka Saitoni, kivua e dua na yalewa yada.

²⁷"E lewe levu na vukavuka e Isireli ena gauna i Ilaisa na parofita, ka sega ni bau dua vei ira me vakasavasavataki, e dua ga na kai Siria o Nemani a qai vakasavasavataki."

²⁸E ra sa cudru o ira na tiko ena loma ni vale ni lotu, ni ra sa rogoca na veika oqo,

²⁹A ra sa tucake mai ka cicivaki Koya ki nai bili; ka ra tuiraka kina bati ni ulunivanua e dabe tiko kina na nodra koro, me ra comolaki Koya sobu mai na bari ni vatu.

³⁰A sa lako curuma na kedra maliwa o Koya, ka lako tani yani.

³¹A sa lako sobu sara ki Kapenaumi e dua na koro ena vanua o Kaleli, ka vakatavuvuli vei ira ena siga ni vakacecegu.

³²Era sa qoroqoro ena vuku ni Nona veivakavulici, ni tukuna na ka era sega tu ni bau kila.

³³E a tiko ena loma ni vale ni lotu e dua na tamata ka curumi koya tu e dua na yalo ni tevoro velavela. A sa qoqolou i cake,

³⁴ka vaka, "laivi keimami mada ga! E dua beka na ka keimami a cakava vei iko, i Jisu na kai Nasareci? O sa lako beka mai mo mai vakarusai keimami? Au kilai iko vinaka tiko “ na Nona le dua yalosavasava na Kalou!"

³⁵Ia sa vunauci koya o Jisu, ka vaka, "Mo tiko lo, ka lako tani mai vua!" A sa taubitalaki koya sobu na tevoro e matadra, sega tale ni dua na ka me cakava na tevoro me mavoa kina o koya sa curumi, a sa lako tani ga yani.

³⁶Era sa qoroqoro kecega ka veitukunayaka, ka vaka, "kemudou sa tutu na vosa sa qai dua qo! Na lewa kei na kaukauwa ni Nona vosa e vakarota o Koya na yalo velavela, a ra sa lako tani kece mai vua."

³⁷A sa kuruseta na vanua vakavolivolita taucoko na kenai tukutuku.

³⁸Sa tucake o Koya ka lako tani mai vale ni lotu, ka la'ki curu sara ena vale i Pita. Ia sa tauvi mate na tinai wati Pita ka tubu cake tiko na katakata ni yagona, e ratou sa mani kerei Koya kina me baleti koya sa tauvimate.

³⁹A sa tu e yasana o Koya ka vunauca na katakata ni yagona, a sa takali tani mai vua. Sa tucake mai vakasauri o koya ka vakarautaka na kedratou.

⁴⁰Ni sa la'ki dromu tiko na siga, vei ira na tauvi ira tu na veimate dauveitauvi eso era sa kau mai vua; a sa tabaki ira yadua ena ligana ka vakabulai ira.

⁴¹A sa cemuri talega na tevoro vei ira sa curumi tevoro, ka ra sa qoqolou i cake, ka vaka, "O iko na Karisito, na luve ni Kalou!" Sa vunauci ira o Koya me ra kakua ni cavuta e dua na vosa, ni ra sa kila ni sai Koya na Karisito.

⁴²Ni sa mataka mai, sa lako tani yani o Koya kina dua na vanua vakanomodi. A ra sa vakasaqarai Koya na lewe vuqa, ni ra sa kunea era sa kerei Koya me se tei kua mada ni biuti ira;

⁴³ia sa tukuna vei ira o Koya, o Au me'u na la'ki vunautaka talega na matanitu ni Kalou kina veikorokoro tale eso, ni oqo sara ga na vuni noqu talai mai."

⁴⁴A sa vunau o Koya ena veivale ni lotu mai Kaleli.