[40] Maciu 8

¹Ni sa oti mai na nona tiko ena ulunivanua, era sa muri koya na lewe vuqa.

²Ka raica, sa dua na tamata vukavuka sa lako mai ka tekiduru sobu e Matana, sa tukuna, "Turaga, kevaka sa lomamuni vei au, au kerea mo ni vakasavasavataki au."

³Sa qai dodoka na ligana o Jisu ka tarai koya ka tukuna, Au sa vinakata; mo savasava mai." E vakasauri ni sa vakasavasavataki na nona vukavuka.

⁴Sa tukuna vei koya o Jisu, "Mo raica me kakua ni dua o talanoataka vua; ia lako, ka la'ki vakaraitaki iko vua na bete, ka cabora na nomu ka ni vakavinavinaka me vaka sa vakarota o Mosese, me rawa ni ra kila kina ka vakadinadinataka na tamata."

⁵Ni sa curu mai ki Kapenaumi o Jisu, sa lako mai vua e dua na turaga ni valu, ka vakamamasu vei koya.

⁶Ka tukuna, "Turaga, e dua noqu dauveiqaravi sa davo tiko mai vale, sa tauvi paralase ka sa vutugu tu ga."

⁷Sa tukuna vua o Jisu, "Au na qai lako yani me'u vakabulai koya."

⁸Sa tukuna na turaga ni valu ka vaka, Turaga au sega ni yacova na nomuni dokai me rawa kina mo ni curuma na noqu loma ni vale. Ia mo ni cavuta ga e dua na mala ni vosa, ena bula kina na noqu dauveiqaravi.

⁹"Oi au e dua na tamata veiliutaki vei ira na sotia. Ni'u tukuna vua e dua 'Me lako,' e lako, ni'u tukuna tale vua e dua 'Lako mai,' e lako mai; ni'u tukuna vua noqu dauveiqaravi 'Cakava oqo,' e cakava o koya."

¹⁰Ni rogoca o Jisu na vosa oqo, sa qoroqoro ka tukuna vei ira na muri koya tiko, Au tukuna dina oqo vei kemudou, Au se bera vakadua ni kunea e Isireli e dua na vakabauta levu me vaka oqo.

¹¹"Me'u tukuna talega vei kemudou ena lewe vuqa era na lako mai na Tokalau kei na ra, era na dabe vata kei Eparaama kei Aisake kei Jekope ena matanitu vakalomalagi.

¹²"Ia o ira na gone dina ni matanitu era na viritaki ki na butobuto mera na tagi kina ka vakasequruquru bati."

¹³Sa qai tukuna o Jisu vua na turaga ni valu, "mo lesu tale ki nomudou; me vaka na nomu vakabauta sa bula kina o koya." Ena auwa vata ga o ya sa vakabulai kina na nona dauveiqaravi.

¹⁴Sa lako o Jisu ka curu kina vale i Pita, ka raica ni sa tauvi matetaka na tinai watina.

¹⁵Sa tara o koya na ligana, ka sa yali na tauvimate, sa duri cake ka vakarautaka na kedratou.

¹⁶Ni sa yakavi mai e lewe levu sa qai kau mai vua ni ra curumi tevoro. E cemuria tani, na yalo velavela ena Nona vosa, ka vakabulai ira talega sa tauvi mate,

¹⁷Me vakataucokotaki kina na vosa i Aisea na parofita ka vaka: "Sa colata o Koya na nodra rarawa kei na nona kauta tani na noda tauvimate kecega."

¹⁸Ni sa raica o Jisu ni ra sa toro mai vua na lewe vuqa, sa vakarota me ratou soko yani ki tai ka dua.

¹⁹Sa lako mai vua e dua na dau ni Vola Tabu ka tukuna, "Qasenivuli, au na muri iko ena vanua cava ga o lako kina."

²⁰Sa qai tukuna vei koya o Jisu, "Na fokisi e tiko nona qara kei na manumanu vuka e tiko nona sova, ia na luve ni tamata e sega ni dua na vale e tu me bau davo kina."

²¹E dua vei ira na nona tisaipeli sa tukuna vua, "Turaga, me'u lako rawa mada ka buluti tamaqu."

²²Ia sa tukuna vei koya o Jisu, "Muri Au, laivi ira ga na mate mera buluti ira na nodra mate."

²³Ni sa la'ki vodo o koya ki na dua na waqa era sa muri koya talega na nona tisaipeli.

²⁴Ka vakasauri qai tubu e dua na cagi tokavuki ena loma ni wasawasa, na kena cecere cake na biau e tiko e ra na waqa. Ia o Koya sa moce ga.

²⁵Era sa qai lako mai vua na nona tisaipeli ka vakayadrati Koya, era tukuna, "Turaga, ni vakabulai keda mada! Eda sa na mate ga!"

²⁶Ia sa tukuna vei ira o koya, "Na cava dou sa rui rere vakalevu kina, sa rui lailai na nomudou vakabauta?" Sa qai tucake mai o koya ka vunauca na cagi kei na wasawasa, ka sa maravu mai.

²⁷E ratou sa kurabuitaki koya na nona tisaipeli, e ratou sa veivosaki ka vaka, o cei mada e rawa ni cakava tu na veika vaka oqo, ni cagi mada ga kei na wasawasa e talairawarawa vua?"

²⁸Ni sa yaco yani ki tai kadua ki na nodra vanua na kai Katara, sa sota kaya kina e lewe rua na tamata curumi tevoro ni rau sa biuta mai nai bulubulu, e sega ni dua e rawa ni lakova na vanua e rau tiko kina ena nodrau rui rerevaki.

²⁹Ka vakasauri e rau sa tagi, ka tukuna, "Na cala cava keirau cakava vei iko, Jisu na Luve ni Kalou? Mo lako mai kina eke mo mai vakararawataki keimami ni se bera na kena gauna?"

³⁰E dua nai lala vuaka levu era vakani sara tiko mai vakayawa.

³¹Era sa qai vakamasuti koya na tevoro, ka vaka, "Kevaka mo vakatalai keimami, mo vakatara me keimami la'ki curumi ira na vuaka era kana tiko o ya."

³²Sa tukuna vei ira o koya, "Ni lako." Ni ra sa lako tani mai tuba, sa ra qai lako ka curumi ira na vuaka. E vakasauri ni ra sa ciciva sara na loma ni wasawasa ka dromu yani.

³³Era sa qai dro o ira sa vakania tiko na vuaka; ka lako ki na koro ka la'ki tukuna kina veika e yaco vei ira na vuaka kei rau na tamata curumi tevoro.

³⁴Ka raica, na lewe ni koro taucoko era sa qai lako mai mera mai sota vata kei Jisu. Ni ra sa raici koya, era sa kerei koya sara ga vakabibi me sa vagalala tani mai ena nodra vanua.