[4] Na Kedra I Wiliwili 10

¹Sa qai vosa o Jiova vei Mosese, ka tukuna:

²"Mo cakava e rua na davui siliva me nomu; ka mo cakava e na i tukituki; ka o na dau vakayagataka e na nodra kacivi me ra soqoni vata mai na i vavakoso kei na kena dusimaki na nodra veigoleyaki e na i tikotiko.

³"E na gauna era sa uvuci rau ruarua kina, me ra qai soqoni vata kece mai na lewe ni vavakoso e matamu e na mata ni katuba ni vale ni veitavaki.

⁴"Ia kevaka era uvuca ga e dua, me ra qai soqoni mai o ira na liuliu, kei ira era veiliutaki ena vei wasewase e Isireli, mera kumuni vata mai vei iko.

⁵"Ni o sa uvuca na toso i liu, o ira na vakaitikotiko ena yasana kina tokalau mera sa tekivu cavutu yani ka lako.

⁶"Ni o sa uvuca vakarua na tosoi liu, o ira era vakaitikotiko ena yasana kina ceva me ra sa tekivu cavutu yani ka lako; Me ra rogoca na domo ni kaci ni sa dodonu me ra sa lako yani.

⁷"Ia kevaka sa dodonu mera soqoni vata mai, o na uvuca, ia me kua ga ni rogoci na tosoi liu.

⁸"Oi rau na luvei Eroni, na bete, me rau uvuca na davui; ia oqo esa na dua na veiyalayalati vei iko kei ira kece na nomu kawa ka sega ni mudu.

⁹"Ni o sa cavuta mo lako kina i valu e na nomu vanua mo vala vata kei ira na meca ena vakatotogani iko, mo qai uvuca na davui. Me rawa ni kilai, o na qai nanumi kina mai vei Jiova na nomu Kalou, o na qai rawa ni vakabulai mai vei ira na kemu meca.

¹⁰"E na veisiga talega ni nomu dau marau, e na gauna ni kana vata e so sa lokuci, e na i tekitekivu ni nomu veivula mo na dau uvuca na davui e na i soro kama kei na nomu soro kei na madrali ni veivinakati, ena dau veivakananumi vei iko e na mata ni nomu Kalou."

¹¹Ia, ni sa yaco mai oqo ena i karuasagavulu ni siga e na i karua ni vula, e na i karua ni yabaki ena gauna e sa kau cake kina na o mai na vale ni Kalou kei na Vakadinadina.

¹²E ra sa qai biubiu ka cavuta mai na Isireli mai na vanua liwa e Saineai me ra sa lako; sa qai toka sobu na o ena Vanua Liwa Parana.

¹³E na i matai ni gauna e ra sa qai tekivu me ra lako yani me vaka sa vakarota vei ira o Jiova ena liga i Mosese.

¹⁴Na i matai ni wasewase e na nodra tagede me tekivu mera lako yani sai ira na luvei Juta me vaka na nodra i tuvatuva ni mataivalu; e na nodra mataivalu oqo sa liu kina o Nasoni na luvei Amenatave.

¹⁵Vei ira na mataivalu ni yavusa nodra na luvei Isikari oNicanieli na luvei Sua.

¹⁶O ira na mataivalu ena yavusa ni luvei Sevuloni oiliave na luvei Eloni.

¹⁷Sa qai kau sobu mai na vale ni Kalou;era sa qai lako mai na luvei Keresoni kei ira na luvei Merari ka ra sa cola yani na vale ni Kalou.

¹⁸E ra sa tarava yani na i wasewase e na i tikotikoi Ruveni me vaka na nodra mataivalu; sa liutaki ira mai o Elisuri na luvei Setiuri.

¹⁹Ia vei ira na mataivalu ni yavusa ni luvei Simione o Selumieli na luvei Surisatai.

²⁰O ira na mataivalu e na yavusa ni luvei Kata o Eliesava na luvei Tiueli.

²¹Era sa qai lako mai na luvei Koaci, ka ra cola tiko na i yaya savasava.(E sa na vakarau tu na vale ni Kalou ni ra sa yaco mai.)

²²O ira na i wasewase ni nodra i tikotiko na luvei Efereimi era sa lako mai me vaka na nodra mataivalu; ka sa i liuliu vei ira o Elisama na luvei Amiute.

²³O ira na i wasewase ni mataivalu e na yavusa nodra na luvei Manasa o Kamelieli na luvei Petasuri.

²⁴O ira na mataivalu ni yavusa i Penijamini o Avitani na luvei Kitione.

²⁵Kei na i wasewase ni tagede vei ira na livei Tani (era yadrava na mua i muri ni veitikotiko kece) era sa lako mai me vaka na nodra mataivalu o Aiesa o Pagieli na luvei Enani.

²⁶Vei ira na lewe ni matavuvale ena yavusa ni luvei Aseri o Pagieli na luvei Okarani.

²⁷Vei ira na lewe ni mataivalu ena yavusa ni luvei Navitalai o Aira na luvei Enani.

²⁸Sai koya oqo na kena tuvani na nodra i lakolako na Isireli, me vaka na nodra veimataivalu, ni sa tekivu me ra cavutu ena nodra i lakolako.

²⁹Sa qai vosa o Mosese vei Opapi na luvei Riueli na kai Mitiani, na vugoi Mosese, ka vaka: "Keimami sa lako tiko oqo kina vanua e vosa kina na Kalou, 'Au na solia vei iko'. Mo lako vata kei keimami, keimami na maroroi iko vinaka; ni o Jiova e sa yalataka na veika vinaka e Isireli."

³⁰Sa qai tukuna vei koya, "Au na sega ni lako, ia au sa na lako ga kina noqu vanua vei ra na kai noqu."

³¹Sa qai tukuna o Mosese, "Yalovinaka mo kakua ni lako me vaka ni o sa kila ni dodonu me keimami mai tiko ena Vanua Liwa, o iko e rawa ni o na yadravi keimami.

³²"Ia, kevaka e mani yaco mo lako vata kei keimami”au kila ni na vakakina”ia na ka vinaka cava ga e na cakava vei keimami o Jiova, keimami na cakava vaka talega kina vei iko."

³³Era sa qai cavutu me ra biubiu mai na ulunivanua i Jiova ka lako yani me siga tolu na nodra i lakolako, ia na kato ni veiyalayalati i Jiova sa liu tiko vei ira e na siga tolu o ya, me vakasaqara e dua na vanua me ra vakacegu kina.

³⁴Ia, na duru o i Jiova e sa vakaruguti ira toka ena siga ni ra sa lako tani mai na nodra i tikotiko.

³⁵Sa mani yaco, ni sa lako mai na Kato, sa tukuna o Mosese; "Ni tucake, Jiova! Me ra dui veiseyaki na Nomuni meca, Kei ira era cati Kemuni me ra dro e Matamuni."

³⁶Ia, ni sa mai vakacegu, sa tukuna: "Ni lesu mai, I Jiova, Kivei ira na veiudolu e Isireli."