[41] Marika 16

¹Ni sa oti yani na siga ni vakacecegu, o Meri Makitalena, Meri na tinai Jemesa kei Salome ka e ratou sa volia mai nai waiwai vakaisaluwaki boi talei, me ratou na lako ka la'ki lumuta kina na yagona.

²Ni se qai kida mai na mataka ena i matai ni siga ni dua na macawa vou, e ratou sa lako mai ki nai bulubulu ni se malamalawa ka sa cadra mai na siga.

³E ratou sa tukuna tiko mai, "e dua li ena vaqiqica tani vei kedatou na vatu kai sogo ni bulubulu."

⁴Ia ni ratou sa rai cake, e ratou sa raica ni sa vaqiqici tani tu na vatu ka ni vatu oqo e bau vatu levu dina.

⁵Ni ratou sa curu yani i loma ni bulubulu, e ratou sa raica e dua na cauravou sa vakaisulu ena i sulu balavu vulavula lumilumisa ka dabe tiko ena yasa i matau; ka e ratou sa kurabui.

⁶Ia sa tukuna mai vei ratou, dou kakua soti ni rui kurabuitaka dou mai vakasaqarai Jisu na kai Nasareci, o Koya ka lauvako ena kauveilatai. Sa tucake tale o koya! Ka sa sega eke. Dou raica na vanua era a vakadavori Koya kina.

⁷"Ia dou lako, ka la'ki tukuna vei iratou na nona tisaipeli “ kei Pita talega ni sa liu o koya ki Kaleli; mai kea dou na raici Koya kina, me vaka sa tukuna oti vei kemudou."

⁸E ratou sa lako vakatotoloi tuba ka dro tani yani mai nai bulubulu, ni ratou sa rere vakalevu ka kurabui. E ratou sega ni tukuna vua e dua, ka ni ratou sa rere.

⁹Sa tucake tale o koya ni kida mai na mataka ena i matai ni siga ni dua na macawa. Ka sa rairai e liu o koya vei Meri Makitalena ka a cemuria vua o koya e vitu na tevoro.

¹⁰A sa lako o koya ka la'ki tukuna vei iratou na dau bula vata tiko mai kei Koya, ka ni ratou se vakaloloku ka tagi tiko.

¹¹Ni ratou sa rogoca ni sa bula tale ka e raica mai o koya e matana, e ratou sa sega ni vakabauta.

¹²Ni oti oqori, e veisautaka tale o koya na kena i rairai ena nona a rairai vei rau e lewe rua vei iratou, ena nodrau a taubale tiko ena loma ni vanua.

¹³A rau sa lako ka la'ki tukuna vei iratou na vo ni nodrau i tokani, ia era sa sega talega ni via vakabauti rau.

¹⁴Sega ni dede sa qai rairai o koya vei ira na lewe tinikadua ni ra kana tiko; ka sa cudruva na nodra sega ni vakabauta kei na nodratou loma kaukauwa, baleta ni ratou sega ni via vakabauti ira na raici Koya ni sa tucake tale mai na mate.

¹⁵Sa qai tukuna vei ira, dou lako yani ki vuravura taucoko ka vunautaka nai tukutuku vinaka vei ira na tamata kecega.

¹⁶O koya sa vakabauta ka papitaisotaki sara ena bula; ia o koya e sega ni vakabauta ena lewai me cudruvi.

¹⁷"Na veivakatakilakila oqo era na cakava o ira sa vakabauta: era na cemuri ira na tevoro ena Yacaqu; ka era na vosataka na veivosa vovou;

¹⁸"Era na taura cake na gata e vuqa; kevaka mera na gunuva na wai gaga ni veivakamatei, ena sega ni na vakaleqai ira; ena vakabulai o ira sa tauvimate, ni ra sa tabaki ena ligadra."

¹⁹Ni sa vakacavara oti na Nona vosa tiko vei iratou na Turaga, a sa qai kaucake yani ki lomalagi, ka la'ki dabe sobu ena ligai matau ni Kalou.

²⁰E ratou sa lako yani ka vunau ena veivanua kecega, ka sa cakacaka vata kei ratou na Turaga, ena Nona vakadeitaka na vosa e ratou vunautaka ena veivakatakilakila sa muria. Emeni.