[40] Maciu 9

¹Sa mani vodoka o Koya e dua na waqa, ka takoso ki tai kadua ki na Nona koro dina.

²Ka raica, sa kau mai vua e dua na cauravou tauvi paralase ni davo no ena nona i davodavo. Ni sa raica o Jisu na nodra vakabauta, sa tukuna vei koya sa tauvi paralase, "Luvequ, mo vakacegu; sa bokoci na nomu i valavala ca."

³Era veitukunitaka eso na dau ni Vola Tabu ka ra tu e kea, "Na tamata oqo sa vosa vakacacataka na Kalou!"

⁴Ia o Jisu ni sa kila na nodra vakanananu, sa tukuna vei ira, "Na cava sa rui ca kina na nomudou vakasama?

⁵Na cava e rawarawa me tukuni, sa vosoti na nomu i valavala ca; se me tukuni, "Mo tucake ka lako?"

⁶"Ia ka mo dou kila ni sa tu vua na Luve ni Tamata na kaukauwa me vosota na i valavala ca e vuravura" “ sa qai tukuna vei koya sa paralase, "Mo tucake, taura na nomu i davodavo ka lako ki nomudou."

⁷Sa qai tucake o koya ka lako ki nodratou.

⁸Ni ra sa raica na lewe vuqa na ka sa yaco, era sa qoroqoro kei na nodra vakarokorokotaka na Kalou ni solia na kaukauwa vakaoqo vua na tamata.

⁹Ni sa biuta mai na vanua o ya o Jisu, sa raica e dua na tamata na yacana o Maciu ni dabe tiko ena vale ni volavola ni soli vakacavacava. Sa tukuna yani vua, "Mo muri au." Sa mani tucake o koya ka muri Koya.

¹⁰Ni sa la'ki dabe me kana o Jisu ena teveli, ka raica, e lewe levu vei ira na daukumuni vakacavacava kei ira na tamata i valavala ca era lako mai ka mai dabe vakavolivoliti Jisu kei ira na nona tisaipeli.

¹¹Ni ra sa raica na ka oqo o ira na Farisi, era tukuna vei iratou na nona tisaipeli, "Na cava na vuna e kanavata kina kei ira na daukumuna nai vakacavacava kei ira na tamata i valavala ca o koya na nomudou qasenivuli?"

¹²Ni sa rogoca oqo o Jisu, sa tukuna vei ira, na vuniwai e sega ni yaga vei ira sa bula vinaka, ia vei ira ga sa tauvi mate.

¹³"Ia mo dou lako ka la'ki vulica nai balebale ni vosa oqo: 'Au sega ni vinakata na ka dou vakacabora, Au vinakata na yalo e loloma dina.' Au sega ni lako mai me'u kacivi ira sa dodonu tu, ia o ira ga sai valavala ca me ra veivutuni."

¹⁴Era sa qai lako mai vua na tisaipeli i Joni, ka mai taroga, "Na cava beka keimami dau lolo kina kei ira na Farisi, ia o iratou na nomu tisaipeli e sega ni ratou dau lolo?"

¹⁵Sa tukuna vei ratou o Jisu, e rawa li meratou vakaloloku na weka ni tagane sa vakawati ni se tiko o koya vata kei ratou? Ia ena yaco mai na siga ena qai kau tani kina o koya mai vei ratou, e kea e ratou sa na qai lolo kina.

¹⁶Ena sega ni rawa me botana e dua na i sulu madra mai na tiki ni sulu vou; ni na kadresu nai botani o ya ia esa na qai kadresu levu sara.

¹⁷"Na tavaya makawa ena sega ni rawa me sova kina na waini vou, ena rawa ni kacabote na tavaya ka tasova era na waini, ka vakacacani na tavaya. Ia ni sova ga na waini vou kina tavaya vou e rau na maroroi ruarua."

¹⁸Ni se vosa tikoga o koya vei ira, raica, sa lako mai e dua na i liuliu ni vanua ka mai tekiduru sobu e matana, ka vaka, "Se qai mate walega oqo na Luvequ goneyalewa, ia mo lako mai ka tabaki koya ena ligamu ena qai bula tale kina."

¹⁹Sa tucake o Jisu ka muri koya, vakatalega kina o ira na nona tisaipeli.

²⁰Ka vakasauri, e dua na marama tauvi turi dra balavu sa tinikarua na yabaki na kena dede, sa lako mai dakuna ka tara na tutu ni nona i sulu.

²¹Ni sa tukuna lo e lomana, "Kevaka walega me'u tara na nona i sulu, au sa na vakabulai."

²²Ia sa vuki o Jisu, ni sa raici koya sa tukuna, "Luvequ, mo yalo vakacegu, na nomu vakabauta sa vakabulai iko." Na auwa vata ga o ya sa vakabulai kina na marama oqo.

²³Ni sa curu o Jisu kina nona vale nai liuliu ni vanua, sa raici ira na dau-uvu-ivakatagi ni mate ni ra uvui-vakatagi kei na domo ni tagi lagalaga sa sega ni cegu rawa,

²⁴Sa tukuna vei ira, "Dou vagalala tani mada, na goneyalewa oqo e sega ni mate, ia e moce ga." Era sa qai dredrevaki koya ka vakalialia.

²⁵Ia ni ra sa lako taucoko i tuba na lewe vuqa, sa qai lako o koya ka taura na ligana, sa duri cake na goneyalewa oqo.

²⁶Nai tukutuku ni ka oqo e kuruseta na vanua taucoko o ya.

²⁷Ni biuta mai na vanua o ya o Jisu, e rau sa muri koya mai e lewe rua na tamata mataboko e rau kacivaka tiko mai, ka vaka "Na luvei Tevita ni yalololoma mada mai vei keirau!"

²⁸Ni sa la'ki curu o koya ki loma ni vale, rau sa lako mai vua na tamata mataboko. Sa tarogi rau o Jisu, "Drau vakabauta li ni'u rawa ni vakabulai kemudrau?" E rau sauma vua, "Io, Turaga."

²⁹Sa qai tara na matadrau, ka tukuna, "Me vaka na nomudrau vakabauta me yaco vaka kina vei kemudrau."

³⁰Sa qai rai na matadrau. Sa vakaroti rau kina o Jisu, ka vaka, "Drau raica me kakua ni dua e kila."

³¹Ia ni rau sa lako yani, e rau sa sega tale ni qai via tabonaka, ena nodrau sa vakatetea na kena i tukutuku ena vanua taucoko o ya.

³²Ni ratou sa lako tale yani i tuba, ka raica, era sa kauta mai vua e dua na tamata sa curumi tevoro ka galu.

³³Ni sa vosa na galu ka cemuri na tevoro era sa qoroqoro ga na tamata, ka vaka, "Se bera ni dua na ka vaka oqo me bau laurai e Isireli!"

³⁴Ia era sa tukuna na Farisi, "Sa cemuri ira tani na tevoro o koya ena kaukauwa ni nodra i liuliu levu na tevoro."

³⁵Sa vakalakova o Jisu na vei koro lelevu kei na vei koro lalai, ena nona vakatavuvuli ena vei vale ni lotu kei na nona vunautaka na i tukutuku vinaka ni matanitu, e vakabulai ira sa tauvimate kei na veimatevakatevoro ka tu vei ira na tamata.

³⁶Ia ni sa raici ira na lewe vuqa, sa yavalati koya na loloma, ni ra sa oca ka talabusese tu me vaka na sipi sa sega na kena i vakatawa.

³⁷Sa qai tukuna vei ira na nona tisaipeli, sa levu dina na vuata e tu me tamusuki sa lewe lailai ga o ira me mai tamusuka.

³⁸"O koya oqo mo dou masu vua na Turaga sa Nona na vuata me tamusuki, me vakalevutaka mai na tamata cakacaka me ra mai tamusuka."