[40] Maciu 16

¹O ira na Farisi kei na Sedusisi era sa lako mai vua ka tarogi koya, me vakaraitaka mada vei ira e dua nai vakatakilakila mai lomalagi, oqo ena nodra saga mera vakatovolei Koya.

²E sauma vei ira ka vaka, ni sa la'ki kala sobu na matanisiga ka dou raica ni sa bota i ra, dou sa tukuna sara, ena draki vinaka ni mataka;

³"Ni mataka lailai mai, dou tukuna ni sa draki ca ni dou sa raica na matanisiga ni sa damudamu sivia, Kemudou na dauveivakaisini! Dou sa rawa ni siqema rawa sara na veiveisau ni lomalagi, ia nai vakatakilakila ni gauna sara e muri, dou sega ni siqema rawa tiko.

⁴"Nai tabatamata ca ka dauveibutakoci ena dau vakasaqara e dua nai vakatakilakila, ena sega ni dua nai vakatakilakila era na raica rawa, ka vakavo ga nai vakatakilakila i Jona na parofita." Sa qai biuti ira o Koya ka lako yani.

⁵Ni ra sa yaco yani ki tai kadua na nona tisaipeli, na madrai era guilecava mera kauta.

⁶Sa tukuna vei ira o Jisu, "Dou rogoca vinaka, na nodra leveni na Farisi kei na Sedusisi mo dou qarauna."

⁷E yavalati ratou na vosa oqo ka ratou veivosaki, "Baleta ni datou sega ni kauta mai na madrai."

⁸Ia sa kila vinaka o Jisu, sa tukuna vei ratou, kemudou sa lailai na nomudou vakabauta, cava dou veitarogi kina vakai kemudou ni sega ni dou kauta mai na madrai?

⁹Dou sega li ni kila, se mo dou vakasamataka na lima nai buli madrai vei ira na lewe lima udolu, e vica mada na levu ni ketekete dou tawana rawa?

¹⁰Se na vitu nai buli madrai vei ira na lewe va na udolu e vica mada na ketekete lelevu dou tawana kina?

¹¹"Sa dua na ka nomudou sega ni vakasamataka rawa, ni'u sega ni vakaibalebaletaka tiko na madrai vei kemudou? Ia na nodra leveni ga na Farisi kei na Sedusisi mo dou qarauna."

¹²E ratou sa qai kila rawa ni sega ni cavuta tiko o koya me ratou qarauna na leveni ena madrai; ia me ratou qarauna na nodra i vakavuvuli na Farisi kei na Sedusisi.

¹³Ni sa yaco mai o Jisu ena vanua vaka Sisaria Filipai, sa tarogi ratou na nona tisaipeli, ka vaka, "O cei era tukuna tiko na tamata me oi Au, na Luve ni Tamata?'

¹⁴E ratou tukuna vua, "Eso e tukuna tiko ni o Kemuni o Joni na dauveipapitaiso, eso e tukuna o Ilaijia, eso tale era tukuna ni o Jeremaia, se dua tale vei ira na parofita."

¹⁵Sa qai tarogi iratou o Koya ka vaka, "Ia dou tukuna mada mai se o cei Oi Au?"

¹⁶Sa sauma o Saimone Pita ka vaka, "Oi Kemuni na Karisito, na Luve ni Kalou bula."

¹⁷Sa tukuna vua o Jisu, o sa kalouvinaka Saimone Ba “ Jona, ni sa sega ni vakatakila vei iko na lewe kei na dra, ia o Koya ga na Tamaqu sa tiko mai lomalagi.

¹⁸Au tukuna talega vei iko ni o iko o Pita, ia ena dela ni vatu oqo Au na tara kina na Noqui soqosoqo lotu, ena sega ni gumatua rawa vua na kaukauwa ni matamata mai Etesi.

¹⁹"Au na solia talega vei iko nai dola ni matanitu vakalomalagi, na veika kece o na bukia e vuravura ena buki vaka kina mai lomalagi, kei na veika kece o sereka e vuravura ena sereki vakakina mai lomalagi."

²⁰Sa qai vakarota vei iratou na nona tisaipeli, me ratou kakua sara ni tukuna vua e dua, ni o Koya sara ga o Jisu na Karisito.

²¹Sa tekivu me tukuna tiko o Jisu ena gauna o ya vei iratou na nona tisaipeli, ni dodonu me lako ki Jerusalemi, ka levu sara na veika rarawa ena sotava mai vei ira na qase ni lotu kei ira na bete levu, vaka kina vei ira na dau ni Vola Tabu, ena vakamatei, ka na qai tucake tale ena i katolu ni siga.

²²Sa qai kauti koya vakatikitiki o Pita ka vosa vakaukauwa vua, ka vaka, "Ena sega sara ga ni yaco, Turaga; na ka oqo ena sega ni na vakayacori vei Kemuni!"

²³Ia sa vuki vei Pita o Koya, ka tukuna, "Mo lako ki dakuqu, Setani! o iko o vakacudrui Au, ni o sega ni vakasamataka na veika ni Kalou, ia na veika ga vakatamata."

²⁴Sa qai tukuna o Jisu vei iratou nona tisaipeli, "kevaka e dua sa via muri Au, me kakua ni muria na lomana ia me colata ga na nona kauveilatai, ka muri Au mai.

²⁵"O koya sa vinakata me maroroya na nona bula ena vakayalia, ia o koya e vakayalia na nona bula ena vukuqu ena maroroi.

²⁶Na ka yaga cava mada ena rawata na tamata kevaka e taukeni vuravura taucoko, me mai vakayalia tu kina na yalona? E dua li na ka e rawa ni vakaisosomitaka na tamata mei sau ni yalona?

²⁷Ni na lako mai na Luve ni Tamata ena i ukuuku nei Tamana kei ira vata tukuna na nona Agilosi, ena qai mai solia o Koya vei ira na tamata yadua na kedra i sau me vaka na i vakarau ni nodra cakacaka.

²⁸"Na ka dina Au tukuna vei kemudou, eso era tucake tu eke era na sega ni tovolea na mate, me yacova ni ra sa raica na Luve ni Tamata ni sa lako sobu vata mai na Nona matanitu."