[40] Maciu 20

¹Ni sa tautauvata na matanitu vakalomalagi kei na dua nai taukei ni qele sa sou ena mataka lailai, me la'ki voli ira mai eso na tamata cakacaka, me mai cakacaka ena nona vei loga ni vaini.

²Sa veivosakitaka o koya vei ira mera na tauya ruasagavulu na dola dua na siga, sa qai vakatalai ira yani kina nona vei loga vaini mera la'ki cakacaka.

³"Ni lako yani o koya ena i katolu ni auwa e raica eso ni ra duri wale tu ga ena vanua ni veivoli,

⁴Sa tukuna vei ira o koya, mo dou lako ki na vei loga vaini, Au na qai saumi kemudou ni sa oti e dua na siga ena ka e dodonu.

⁵Ena i ka ono kei na i ka ciwa ni auwa sa lako tale o koya, me vaka ga sa cakava e liu.

⁶Ena i katini ka dua ni auwa sa lako tale, e raici ira e so ni ra duri walega tu ga, ka tukuna vei ira, na cava dou tucake taka tu eke ena dua na siga taucoko ka sega ni cakava e dua na ka?'

⁷"Era tukuna mai vua, baleta ni sega ni dua me saumi keimami, sa qai tukuna o koya, dou lako talega kina vei loga vaini, Au na qai saumi kemudou ni sa oti e dua na siga ena ka e dodonu.

⁸"Ni sa yakavi mai, sa tukuna nai taukei ni veiloga vaini vua na nona dauveiqaravi, mo kacivi ira vata mai na tamata cakacaka ka solia vei ira na kedra i sau, mo tekivu mai vei koya ka qai muri mai ka qai la'ki tini vei koya e liu duadua mai.

⁹O ira na qai la'ki kau mai mera cakacaka ena i katini kadua ni auwa era taura talega nai sau ni dua na siga o ya e ruasagavulu na dola.

¹⁰Ia ni sa yacova na gauna me ra taura kina na kedra i sau o ira na tekivu cakacaka e liu, era namaka me levu mai na ruasagavulu na dola na kedra i sau, ia na kedra i sau e tautauvata kecega.

¹¹Ni ra sa taura na kedra i sau, era sa la'ki vakatubu veiba vua nai taukei ni qele.

¹²"Era tukuna, o ira na qai muri mai era cakacakataka walega e dua na auwa, o sa qai mai vakatautauvatataki keimami ena i sau keimami taura, ni keimami sa vosota tu mai na katakata ni siga ena dua na siga taucoko.

¹³Ia sa vosa o koya ka tukuna vua e dua, ka vaka, noqu tagane e sega ni dua na ka ca au cakava vei iko. O a sega li ni vakadonuya vata kei au mo taura e ruasagavulu na dola ena dua na siga?

¹⁴Mo taura na kemu i sau e dodonu me nomu ka lako yani. Au vinakata me'u na solia vei koya e qai lako sara mai muri na kenai sau me tautauvata ga kei iko.

¹⁵E sega beka ni dua na kena cala me'u cakava ga na ka Au vinakata ena noqu i yau? Se me na vakaleqai iko na noqu sa rui yalovinaka?

¹⁶"Ena vaka ga o ya o ira sa muri era na liu, o ira sa liu era na muri. Ni ra lewe levu sa kacivi, ia e lailai ga sa digitaki.

¹⁷Ia o Jisu, ni sa lako cake tiko ki Jerusalemi, sa kauti iratou mada vakatikitiki na tinikarua na tisaipeli ka tukuna vei ratou,

¹⁸"Dou raica, edatou sa lako cake tiko oqo ki Jerusalemi, ena soli yani na Luve ni Tamata vei ira na bete levu kei ira na dauniVola Tabu; era na qai lewai Koya me mate,

¹⁹"Era na qai soli Koya vei ira na kai matanitu tani (matanitu o Roma) mera vakararawataka ka vakalialia, oti mera qai vakota ki na kauveilatai. E nai katolu ni siga ena tucake tale mai na mate.'

²⁰Sa qai lako mai na tinadrau na luvei i Sevete vata kei rau na luvena, ka mai tekiduru e matana ka kerea vua e dua na ka.

²¹Sa tukuna vua, o Koya, Na cava o vinakata? sa tukuna na yalewa oqo, "Mo vakayacori rau na luvequ me dua e dabe ena Yasamu i matau, ka dua me dabe ena Yasamu i mawi ena Nomuni matanitu."

²²Ia sa tukuna o Jisu, "O sa sega ni kila na ka o sa kerea. E rawa li ni rau na gunuva na bilo Au vakarau gunuva tiko, ka papitaiso talega ena papitaiso Au papitaisotaki kina?" E rau tukuna vua, "keirau na rawata."

²³Sa qai tukuna vei rau o Koya, na bilo Au gunu kina drau rawa ni na gunu kina, ka drau na rawa talega ni papitaisotaki ena papitaiso Au papitaisotaki kina; ia mo drau na dabe ena Yasaqu i matau kei na Yasaqu i mawi e sega ni rawa me'u solia, ia vei ira ga sa vakarautaka o Tamaqu mera na dabe kina.

²⁴Ni ra sa rogoca na vo ni lewe tini na ka oqo, era sega sara ga ni duavata ena ka rau cakava na veitacini oqo.

²⁵Ia sa kacivi iratou mai vei koya o Jisu, ka tukuna, dou kila ni o ira sa turaga ena veimatanitu tani era lewa taucoko na tamata, kei ira sa kaukauwa era sa vakayaco lewa vei ira kecega.

²⁶"E sega ni vaka kina vei kemudou; ia ke dua vei kemudou e vinakata me laveti cake, me vulica me nomudou dauveiqaravi.

²⁷Ke dua vei kemudou e vinakata me liutaki kemudou, ia me vaka mada e dua na bobula vei kemudou.

²⁸"Me vaka na Luve ni Tamata nona lako mai e sega ni mai qaravi, ia e dauveiqaravi, ka mai solia na nona bula me kedra i voli e lewe vuqa."

²⁹E lewe vuqa sa muri Koya ni ratou sa biuti Jeriko mai.

³⁰Ka raica, e lewe rua na tamata mataboko e rau dabe tiko ena bati ni sala, ni rau sa rogoca ni sa lako ena gaunisala o Jisu e rau sa tabalaka na domodrau ena domo ni nodrau kaci, ka vaka, "Isa Turaga, na Luve i Tevita, Ni lomani keirau mai!"

³¹Era tukuna vei rau na lewe vuqa me rau tiko lo; ia sa qai toso cake ga na domo ni nodrau kacikaci, ka vaka, "Isa Turaga, na Luvei Tevita, Ni lomani keirau mai!"

³²A sa qai tu vakadua o Jisu ka kacivi rau, ka vaka, "Na cava drau vinakata vei Au me'u cakava vei kemudrau?"

³³E rau tukuna vua, "Turaga na mata i keirau me rai rawa."

³⁴Sa lomani rau o Jisu ka tara na matadrau. E vakasauri sa rai na matadrau, ka e rau sa muri koya sara ga.