[42] Luke 9

¹A sa kacivi ira vata mai na Nona tisaipeli lewe tinikarua ka solia vei ira na kaukauwa kei na lewa vei ira kecega na tevoro, ka mera vakabula talega na veimate eso.

²Sa vakatalai ira mera vunautaka na matanitu ni Kalou kei na nodra vakabulai o ira sa tauvimate.

³A sa tukuna vei ira o koya, ena nomudou i lakolako oqo dou kakua ni kauta e dua na ka, me kakua na i titoko, se taga ni vaqa, se madrai se nai lavo; me kakua ni kau tiko e rua nomudou i sulu.

⁴"Ni dua na vale dou sa curu kina, dou tiko e keri, me yacova ni dou sa biubiu.

⁵"Vei koya e sega ni na via ciqomi kemudou, ni dou sa biuta mai na koro oqori, dou taviraka tani na kuvu ni qele mai na yavamudou me vakaraitaki kina vei ira na nodra besetaka.

⁶A ra sa qai lako yani kina veikorokoro ka vunautaka nai tukutuku vinaka, kei na veivakabulai ena veivanua kecega.

⁷Na veika kece e a vakayacora tiko o koya sa la'ki rogoca o Eroti na kovana; ka lomatarotaro vaka levu, baleta ni so na tamata era sa tukuna ni sa tucake tale mai na mate o Joni,

⁸Ka so sa tukuna ni o Ilaijia sa rairai tale mai, eso tale sa tukuna ni sa tucake mai e dua vei ira na parofita e liu.

⁹Sa tukuna o Eroti, "Au sa musuka oti na ului Joni, ia o cei tale beka oqo sa cakava tiko na veika ka'u sa rogoca?" A sa sasaga kina o koya me raici koya mada.

¹⁰Ni ra sa lesu mai nai apositolo era sa mai tukuna taucoko vua na veika era a cakava. A sa kauti ira lo o koya kina dua na vanua lala ka qele vaka Veciseita.

¹¹Ia ni ra sa kila na lewe vuqa, era sa muri Koya; sa tavaki ira mai o koya, ka tukuna vei ira na veika me baleta na matanitu ni Kalou, kei na Nona vakabulai ira na gadreva.

¹²Ni vakarau me la'ki dromu tiko na siga o ya, e ratou sa lako mai vua na lewetinikarua, ka tukuna vua, "mo vakatalai ira tani na lewe vuqa, me rawa ni ra lako kina veikorokoro kei na veivanua volekata na vanua oqo, mera moce kina ka kana kina; ni sa vanua lala na vanua eda tiko kina oqo."

¹³Ia sa tukuna o koya vei iratou, "Dou solia vei ira eso na ka mera kania." A ratou sa tukuna, "Sa sega ni dua na ka e tu oqo. E lima walega nai buli madrai kei na rua na ika e tu vei keitou. Ka vakavo ga me keitou lako ka volia mai na kakana me baleti ira taucoko oqo.

¹⁴Ni tagane mada ga e rauta tiko ni ra lewe lima na udolu, sa qai tukuna o koya vei iratou na Nona tisaipeli, "Dou vakadaberi ira me lewe limasagavulu dua nai wasewase."

¹⁵A ratou sa cakava vaka kina, ka ra sa dabe taucoko na tamata.

¹⁶A sa taura o koya na lima nai buli madrai kei na rua na ika, ka tacake ki lomalagi ka masulaka, a sa qai dovia ka solia vei iratou na tisaipeli me ratou wasea yani ki vei ira na lewe vuqa.

¹⁷A ra sa kana ka mamau taucoko, e tinikarua na sova e ratou vakatawana mai na vo ni kedra.

¹⁸Ena dua na siga ni a masu taudua tiko o koya sa ratou qai veitomani vua na Nona tisaipeli, sa vosa vei iratou ka vaka, "Era tukuna tiko na tamata se o cei beka o Au?"

¹⁹A ratou sa sauma vua, ka vaka, "O Joni na dauveipapitaiso, ia eso sa tukuna o Ilaijia; ka so tale era sa tukuna, ni sa tucake tale mai e dua vei ira na parofita e liu?"

²⁰Sa tarogi iratou, "Ia o cei dou tukuna ni o Au?" A sa tukuna vua o Pita ka vaka, "Na Karisito ni Kalou."

²¹A sa vakadreti iratou vakabibi ka vakarota me ratou kakua ni tukuna vua e dua na ka oqo.

²²Sa tukuna, "Na luve ni tamata ena lako curuma e vuqa sara na veika rarawa, ena sega ni ciqomi mai vei ira na qase kei ira na bete levu kei ira na daunivolatabu, ena qai vakamatei ka e na tucake tale ena i katolu ni siga."

²³Sa qai tukuna vei iratou taucoko, kevaka e dua sa gadreva me muri Au mai, me kakua ni nanumi koya me colata tikoga e veisiga na nona kauveilatai ka muri Au.

²⁴"Vei koya sa vinakata me maroroya na nona bula, ena vakayalia, ia vei koya e vakayalia na nona bula ena vukuqu ena maroroi.

²⁵"Kevaka sa taukeni vuravura kece e dua na tamata, a cava na kena yaga vua, ni sa ka ni mate ga vei koya se me vakayali koya tani mai kina?

²⁶"O koya e maduataki Au kei na Noqu vosa, ena maduataki koya na luve ni tamata ena Nona na lako mai ena nona i ukuuku lagilagi vata tukuna kei tamana, kei ira vata tukuna talega na agilosi ni Kalou.

²⁷"Ia na ka dina oqo Au tukuna vei kemudou, eso era tucake tu eke e daidai ni se bera ni ra mate era na raica mada na matanitu ni Kalou."

²⁸Ni oti e walu na siga mai na gauna e a vosataka tiko kina na veika oqori, sa qai kauti Pita, Joni kei Jemesa kina ulunivanua me la'ki masu.

²⁹Ni sa masu tiko o koya, sa veisau na kena i rairai kei na Nona i sulu sa tekivu me vulavula ka lumilumisa mai.

³⁰Ka raica, e lewe rua na tamata sa veivosaki vata kei Koya, oi rau oqo o Mosese kei Ilaijia,

³¹Rau sa rairai ena i ukuuku, ka tukuna na Nona mate ka na la'ki vakayacora o Koya ki Jerusalemi.

³²Ia o Pita kei rau na tiko vata tukuna e ratou sa moce lutu; ni ratou sa yadra vinaka mai na moce, e ratou sa raica na nona i serau kei rau vata tukuna na tamata e ratou wavu vata tu.

³³Ena gauna e rau sa tekivu biubiu tale mai vua, a sa tukuna vei Jisu o Pita, ka vaka, "Kemuni saka, e vinaka medatou sa tikoga eke; ka me keitou na cakava e tolu na vale vakacevaceva: e dua me Nomuni, e dua me nei Mosese, kei na dua tale me nei Ilaijia" “ a sa sega ni vakasamataka na ka sa cavuta tiko.

³⁴Ni se vosa tikoga o koya sa lako mai e dua na o ka mai vakarurugi iratou tu; a ratou sa rere vakalevu ni sa solegi iratou na o.

³⁵A sa rogo mai e dua na vosa mai na loma ni o, ka vaka, "Oqo na luvequ lomani, dou rogoci Koya!"

³⁶Ni sa oti na vosa, sa laurai duadua ga o Jisu. Ia e ratou sa galuvaka, ka sega ni tukuna ena gauna o ya na veika e ratou a raica.

³⁷Na ka e a qai yaco ena siga ka tarava, ni ratou sa siro sobu mai ena ulunivanua, a ra sa waraki Koya tu mai na lewe vuqa.

³⁸Ka vakasauri ni sa kaci mai e dua na tamata mai vei ira na lewe vuqa, ka vaka, "Qasenivuli, au sa kerei kemuni vakabibi mo ni mai raica mada na luvequ tagane, ni sa dua bulu ga na luvequ.

³⁹"Ka raica, e dua na yalo e dau curu tiko vua ka vakasauri sa qoqolou; ka moqemoqe ka vuso na gusuna, sa sagasagai dredre me takali tani a sa dau vakamavoataki koya.

⁴⁰"Au a kerei iratou na Nomu tisaipeli me ratou cemuria tani, ia e ratou sa sega ni rawata."

⁴¹A sa tukuna o Jisu, ka vaka, "Ai tabatamata sa sega kina na vakabauta ka dauvakaduiduiileti, sa sega ni rawa me vaka tiko oqo, sa balavu mai na gauna Au tiko kina kei kemudou, ka vosoti kemudou tiko? Mo kauta mai kike na luvemu."

⁴²Ni se lako tikoga mai sa tauri koya na tevoro ka tavulaki koya sobu ka bitabitalaki koya. A sa vakarota o Jisu na yalo ca oqo, ka vakabulai koya na gone, a sa solia lesu tale vei tamana.

⁴³Era sa qoroqoro kecega ena Nona cecere na Kalou. Ia ni ra se qoroya tu ga na veika kece e a cakava o Jisu, sa tukuna o koya vei iratou na Nona tisaipeli,

⁴⁴"Na vosa oqo me curusobu sara ki na daligamudou, ni o koya na luve ni tamata sa voleka mai na gauna me na soli yani kina ki na ligadra na tamata."

⁴⁵Ia era sa sega ni taura rawa na vosa oqo, ni sega ni vakavotui vei ira mera kila, a ra sa sega kina ni siqema rawa; ka era sa rere ni tarogi Koya ena vuku ni vosa oqo.

⁴⁶A sa tubu ena kedratou maliwa e dua na veileti se o cei mada vei iratou e cecere duadua.

⁴⁷Sa kila o Jisu na nanuma ni lomadratou, a sa kauta mai e dua na gone lailai ka mai biuta e matana,

⁴⁸ka tukuna vei iratou, o koya sa ciqoma na gone lailai oqo ena vuku ni yacaqu sa ciqomi Au; o koya e ciqomi Au sa ciqomi koya sa talai Au mai, o koya e cecere duadua vei kemudou o koya e kauti koya sobu me veiciqomi.

⁴⁹Sa qai tukuna o Joni ka vaka, "Kemuni saka Turaga, e dua na tamata keitou raica ni cemuri ira tani tiko na tevoro ena Yacamuni, ka keitou sa tarovi koya baleta ni sega mada ga ni muri kedatou tiko."

⁵⁰Ia sa tukuna vei koya o Jisu, "Dou kakua ni tarovi koya, ni o koya e sega ni kedatou meca, o koya edatou i to vata."

⁵¹Ni sa yaco dina tiko mai na kena gauna me sa na vakarau kau cake yani kina o Koya, a sa vakanamata sara ga na matana me sa butuki Jerusalemi,

⁵²A sa tala eso mera lako e liu Vua. A ra sa lako ka la'ki curuma e dua na koro vaka Samaria, mera la'ki vakavakarautaki Koya rawa mai kina.

⁵³Ia era sa sega ni vinakata mera ciqomi Koya se me vakacegui mada ga kina, baleta ni vakanamata tiko o koya ena nona i lakolako ki Jerusalemi.

⁵⁴Ni rau sa raica na Nona tisaipeli o Jemesa kei Joni na veika oqo, e rau sa tukuna, "Turaga, ni vakatara mada vei keirau, me keirau vakarota na buka waqa me lutu sobu mai lomalagi me vaqeavutaki ira, me vaka sa cakava oilaijia?"

⁵⁵Ia sa vuki o Koya vei rau ka vunauci rau, ka tukuna, oi kemudrau drau sega ni kila nai tovo ni yalo e tiko vei kemudrau.

⁵⁶Ni sa sega ni lako mai na luve ni tamata me vakarusai ira na tamata ia me vakabulai ira. A ratou sa qai lako kina dua tale na koro.

⁵⁷Ni ra sa lako tiko e gaunisala, a sa tukuna vei Koya e dua vei ira, "Turaga, au na muri kemuni ena vanua cava ga o ni na lako kina."

⁵⁸A sa tukuna vua o Jisu, "O ira na fokisi sa tu na nodra qara ka ra vakasova na manumanu vuka, ia na luve ni tamata sa sega ni dua na vanua me bau vakadavora rawa kina na uluna."

⁵⁹Sa tukuna tale o koya vua e dua, "Mo muri au." Ia sa tukuna mai o koya, "Turaga, me'u se tei lako mada me'u la'ki buluti tamaqu."

⁶⁰A sa tukuna vei koya o Jisu, "Laivi ira sa mate mera buluta ga na nodra mate, ia mo lako yani o iko ka vunautaka na matanitu ni Kalou."

⁶¹Sa tukuna tale mai e dua, "Turaga, oi au e dua ka'u na muri kemuni, ia me'u lako mada e liu i neitou vale, me'u la'ki tatau vinaka mai kina."

⁶²Ia sa tukuna vei koya o Jisu, "Sa sega ni dua

⁶³me sa taura e ligana nai siviyara, me qai rai tale tikoi muri, ni sa sega ni vakarautaki kina me ganiti koya na matanitu ni Kalou."