[42] Luke 2

¹Ena gauna o ya sa vakatauca mai kina o Sisa Akosito na nona lawa, o ya mera vakaleweni taucoko na tamata e vuravura.

²Nai matai ni wili lewe ni vanua oqo e yaco tiko ena gauna a kovana tiko kina mai Siria Oqoriniasi.

³A ra sa dui lako na tamata mera la'ki vakaleweni kina nodra veikoro dina.

⁴A sa lako cake talega o Joseva mai na vanua o Kaleli ena koro o Nasareci, me lako ki Jutia kina koroi Tevita ka yacana o Peciliema, baleta o koya e kawa ka vu mai vei Tevita.

⁵Me vakaleweni na yacadrau kei Meri, ni sa musu oti tu vua me watina, a sa bukete tiko o koya.

⁶Ni rau se tikoga mai kea sa donumaka talega na siga me vakasucu kina.

⁷A sa vakasucuma na nona ulumatua sa tagane ka viviraka vua e dua nai oro balavu, ka vakadavori Koya ena dua na vale ka vakarautaki mera dau kana kina na manumanu, baleta ni ra sa oso taucoko na bure ni vulagi.

⁸Ena vanua o ya era tiko kina eso na i vakatawa ni sipi,ka ra a vakatawana tiko na qele ni sipi ena bogi mai na loma ni bai.

⁹Ka raica, e dua na agilosi ni Turaga sa rairai vei ira, kei na i serau ni Turaga sa serauni wavolivoliti ira tu, a ra sa rere vakalevu kina.

¹⁰Sa qai tukuna vei ira na agilosi, dou kakua ni rere, dou raica, e dua nai tukutuku marautaki au kauta mai oqo vei kemudou era na reki kina na tamata kecega.

¹¹"Ni sa sucu vei kemudou ena siga e daidai ena koroi Tevita nai vakabula, oqo sara ga na Karisito na Turaga.

¹²"Na kena i vakatakilakila vei kemudou oqo: dou na raica na gonelailai ni viviraki tiko vua e dua nai oro balavu, ka davo tiko ena dua na vale ka ra dau kana kina na manumanu."

¹³Ka vakasauri ni ra sa tu ena yasa ni agilosi, na lewe i lomalagi ena domo ni nodra vakavinavinaka, ka vaka

¹⁴"Sa Nona na Kalou na vakarokoroko ena veiyasana e cake sara, me veivinakati o vuravura vei ira sa lomana o koya!"

¹⁵Ni ra sa lako tani mai vei ira na agilosi mera sa lesu tale ki lomalagi, era sa veivosatakitaka nai vakatawa, ka vaka, "meda tou sa lako sara ga oqo ki Peceliema me datou la'ki raica na veika sa yaco, me vaka sa mai vakaraitaka vei kedatou na Turaga."

¹⁶E ratou sa lako vakatotolo yani ka kunei Meri kei Joseva kei na gone lailai, ni davo tiko ena vale vakarautaki me ra dau kana kina na manumanu.

¹⁷Ni ratou sa raici Koya, e ratou sa talaucaka kece yani na vosa sa tukuni mai vei iratou me baleta na gone lailai oqo.

¹⁸O ira sa rogoca era sa qoroqoro ena vosa e ratou cavuta nai vakatawa ni sipi.

¹⁹Ia na vosa kece sa cavuti oqo, sa tugana kece o Meri ki vuni yalona.

²⁰Era sa qai lesu tale nai vakatawa ni sipi ena nodra vakalagilagia kei na vakavinavinakataka na Kalou, ena vuku ni veika era sa rogoca ka mai raica sara, me vaka a sa tukuni oti mai vei ira.

²¹Ni oti e walu na siga a sa cilivi na gone lailai, sa yacana o Jisu, na yaca sa mai vakatoka oti na agilosi ni se bera ni qai kunekunetaki.

²²Me vaka na lawa i Mosese ni sa oti na siga ni nona vakasavasavataki koya o tinani gone, e rau sa qai kauti Koya mai ki Jerusalemi me cabori vua na Turaga.

²³(Me vaka sa volai ena lawa i Jiova, "na vei ulumatua tagane kece e sucu me vakatokai ni ka tabu vei Jiova"),

²⁴Nai soro me cabori me vaka na lawa i Jiova, "me rua na ruve se me rua na luve ni soqe."

²⁵Ka raica, e tiko mai Jerusalemi e dua na tamata na yacana o Simione, sa tamata yalododonu ka lotu dina, a sa waraka tiko mai na nodra vakacegui na Isireli, sa sobuti Koya tu na Yalo Tabu.

²⁶A sa vakatakila oti tiko vua na Yalo Tabu ni se bera ni mate ena raici Karisito na Turaga.

²⁷Ena siga o ya sa uqeti koya na Yalo Tabu me lako kina vale ni soro, nirau na kauti Jisu mai na Nona i tubutubu, me mai vakayacori vua me vaka nai valavala ni nodra lawa.

²⁸A sa tauri koya cake mai ka keveta e ligana, ka vosa vinakataka na Kalou, ka vaka:

²⁹"Turaga, oqo sara ga sa rawa mo ni kauta tani na nona bula na nomuni tamata, me lako yani ena vakacegu, me vaka ga na Nomuni vosa;

³⁰Ni sa qai raica na mataqu nai vakabula mai vei kemuni.

³¹O koya o ni a vakarautaka me baleta na tamata kecega,

³²Na rarama me cilavi ira na veimatanitu tani, ka nodra lagilagi o ira na Nomuni tamata na Isireli.

³³E rau sa qoroqoro ga o Joseva kei Meri ena veivosa sa cavuti vua na gone.

³⁴A sa vosavakalouvinakataki rau o Simione, sa qai tukuna vei Meri na tinani gone, ka raica, na gone qo ena vakatau vua na nodra bale sobu kei na nodra lamata cake na Isireli, na kena i vakatakilakila ni ra na cati Koya.

³⁵"Io, o iko talega ena tara na utomu nai seleiwau ni o lausua kina, me vakavotui kina na vakanananu ni lomadra."

³⁶O koya oqo e duatani, o Ana, na parofita yalewa, na luvei Manueli, ena mataqali i Aseri. A sa qase sara o koya, se vakawati sara ni se goneyalewa ka yabaki viti na nona bula vakawati;

³⁷Sa qai mai yada yani me walusagavulu ka va na yabaki, a sa sega ni bau biuta vakadua na vale ni soro, ia sa qarava tikoga na Kalou ena nona daumasu ka lolo siga kei na bogi.

³⁸A sa lako talega mai o koya ena gauna vata o ya ka vakavinavinakataka na Turaga, ka tusanaka yani vei ira e Jerusalemi, o ira na waraka tiko na veivakabulai ni o koya sa tu oqo.

³⁹Ni rau sa vakayacora oti na cakacaka kece me vaka na lawa i Jiova, e ratou sa lesu tale yani ki Kaleli, kina nodratou koro dina o Nasareci.

⁴⁰A sa tubu cake na gone me tagane mai, a sa duatani ena yalomatua; ka sa vuabale ena loloma vaKalou. E Vakurabuitaki Ira Na Dau Ni Vola Tabu O Jisu

⁴¹Ena vei yabaki e rau dau lako ki Jerusalemi na Nona i tubutubu, me baleta na kana vata ni lako sivia.

⁴²Ni sa yabaki tinikarua o koya e ratou sa qai lako vata ki Jerusalemi, me vaka nai valavala ni kana vata ni lako sivia.

⁴³Ni sa oti na kena cakacaka, me ratou sa lesu mai, na cauravou lailai o Jisu e a lokuyara ka tiko voli ga mai Jerusalemi. E rau sega ni kila o Joseva kei na tinana na lokuyara qo;

⁴⁴Ia e rau sa nanuma ni sa liu mai o koya vata kei ira nai lawalawa era sa liu oti mai, e dua na siga na taubale, ni sega kina o koya e rau sa vakasaqarai Koya yani, vei ira na wekadrau kei ira na nodrau i tokani.

⁴⁵Ni rau sa sega ni kunei Koya, e rau sa lesu tale ki Jerusalemi, merau la'ki vakasaqarai Koya kina.

⁴⁶Ni oti vinaka e tolu na siga e rau sa qai kunei Koya ena loma ni vale ni soro, ni a dabe tiko ena kedra maliwa na qasenivuli, ka vakarorogo tiko ka taroga talega eso na taro.

⁴⁷O ira na rogoci Koya era sa qoroya na vuku e tu vua kei na taro e sauma tiko.

⁴⁸Ni rau sa raici Koya, e rau sa kurabui; sa tukuna vua o tinana, "luvequ, na cava mo cakava kina vaka oqo vei keirau? Raica mada, o au kei tamamu keirau sa oca na vakasaqarai iko."

⁴⁹A sa tukuna vei rau o koya, "a cava li mo drau vakasaqarai Au kina? E sega beka ni drau kila ni dodonu me'u kauwai tiko ena veika me baleta na cakacaka nei Tamaqu?"

⁵⁰Ia e rau sega ni taura rawa nai balebale ni Nona vosa vei rau.

⁵¹A sa lako sobu vata kei rau ki Nasareci, sa dau talairawarawa tiko vei rau, ia o tinana sa tugana kece ki yalona na veika kece oqo.

⁵²A sa tubu cake o Jisu ena yalomatua kei na totoka ni yagona, a sa vinakati Koya vakalevu tikoga na Kalou kei ira na tamata.