[33] Maika 5

¹Dou soqoni mai vakamataivalu oi kemudou na goneyalewa; era sa tuvaivalu mai vei keda; era na mokuta na i liuliu ni Isireli ena dua na kaukamea me tara na baluna.

²"Ia o iko, Peciliema Efiraca, e dina ni o ka lailai sara vei ira na lewe udolu e Juta, ia mai vei iko ena lako mai vei Au o koya ena Lewai ira na Isireli, na nona lako mai sa ka mai liu sara, ni se bera nai vakatekivu."

³O koya oqo ena soli ira yani o Koya, me yacova ni sa sucu o koya e mosi tiko; o ira na tacina ka se vo tu mai era na lesu vei ira na gone ni Isireli.

⁴Ena qai tucake ka vakani ira na nona qele ni sipi, ena kaukauwa i Jiova, ena yaca vakaturaga i Jiova na nona Kalou; era na vauci vata me dua, ni sa levu o Koya me yacova yani nai yalayala kei vuravura;

⁵O koya na dau ni veisaututaki. Vakatulewa Baleti Ira Na Meca Kei Isireli Ni ra butuka mai na noda vanua na kai Asiria, ka curuma na noda dui veivalevale, eda na biuta vei ira mera vala e lewe vitu nai vakatawa ni sipi, kei na lewe walu na turaga momo qaqa vinaka.

⁶Era na vakarusa na vanua o Asiria ena i seleiwau, kei na i curucuru ni koro o Nimiroti; ena vakabulai keda o Koya mai na ligadra na kai Asiria ni sa butuka mai na noda qele, kei na Nona kalawaca na noda i yalayala.

⁷Era na tu maliwai ira na veimata tamata na tamata i Jekope era vo tu, me vaka na tegu i Jiova, kei na uca ni tau ena dela ni co, sa sega ni ra qai via waraka vakadede na nona yaco mai na luve ni tamata.

⁸O ira na Jekope era vo tu, era na tu vata kei ira na matanitu tani ena veivanua, mera bula veimaliwai kei ira, vaka na laione ena kedra maliwa na manumanu kila ni veikau, vaka nona lako voli ena kedra maliwa na qele ni sipi e dua na luve ni laione, ke sa lako yani o koya ena basuraki rau vakalalai, ka sega e dua me na tarova rawa.

⁹Ena qai laveti cake na ligamu ni sa qaqa vei ira kece era a cati iko, kei ira talega na kemu meca era na vakaoti laivi.

¹⁰"Ena qai yaco ena siga o ya". Sa tukuna o Jiova, "Au na vakaoti ira taucoko na nomudou ose mai vei kemudou ka vakarusa na nomudou qiqi ni valu.

¹¹Au na vakaotia taucoko na nomu veikoro lelevu, ka viritaka sobu na nomudou koro ni valu kaukauwa.

¹²Au na kauti ira tani na dauvagunu mai na ligamudou kei ira na dau parofisai vakailasu.

¹³Au na muduki ira taucoko na nomu matakau ceuceu, kei na matakau levu dau duri tu, dou na sega ni na vakaliuca tale na cakacaka ni ligamudou;

¹⁴Au na talaraka laivi na nomudou matakau kau vakaitamera, kei na nomudou koro levu talega Au na vakarusa.

¹⁵Vei ira na matanitu ka sega ni via vakarorogo ena ka Au sa tukuna, ka Au na vakayacora vakaidina me'u sauma ve ira, ena noqu cudru katakata sara."