[40] Maciu 19

¹Ni sa yacova mai na gauna me sa vakaotia kina o Jisu na nona vosa, sa qai biubiu mai ena vanua o Kaleli ka lakova yani na tai kadua ni Joritani ki na vanua vaka Jutia.

²E lewe vuqa era sa muri koya, ka sa vakabulai ira e kea o Koya.

³Era sa lako mai vua na Farisi, era vakatovolei koya, ni ra tukuna vua, "E rawa li vua na tagane me sereki na watina ni vakamau ena vuku ni dua ga na ka e rawa.

⁴Sa qai sauma o Koya ka vaka, "Dou sega beka ni wilika ni o Koya e a buli rau mai nai vakatekivu sa bulia na tagane kei na yalewa."

⁵"Sa tukuna, oqo na vuna ena biuti tamana kei tinana kina na tagane ka kabita na watina, oi rau na lewe rua oqo e rau sa na dua ga na yago?

⁶"O koya oqo, e rau sa na sega ni lewe rua tiko, ia sa dua ga na yago. Na ka sa vauca vata na Kalou, me kakua ni tawasea na tamata."

⁷Era sa qai tukuna tale vua, "Na cava ga e vakarota kina o Mosese me soli nai vola ni veisere, ka me biuta laivi na yalewa?"

⁸E sauma vei ira o Koya ka vaka, o Mosese, me vaka na kaukauwa ni yalomudou, e vakadonuya vei kemudou mo dou sereka na watimudou, ia e a sega ni vaka kina mai nai vakatekivu.

⁹"Au tukuna vei kemudou, ke dua sa sereka na watina yalewa ni sega ni dautagane na yalewa, me qai vakawatitaka tale e dua na yalewa, o koya sa veibutakoci; ke dua ena via vakawatitaka na yalewa sa sere mai o ya, sa wili o koya me veibutakoci."

¹⁰Ratou tukuna vua na nona tisaipeli, "kevaka e sa vaka tu oqori na ka e vauca na tagane kei na watina, sa vinaka cake ga me sa kua na vakawati."

¹¹Ia sa tukuna vei iratou o Koya, sa sega ni rawata na tamata kece na ka oqo, ia vei ira ga e tiko vei ira na kena i solisoli:

¹²"Ni so e sucu sa sega ga ni yaga me ra vakawati, ni ra se leqa sara mai ena kete i tinadra, eso e qai mai vakavuna ga na tamata na malumalumu ni yagodra, eso e sega ni via vakawati ena vuku ni matanitu vakalomalagi. O koya sa rawata me taura na ka oqo, me taura ga."

¹³Sa kau mai vei Koya o ira na gone lalai me tabaki ira ka masulaka, ia e ratou sa cudruvi ira era kauti ira mai o iratou na tisaipeli.

¹⁴Ia sa tukuna o Jisu, "Dou laivi ira na gone lalai mera lako mai vei Au, ka dou kakua ni tarovi ira; ni o ira na lewe ni matanitu vakalomalagi era sa vaka oqo."

¹⁵Sa qai tabaki ira ena Ligana ka vosavakalouvinakataki ira ka lako tani mai kea.

¹⁶Ka raica, sa lako mai vua e dua na tamata ka tukuna vua, "Qasenivuli vinaka, na ka vinaka cava mada me'u kitaka me'u na rawata kina na bula Sega ni mudu?"

¹⁷Sa qai tukuna vua o Koya, "Na cava mo tukuna kina ni'u vinaka? E sega ni dua e vinaka ia e dua ga, oqori na Kalou. Ia kevaka o vinakata mo rawata na bula Sega ni mudu, mo maroroya na Nona i vakaro."

¹⁸E tukuna o koya, Nai vakaro cava soti? Tukuna vua o Jisu, "Mo kakua ni laba, Mo kakua ni veibutakoci, mo kakua ni butako, mo kakua ni lasulasu,

¹⁹Mo dokai rau na tamamu ki na tinamu, ka mo lomana talega na kai nomu me vakataka nomu lomani iko.

²⁰Sa tukuna vua o koya na cauravou oqo, "na ka kece oqori au sa dau cakava tu mai ni'u se qai tubu mai. Na cava tale au se sega ni cakava?"

²¹Tukuna o Jisu vua, kevaka o vinakata mo taucoko sara, mo lako, ka la'ki volitaka kece na i yau o taukena, na kena i lavo mo solia vei ira na dravudravua, o sa na qai vakaiyau kina mai lomalagi; oti o ya mo qai lako mai, ka muri Au."

²²Ia ni sa rogoca na cauravou oqo na ka sa cavuti vua, sa lako tani ena yalo e bibi, ni sa tamata vutuniyau.

²³Sa qai tukuna o Jisu vei ratou na nona tisaipeli, Au tukuna vei kemudou, ena dredre vua e dua sa vutuniyau me rawata na matanitu vakalomalagi.

²⁴"Au tukuna tale vei kemudou, e rawarawa vua na kameli me curuma na qara ni mata ni i cula, ia na vutuniyau sa dredre me rawata na matanitu ni Kalou."

²⁵Ni ratou sa rogoca na tisaipeli na vosa oqo, e tuburi ratou e dua na veilecayaki levu, ka ratou tukuna, "O cei beka ena qai vakabulai rawa?"

²⁶Ia sa vakaraici iratou tu o Jisu ka tukuna, "Ki vua na tamata na ka oqo e dredre, ia vua na Kalou e sega ni dua na ka e dredre."

²⁷Sa qai tukuna vua o Pita ka vaka, "Ni raica, na ka kece keitou sa biuta me keitou muri Kemuni. o koya oqo na cava keitou na rawata mai kina?"

²⁸Sa mani tukuna vei ratou o Jisu, " E dina Au sa tukuna vei kemudou, ena gauna sa na la'ki dabeca kina na Nona i dabedabe lagilagi vaka Turaga na Luve ni Tamata, oi kemudou na Noqu tisaipeli dou na la'ki dabeca nai tikotiko e tini karua vakaturaga, mo dou lewa na yavusa i Isireli e tinikarua.

²⁹Vei ira vakayadua era biuta na nodra vale, biuti tuakana, ganena, tamana kei tinana biuta na watina kei na luvena, se biuta na nona vanua me muri Au, ena yadrau na kena i sau ena rawata kei na bula sega ni mudu ena taukena.

³⁰"Ia vei ira na lewe vuqa sa liu era na muri, kei ira sa muri era na liu.