[41] Marika 5

¹A ra sa qai yaco yani ki tai kadua ni wai, kina nodra vanua na kai Katara.

²Ni se qai sobu tiko mai o koya i waqa, ka vakasauri ni sa lako mai vua e dua na tamata mai nai bulubulu ni curumi koya tu na yalo velavela.

³A sa dau vakaitikotiko tu ga ena vei bulubulu; A sa sega ni dua me vesuka rawa, se na sinucodo.

⁴Baleta ni sa dau vesu vakavuqa ena i qamu ni liga kei na sinucodo edau vakacavukataka na sinucodo ka vorolaka vakamatailalai nai qamu ni liga; ka sa sega kina ni rawa me dua e vakamanoataki koya rawa.

⁵Ena veisiga kei na bogi sa dau tu o koya mai na veiulunivanua kei na veibulubulu me dau qoqolou ka tavatavai koya ena vatu.

⁶A sa raici Jisu ni se tu mai vakayawa, a sa cici mai ka vakarokoroko e Matana.

⁷Ka mai tagi vaka domoilevu ka tukuna, "a cava o na cakava vei au, I Jisu, na luve ni Kalou cecere sara? Au sa kerekere vakabibi ena yaca ni Kalou mo kakua ni mai vakatotogani au."

⁸Ni sa tukuna oti vua o koya, "mo lako tani mai vua, o iko na yalo velavela!"

⁹Sa qai tarogi koya, "O cei na yacamu? "Sa tukuna, o vavakoso ni keimami sa lewe levu.

¹⁰A sa kerei koya talega vakabibi me kakua ni vakatalai ira tani mai ena vanua o ya.

¹¹Ena yasa ni ulunivanua voleka e kea era kana tiko kina e dua na qele ni vuaka levu.

¹²A ra sa masuti koya nai lala tevoro oqo, ka vaka, "mo vakatalai keimami ga vei ira na vuaka, ka me keimami la'ki curumi ira!"

¹³A sa vakadonuya vei ira o Jisu. Ka ra sa qai lako na yalo velavela taucoko oqo, ka la'ki curumi ira na vuaka (e rauta tiko ni rua na udolu na vuaka) Ara sa cici vakaukauwa ka vakamuria sobu na baba ki waitui, ka ra sa luvu kece kina.

¹⁴O ira ka vakania tiko na vuaka era sa dro ka la'ki tukuna ki na koro kei na veivanua mai na taudaku ni koro. Ka ra sa qai lako yani mera raica na ka levu sa yaco.

¹⁵Ena gauna era sa yaco yani kina vei Jisu, ka raica, na tamata ka curumi koya tu na vavakoso tevoro, ni sa dabe tiko, sa vakaisulu ka sa vinaka na nona vakasama. A ra sa rere.

¹⁶O ira ka a raica na veika sa yaco vua na tamata curumi tevoro kei ira na vuaka a ra sa tukuna na ka era sa raica.

¹⁷Ka ra sa kerei koya me sa vagalala tani mai ena nodra vanua.

¹⁸Ni sa vodoi waqa o Koya, sa qai kerekere vua o koya ka a curumi koya tu na tevoro, me lako vata talega kei Koya.

¹⁹A sa sega ni vakadonua vua o Jisu, ia sa tukuna ga vua, "mo lakoi nomudou vei ira na wekamu ka tukuna vei ira na ka levu sa cakava vei iko na Turaga, kei na nona a lomani iko."

²⁰Sa qai lako yani o koya ka tekivu me tukuna e Tikapoli na veika taucoko sa cakava vua o Jisu; a ra sa qoroqoro kecega.

²¹A sa soko tale yani ki tai kadua ena waqa o Jisu, ka ra sa osodrigi mai vua na lewevuqa, a sa tu o koya e baravi.

²²Ka raica, sa lako mai vua e dua sa lewa na vale ni lotu, na yacana o Jairo. Ni sa raici koya, a sa vakarokoroko sobu ka cuva ki na yavana.

²³Ka vakamasuti Koya, ka vaka, "na noqu goneyalewa lailai sa davo tu ka sa voleka ni mate. Mo ni lako mai ka tabaki koya ena ligamuni, me bula kina, ena vakabulai o koya.

²⁴A sa lako vata kei koya o Jisu, ka ra sa muri koya na lewevuqa ena nodra veidrigidrigi yani vua.

²⁵Ka sa dua na yalewa sa tauvi koya tiko na turu dra me tinikarua na yabaki,

²⁶Kai kuri ni rarawa vua ni levu na vuniwai e a vakalakova ka vakayagataka kina na nona i yau kece, ka sa sega ga ni bula rawa kina, ia na mate e tiko vua sa qai toso cake ga na kena ca.

²⁷Ni sa rogoca o koya nai tukutuku kei Jisu, sa lako mai e dakuna ena kedra maliwa na lewevuqa ka tara na nona i oro.

²⁸Ni sa tukuna o koya, "kevaka walega me'u na tara rawa na nona i sulu, au na vakabulai."

²⁹Ka sa vakasauri na kena mudu na turu ni dra mai na kena i drodrodro, ka sa vakila e yagona ni sa takali tani mai vua na mate oqori.

³⁰Ka vakasauri na nona sa kila o Jisu ni sa lako tani mai vua na kaukauwa, a sa vuki vei ira na lewevuqa ka tukuna, "O cei e tara na noqu i sulu?"

³¹Ia sa tukuna Vua oiratou na nona tisaipeli, "ni raici ira na lewevuqa ena nodra veidrigidrigiti mai veikemuni mo ni qai tukuna, o cei e tarai au?"

³²Ena nona veiraiyaki sa qai raici koya sa kitaka na ka o ya.

³³Ia na yalewa, ni sa kila na ka sa yaco vua sa rere ka sautanini, a sa lako mai e matana ka cuva sobu ena vakarokoroko ka sa tukuna kece vua na nona bula.

³⁴Sa tukuna vua o Jisu, "na luvequ yalewa, na nomu vakabauta sa vakabulai iko. Mo lako ena vakacegu, ka bula mai ena mate ca oqori."

³⁵Ni se vosa tikoga o koya, sa lako mai e so na tamata mai na vale nei koya ka lewa tu na vale ni lotu ka era tukuna, "na luvemu yalewa sa mate a cava tale se o cikeva tiko kina na qasenivuli oqori?"

³⁶Ni rogoca o Jisu na vosa era tukuna, sa tukuna vua na turaga sa lewa na vale ni lotu, "kakua ni o via yalolailai; o iko mo vakabauta ga."

³⁷A sa sega ni vinakata o koya me dua e muri Koya ka vakavo ga o Pita, Jemesa kei Joni na taci Jemesa.

³⁸Sa qai lako mai o koya ki na nona vale o koya sa lewa na vale ni lotu, sa kosakosa ena domo ni veiosivi kei na tagi qoqolou.

³⁹Ni sa curu yani i loma, sa tukuna vei ira, "a cava dou sa rui kosakosa ka veiosivi kina? Na gone e sega ni mate, ia sa moce ga."

⁴⁰Era sa vakalialiai koya, ia sa tukuna me ra lako taucokoi tuba, sa qai kauta na tama ni gone kei na tina ni gone, kei iratou na tiko vata kei Koya ena vanua sa davo tiko kina na gone.

⁴¹A sa taura o koya na liga ni gone, ka tukuna, "Talica, kumi," na kenai balebale, "gone yalewa lailai, Au sa tukuna vei iko, mo tucake mai."

⁴²A sa tucake mai vakasauri na goneyalewa oqo ka veilakoyaki, sa yabaki tinikarua na nona bula. Ka e ratou sa luvuci ka sega ni vosa rawa ena levu ni nodratou qoroqoro.

⁴³Ia sa vakaroti ratou sara vakabibi me kakua ni dua e kila, sa tukuna, me dua na kakana me soli vua na goneyalewa oqo me kania.