[42] Luke 3

¹Nai katinikalima ni yabaki ni nona veiliutaki o Tibariu Sisa, ka sa kovana mai Jutia o Ponitio Pailato, o Eroti e veiliutaki ena vanua va Kaleli, kei Vilive na tacina e veiliutaki tiko ena vanua vaka Uturia kei na vanua vaka Drekeneti, o Laisenia e veiliutaki tiko ena vanua vaka Abulini,

²E rau a bête levu tiko o Anasa kei Kaiava, a sa yaco yani vei Joni na luvei Sakaraia na vosa ni Kalou ena loma ni vanua liwa.

³A sa lako o koya kina vanua volivolita na Joritani, ka vunautaka kina na papitaiso ni veivutuni me bokoci kina nai valavala ca,

⁴Me vaka sa volai ena i vola nei Aisea na parofita, ka vaka: 'A domo ni dua sa kacikaci ena loma ni vanua liwa: me caramaki na sala i Jiova; Ka cakava me dodonu na Nona gaunisala.

⁵Ena vakatawani taucoko na veibuca ka talaraki sobu na veiulunivanua kei na veidelana; ena vakadodonutaki na veigaunisala veiveveyaki ka vakatautauvatataki vinaka na veisala sukusukura;

⁶Era sa na qai raica nai vakabula mai vua na Kalou o ira na tamata kecega."

⁷Sa qai tukuna o koya vei ira na lewe vuqa era lako mai vua mera papitaisotaki, "dou luve ni gata! O cei beka sa vakasalataki kemudou mo dou sa drovaka na cudru se bera tiko mai?

⁸O koya oqo mo dou vuataka na vua sa kilikili ni dou sa veivutuni, dou kakua ni tukuna tale tiko vei kemudou, o Eparaama ga na tamai keimami. Ni'u sa tukuna vei kemudou na Kalou e rawa ni vakatubura na veivatu sa tu oqo mera luvei Eparaama.

⁹"Ni gauna sara ga oqo na matau sa toka rawa mai ena waka ni vunikau. O koya oqo na veivuni kau kece era sega ni vuataka na vuana, era na viritaki kece kina bukawaqa."

¹⁰Era sa tarogi koya na lewevuqa, ka vaka, "a cava me keimami na cakava?"

¹¹A sa tukuna o koya vei ira, "ke dua e rua na nona kote, me solia vei koya e sega na nona; ke dua e tiko vua na kakana, me cakava vaka kina vei koya e sega na kena."

¹²Era sa lako talega mai vua o ira na daukumuni vakacavacava, ka ra sa tarogi koya, "Qasenivuli a cava me keimami na cakava?"

¹³A sa tukuna vei ira o koya, "dou kakua ni taura tiko na ka a sega ni lavaka mai."

¹⁴Vakatalega kina o ira na sotia ena nodra mai tarogi koya, ka vaka, "a cava me keimami na cakava?" A sa tukuna vei ira o koya, "dou kakua ni vakasaurarataka e dua mo dou beitaka ni o koya dina e cakava, ka dou lomavinaka ena i sau dou saumi tiko kina."

¹⁵Ena nodra vakanuinuitaka tiko na tamata ni na dua ena lako mai, era sa vakasamataka kina ena nodra vakanananu sai Joni dina beka na Karisito se sega.

¹⁶A sa tukuna vei ira kecega o Joni, ka vaka, oi Au ka'u na papitaisotaki kemudou ena wai; ia e dua sa cecere cake vei Au sa lako tiko mai oqo, na wa mada ga ni nonai vava Au sa sega ni yacova na kenai vakatagedegede me'u sereka. O koya ena qai mai papitaisotaki kemudou ena Yalo Tabu kei na bukawaqa.

¹⁷Sa tiko mai ligana nai sivi ni veivakasavasavataki, ena mai vakasavasavataka na vanua ni samu sila, ka kumuna vata na witi sa rawa, ka vakama laivi na benu kece ni sila ena bukawaqa sega ni boko rawa.

¹⁸E vuqa na veivosa ni veivakasalataki vaka o ya, e wasea kina nai tukutuku Vinaka vei ira na tamata.

¹⁹Ia o Eroti nai liuliu ni vanua va Kaleli a sa vosataka e matana levu o Joni, ena vuku I Erotiasa na wati Vilive na tacina kei na nona vosataki koya me baleta na veika vakasisila sa cakava,

²⁰Na ka levu sa qai cakava o koya ni la'ki sogoti Joni ena loma ni vale ni veivesu.

²¹Ni ra sa papitaisotaki oti na tamata kece, sa qai yaco mai na gauna me papitaisotaki talega kina o Jisu; ni sa masu tiko a sa tadola o lomalagi.

²²A sa rairai sobu mai vua na Yalo Tabu me vaka na ruve, ka dua na domo sa rogo mai lomalagi ka vaka, "O iko na Luvequ ka'u sa daulomana; Au dau marau ena Vukumu."

²³E rauta tiko ni yabaki tolusagavulu o Jisu sa tekivu kina na nona cakacaka, (a sa kilai tu) ni luvei Joseva, sa tubu mai vei Ili,

²⁴Sa tubu mai vei Macata, sa tubu mai vei Livai sa tubu mai vei Meliki, sa tubu mai vei Janai, sa tubu mai vei Joseva,

²⁵Sa tubu mai vei Mataia, sa tubu mai vei Emosi, sa tubu mai vei Neumi, sa tubu mai vei Esili, sa tubu mai vei Naqai,

²⁶Sa tubu mai vei Macu, sa tubu mai vei Mataia, sa tubu mai vei Semei, sa tubu mai vei Joseva, sa tubu mai vei Juta,

²⁷Sa tubu mai vei Jonasa, sa tubu mai vei Risa, sa tubu mai vei Serupepeli, sa tubu mai vei Salacieli, sa tubu mai vei Nere,

²⁸Sa tubu mai vei Meliki, sa tubu mai vei Kadi, sa tubu mai vei Kosami, sa tubu mai vei Ilimotama, sa tubu mai vei ira,

²⁹Sa tubu mai vei Josa, sa tubu mai vei Iliesa, sa tubu mai vei Lorima, sa tubu mai vei Macata, sa tubu mai vei Livai,

³⁰Sa tubu mai vei Simione,sa tubu mai vei Juta, sa tubu mai vei Joseva, sa tubu mai vei Jonina, sa tubu mai vei Ilikimi,

³¹Sa tubu mai vei Malea, sa tubu mai vei Menani, sa tubu mai vei Mataia, sa tubu mai vei Necani, sa tubu mai vei Tevita,

³²Sa tubu mai vei Jese, sa tubu mai vei Opeti, sa tubu mai vei Poasa, sa tubu mai vei Salimoni, sa tubu mai vei Nasoni,

³³Sa tubu mai vei Amenatave, sa tubu mai vei Romu, sa tubu mai vei Eseroma, sa tubu mai vei Veresi, sa tubu mai vei Juta,

³⁴sa tubu mai vei Jekope, sa tubu mai vei Aisake, sa tubu mai vei Eparaama, sa tubu mai vei Tera, sa tubu mai vei Neori,

³⁵Sa tubu mai vei Seruka, sa tubu mai vei Raio, sa tubu mai vei Veleki, sa tubu mai vei Raiberi, sa tubu mai vei Sela,

³⁶Sa tubu mai vei Kenana, sa tubu mai vei Alikisi, sa tubu mai vei Semi, sa tubu mai vei Noa, sa tubu mai vei Lemeki,

³⁷Sa tubu mai vei Mecusela, sa tubu mai vei Inoke, sa tubu mai vei Jareti, sa tubu mai vei Maleli, sa tubu mai vei Kenana,

³⁸Sa tubu mai vei Inosi, sa tubu mai vei Seci, sa tubu mai vei Atama, sa tubu mai vua na Kalou.