[42] Luke 8

¹Ni sa oti oqori sa qai lako yani o koya kina veikoro lelevu kei na veikoro lailai kecega, sa vunau kina ka wasea talega nai tukutuku vinaka me baleta na matanitu ni Kalou. A ratou sa veitomani vata kei Koya na lewe tinikarua,

²ka so vei ira na yalewa ka vakabulai mai na daucurumi tevoro kei na veimate ca eso “ me vakataki Meri Makitalena, ka cemuri tani mai vua e vitu na tevoro,

³kei Joana na wati Kusa, na matanivanua i Eroti, kei Susana, kei na vuqa tale na yalewa ka ra tokoni Jisu tu ena veika era rawata. Vosa Vakatautauvata Ni Dau Kakaburaki

⁴Ka lewe vuqa sara na tamata mai na veikorokoro era sa soqoni vata mai Vua, a sa tukuna o koya e dua na vosavakatautauvata:

⁵"E dua na daukakaburaki sa lako me kaburaka na nona i tei. Ni sa kaburaka tiko sa lutu eso ena yasa ni sala; ka sa laubutu sobu, era sa vuka mai na manumanu vuka ka mai tokilaka.

⁶"E so sa lutu kina vatu; ni sa tubu mai sa qai raqosa tale ka ni sega na kena qele me vakasuasuataka.

⁷"Ka so sa lutu kina loma ni veiwavakavotona, sa tubu na veiwavakavotona ka salava ka vakamatea.

⁸"Ia eso sa lutu kina qele vinaka, ni sa tubu cake sa vuataka na vua e yadrau." Ni sa tinia na Nona vosa sa qai tabalaka i cake na domona, o koya sa tiko na daligana me rogoca, ka me rogoca sara?"

⁹A ratou sa tarogi Koya na Nona tisaipeli, ka vaka, "A cava mada nai balebale ni vosa vakatautauvata?"

¹⁰A sa tukuna o koya, sa soli ga vei kemudou mo dou kila na veika vuni ni matanitu ni Kalou, ia o ira na kena vo ena tukuni tikoga vei ira ena vosa vakatautauvata, ni ra raica tiko era sega ga ni raica rawa, era sa rogoca ka ra sega ga ni kila ka rawa.

¹¹"Oqo nai balebale ni vosa vakatautauvata: na i tei sai koya na vosa ni Kalou.

¹²Nai tei e lutu ena yasa ni sala oqori o ira sa rogoca; sa qai lako mai na tevoro ka kauta tani mai na vosa ni Kalou e yalodra, de ra qai vakabauta ka vakabulai kina.

¹³"Ia vei ira Na lutu ena vatu o ira sa rogoca na vosa sa dua na ka na nodra tavarekireki; e sega sara tuga na wakadra, e vakalalai walega na nodra dei tiko ni ra sa temaki ga era sa bale tale.

¹⁴O ira na lutu ena loma ni veiwavakavotona sai ira era sa rogoca, ni ra sa lako yani sa salavi ira mai na ogaoga vakavuravura, na i yau, na veilasa ni bula vakayago, ka sega ni dua na vua ni matua ni bula me laurai mai.

¹⁵"Ia o ira na lutu kina qele vinaka, sa i ira era rogoca na vosa ka tugana sara ena yalo e malumu ka lokumi, ka ra sa kukuva matua sara, ka sa sega kina ni cegu na nodra sa vuavuai tikoga. Na Vosa Vakatautauvata Ni Rarama

¹⁶"Sa sega ni dua, ni sa vakawaqaca na cina dabe me qai ubia tale, se me la'ki biuta tiko ena ruku ni loga, ia na kena i tutu i loma ni vale me biuta kina, mera raica na kena rarama o ira na curu yani i loma.

¹⁷"Ni sa sega ni rawa me dua na ka e vunitaki me sega ni na vakaraitaki, se dua na ka e tabonaki me na sega ni kilai ena kilai ga mai.

¹⁸"O koya oqo mo dou qarauna vinaka na ka dou rogoca. Vei koya sa tu vua e dua na ka ena soli vakalevu vua; vei koya e sega ni tu vua ena kautani mai vua na ka sa bau toka rawa vua." Ratou Lako Mai Vei Jisu Na Tinana Kei Na Tacina

¹⁹O iratou na tuakana kei tinana e ratou sa qai lako mai vua, ka sa sega ni rawa me ratou toro volekati Koya ena vuku ni lewe levu ni tamata.

²⁰A ra sa tukuna Vua, ka vaka. "O iratou na tuakamu kei tinamu e ratou sa tu etautuba ka ratou via raici Kemuni."

²¹Ia sa tukuna o koya vei ira ka vaka, "O koya na tinaqu kei ira na tuakaqu o koya ga oqo sa rogoca na vosa ni Kalou ka cakava sara." Talairawarawa Vei Jisu Na Cagi Kei Na Biau

²²Sa yaco, ena dua na siga, a sa vodo kina o koya kei iratou na Nona tisaipeli ena dua na waqa. A sa tukuna vei iratou, "Medatou takoso mada ki tai kadua ni drano." A ratou sa qai cavui kelekele yani.

²³Ia ni ratou sa soko tiko sa moce o koya. A sa liwava sobu mai na drano oqo e dua na covulaca kaukauwa, ka sa tekivu me luvu mai na waqa, ka e ratou sa vakila ni sa toro mai o mate.

²⁴A ratou sa lako Vua ka vakayadrati Koya, ka tukuna "Turaga, Turaga, edatou sa mate ni kua!" A sa tucake mai o koya ka vakarota na cagi kei na voravora ni biau. A sa malumu sobu, ka sa maravu tale tu.

²⁵Ia sa tukuna vei iratou, "E vei na nomudou vakabauta?" A ratou sa rere, ka qoroqoro, ka ratou vei tukunitaka, "O cei li oqo? Ni vakarota mada ga na cagi kei na wai, e rau talairawarawa tu vua!" Vakabulai E dua Na Tamata Curumi Tevoro

²⁶A ratou sa qai soko yani kina nodra vanua na kai Katara ka toka veibasai kei Kaleli.

²⁷Ni sa sobu yani o koya ki vanua a rau sa sota kei na dua na tamata mai na koro o ya, ka sa dua na gauna balavu na nodra curumi koya tu na tevoro. A sa sega ni dauvakaisulu se me dau tiko e vale ia e na vei bulubulu ga.

²⁸Ni sa raici Jisu, sa qai tabalaka e dua na vakarekaila levu, ka teki cuva sobu e matana, ka cavuta mai ena domo levu, ka vaka, "A cava o via mai sagai au kina, i Jisu na luve ni Kalou sa cecere sara? Au kerei kemuni moni kakua ni vakararawataki au!"

²⁹Ni sa vakarota oti o koya na yalo velavela ka tu vua na tamata qo me lako tani mai. Ni dau vakatotogani koya vakawasoma, ni a sa dau vesu ena sinucodo kei na waya; edau drutidrutilaka ka qai dau vakauti koya tu na tevoro kina vanua liwa.

³⁰Sa tarogi koya o Jisu, ka vaka, "O cei mada na yacamu?" A sa tukuna o koya, "O vavakoso," baleta sa dua nai wiliwili levu ni tevoro era sa curumi koya tu.

³¹A ra sa vakamasuti Koya me kakua ni vakaroti ira mera lakoi bulu.

³²A sa dua na qele ni vuaka levu era vaka-ni tiko ena ulunivanua. A ra sa mani kerei Koya ke rawa ni vakatara me ra curuma. A sa vakatara vei ira o koya.

³³A ra sa lako tani mai vua na tamata oqo na tevoro ka ra la'ki curuma ira na vuaka, a ra sa ciciva sobu mai na baba oqo ni se tu mai na vutidra, ka ra ciciva taucoko yani na loma ni drano a ra sa luvu kina.

³⁴Ni ra sa raica na veika sa yaco o ira na vakania tiko, a ra sa cici yani kina koro kei na veivanua volekata mera la'ki tukuna kina na ka oqo.

³⁵A ra sa qai lako yani mera la'ki raica na veika sa yaco, ni ra sa yaco vei Jisu, ka ra raica na tamata sa lako tani vua o ira na tevoro ni sa dabe tiko ena yava i Jisu, a sa vakaisulu ka tuvakavinaka tale na nona vakasama. A ra sa rere.

³⁶O ira talega na raica era sa tukuna vei ira na veika e a yaco, ena nona vakabulai o koya ka curumi tevoro.

³⁷O ira kece na lewe ni vanua vakavolivolita na vanua o Katara, sa ra qai tukuna vua me lako tani mai vei ira, ni sa tarai ira e dua na rere levu. A sa vodo lesu tale ki waqa o koya.

³⁸Na tamata ga ka a cemuri tani mai vua o ira na tevoro, sa qai vakamasuti Koya me lako vata kei Koya. Ia sa vakatalai koya lesu o Jisu, ka tukuna vua,

³⁹"Mo lesu ki nomu vale, ka tukuna kina na veika veivakurabuitaki sa cakava vei iko na Kalou." A sa lako yani ka tukuna wavoki kina koro na veika veivakurabuitaki sa cakava vua o Jisu. Rau Sa Vakabulai Na Goneyalewa Lailai Kei Na Marama

⁴⁰Ni sa lesu tale yani o Jisu, era sa kidavaki Koya mai na lewe vuqa, ni ra sa waraki Koya taucoko tu.

⁴¹Ka raica, a sa lako mai e dua na tamata na yacana o Jairo, o koya sa lewa na valenilotu. A sa mai tekicuva sobu ena yava i Jisu ka vakamasuti Koya me lako ki na nona vale,

⁴²Ni luvena e dua ga e yalewa ka sa yabaki tinikarua, a sa voleka ni mate. Ia ni sa lako yani o koya era sa veidrigidrigi mai vua na lewe vuqa.

⁴³A sa dua na yalewa sa tinikarua na yabaki ka sa sega ni cegu rawa na drodro tani ni dra mai vua, a sa vakayagataka kece na nona i yau vei ira na vuniwai ka sa sega ga ni vakabulai rawa,

⁴⁴a sa lako mai ki dakuna ka tara na bele ni Nona i sulu. Ka vakasauri sa cegu na drodro ni dra.

⁴⁵Sa tukuna o Jisu, "O cei sa tarai Au?" Era tukuna kece ni sega, a sa tukuna o Pita kei iratou na tiko kei Koya, "Turaga o ira na lewe vuqa oqo era sa veidrigidrigiti mai vei kemuni, mo ni qai tukuna, o cei sa tarai Au?"

⁴⁶Ia sa tukuna o Jisu, "E dua sa tarai Au, Ni'u sa kila ni sa lako tani mai vei Au na kaukauwa.

⁴⁷Sa kila na yalewa ni sa kilai o koya, a sa lako mai Vua ena sautanini; ka tekicuva sobu e matana, ka tukuna Vua ni ra vakarorogo tu na tamata kecega, nai naki ni nona tarai koya kei na kena yaco vakasauri vua na veivakabulai.

⁴⁸A sa tukuna vua o koya, "Luvequ yalewa, mo qaqa tiko; sa vakabulai iko na nomu vakabauta. Mo lako ena vakacegu."

⁴⁹Ni se vosa tikoga o koya sa lako mai e dua na tamata mai na vale nei koya ka lewa na vale ni lotu, ka tukuna vua, "Na luvemu yalewa sa mate. Kakua ni o vakaoca na qasenivuli."

⁵⁰Ia ni sa rogoca o Jisu, sa tukuna vua, ka vaka, kakua ni o leqa; mo vakabauta ga, ena vakabulai kina o koya."

⁵¹Ni sa yaco yani i vale o ya o Jisu, sa sega ni qai vinakata o koya me dua tale me curu i loma ni vale, ka vaka vo ga o Pita, Jemesa kei Joni kei rau nai tubutubu ni goneyalewa.

⁵²A ra sa tagi ka osivaka kecega na goneyalewa qo; ia sa tukuna o koya, "Ni kakua ni tagi; o koya e sega ni mate, ia sa moce ga."

⁵³A ra sa vakadredrevaki Koya, ni ra sa kila kece tu ni sa mate o koya.

⁵⁴Ia a sa vakatalai ira kece i tuba ka taura na liga i goneyalewa, ka tukuna, "Goneyalewa lailai, mo tucake mai."

⁵⁵A sa suka lesu tale mai na yalona, ka vakasauri sa tucake mai. Sa tukuna me soli mada vua eso na kakana me kania.

⁵⁶E rau sa qoroqoro ga na nona i tubutubu, ia sa vakarota vei rau me rau kakua ni tukuna vua e dua na veika e yaco.