[40] Maciu 15

¹Era sa lako mai vei Jisu na daunivolatabu kei na Farisi ka ra tiko mai Jerusalemi, ka tukuna vua,

²'Na cava na vuna era talaidredre kina na nomu tisaipeli ki na nodra i tovo vakavanua na qase? Ni ra sega ni bau savata na ligadra ni ra kania na madrai.'

³A sa tukuna vei ira o koya, ka vaka, a cava talega dou sa talaidredre kina ki na vunau ni Kalou ena vuku ni nomudou i tovo vakavanua?

⁴Nai vakaro ni Kalou, sa vaka oqo, mo vakarokorokotaki rau na tamamu kei na tinamu, ke dua e vosa rurutaki tamana se tinana, me vakamatei.

⁵'Ia dou sa tukuna, o koya sa tukuna vua na tamana kei na tinana, na tubu kece ni ka drau ciqoma vei au mei loloma vua na Kalou -

⁶Sa qai sega kina ni dodonu me vakarokorokotaki rau na tamana kei na tinana. Ia dou sa vakatawayagataka kina nai vakaro ni Kalou ena nomudou i tovo vakavanua.

⁷'Oi kemudou na dauveivakaisini! A sa parofisaitaki kemudou oti tu mai o Aisea, ka vaka:

⁸Era torovi au na tamata qo mai na gusudra ga, ka vakarokorokotaki au mai na tebe ni gusudra, ia na yalodra sa yawa sara mai vei Au.

⁹Na nodra qaravi Au sa maumau walega, ni ra vakavulica me dua nai vakavuvuli na lawa e bulia na tamata.

¹⁰Sa kacivi ira mai na lewe vuqa, ka tukuna vei ira, 'Dou rogoca ka vakasamataka vakavinaka sara:

¹¹Na ka e curu yani ena gusu e sega ni vakadukadukalitaka na tamata; ia na ka ga e curu mai tuba ena gusu qo e vakadukadukalitaka na tamata.

¹²A ratou sa lako mai na nona tisaipeli ka tukuna vua, 'Na vosa o cavuta o kila li ni o vakacudrui ira kina na Farisi?'

¹³Ia sa sauma vei iratou o koya, ka vaka, na kau vakaduaga sa sega ni tea o Tamaqu mai lomalagi ena cavu laivi.

¹⁴'Dou biuti ira ga. O ira nai liuliu mataboko era liutaki ira na mataboko. Kevaka sa tubera na mataboko na mataboko e rau na lutu ruarua ki nai keli.

¹⁵Sa tukuna vua o Pita, ka vaka, 'Vakamacalataka mada mai vei keitou nai balebale ni vosa vakatautauvata oqo.'

¹⁶A sa tukuna o Jisu, 'Dou se sega ni kila rawa talega oi kemudou?

¹⁷'Dou se sega ni kila rawa ni ka taucoko e curu yani ena gusu e lako sara ki na kete ka lako sara yani i tuba?

¹⁸Ia na ka e lako mai ena gusu qori e lako sara ga mai loma ena yalo, ka vakadukadukalitaka na tamata.

¹⁹Na ka e lako mai ena lomada mai loma na vakanananu ca, na laba, na veibutakoci, na veidauci, na butako, na veibeitaki vakailasu, na vosa vakacaca.

²⁰'Na veika oqo e vakadukadukalitaka na tamata, ia na kana ka se bera mada ni vakasavasavataki na liga e sega ni vakadukadukalitaka na tamata.

²¹A sa lako tani mai kea o Jisu ka lako ki na yasana vaka Taia kei Saitoni.

²²Ka raica, e dua na yalewa ni Kenani a sa lako mai ena yasana o ya ka mai tagi vua, ka vaka, 'Isa ni lomani au mai, noqu Turaga, na Luvei Tevita! Na luvequ yalewa sa curumi koya tu vakaukauwa e dua na tevoro.'

²³Ia a sa galu o koya ka sega ni cavuta vua e dua na vosa. Ratou lako mai vua na nona tisaipeli, ka kerei koya me 'vakatala tani na yalewa qo ni tagi muri iratou tiko.'

²⁴Ia sa vosa o Koya ka tukuna vei iratou, 'Au sa talai mai ena vukudra walega na sipi sa yali ena mataqali i Isireli.'

²⁵Sa qai lako mai vua na yalewa qo ka vakarokoroko e matana, ka tukuna, 'Turaga, ni vukei au mada!'

²⁶Ia sa tukuna vua o Koya, ka vaka, sa sega ni vinaka me kau na kedra madrai na gone lalai ka me soli vei ira na koli lalai.'

²⁷sa tukuna na yalewa, 'Io Turaga, o ira sara ga na koli lalai ka ra dau kania na meme ni kakana ka ra dau lutu mai ena teveli ni nodra turaga.'

²⁸A sa vosa o Jisu ka tukuna vua, 'Yalewa sa tu vei iko e dua na vakabauta levu! Me yaco vei iko me vaka na nomu gagadre.' A sa vakabulai na luvena yalewa ena auwa sara ga o ya.

²⁹A sa lako tani mai kea o Jisu, ka lako ravita na wasawasa o Kaleli, ka cabeta cake na ulunivanua ka la'ki dabe sobu kina.

³⁰e ra sa lako mai vua na lewe vuqa, ka ra kauta mai na lokiloki, na mataboko, na galu, na mavoa kei na vuqa tale; ka ra mai vakadavora ena yava i Jisu, a sa vakabulai ira o koya.

³¹e ra qoroqoro na lewe vuqa ni ra sa raici ira na galu ni ra sa vosa rawa, sa mavo na mavoa, sa lako na lokiloki, ka ra sa rai na mataboko; Era sa vakalagilagiya na Kalou i Isireli.

³²A sa kacivi ira mai o Jisu na nona tisaipeli vei Koya ka tukuna, au sa rui lomani ira na lewe vuqa baleta ni sa tolu na siga mai qo na nodra tikoga vata kei Au, ka sega ni dua na kakana mera bau kania. Au sega ni vinakata me'u vakatalai ira yani ni ra via kana tu, de so vei ira qai rebo e gaunisala.

³³A ra sa tukuna vua na nona tisaipeli, 'E vei li ena vanua liwa qo me kau mai kina na madrai me rawa ni rauti ira na lewe vuqa oqo?'

³⁴Sa tukuna vei iratou o Jisu, 'E vica nai buli madrai sa tu oqori vei kemudou?' E ratou sa tukuna, 'E vitu, kei na vica walega na ika lalai.'

³⁵Ia sa vakaroti ira na lewe vuqa o koya mera dabe sobu ki na qele.

³⁶Sa qai taura o Koya na vitu nai buli madrai kei na ika ka vakavinavinakataka, a sa dovia o Koya ka solia vei iratou na tisaipeli; oiratou na tisaipeli e ratou sa qai solia yani vei ira na lewe vuqa.

³⁷E ra sa kana kecega ka mamau vata talega, ka vakasinaita e vitu na sova lelevu ni kakana mai na kena sa vo.

³⁸E rauta ni ra lewe va na udolu na tagane era kana, ka sega ni wili kina na yalewa kei ira na gone.

³⁹Ia sa qai vakatalai ira yani na lewe vuqa, ka vodoka o koya e dua na waqa, me lako kina yasana vaka Makitala.