[20] Vakaibalebale 1

¹Na Kena Yaga Na vakabalebale i Solomoni na luvei Tevita, na tui Isireli:

²Me kilai kina na vuku kei nai vakavuvuli; Me kune kina na vosa vakayalomatua,

³Me rawa kina nai vakavuvuli ni vuku. Me rawa kina nai vakavuvuli ni yalododonu, Me rawa kina nai vakavuvuli ni lewa, Me rawa kina nai vakavuvuli ni cakacaka dodonu;

⁴Me soli kina na yalomatua vei ira na yalowai, na kila ka kei na lomavuku vua na cauravou.

⁵Ena vakarorogo na lomavuku, ka sa tubu kina nona vuku, kei na tamata lomakasa ena rawata nai vakasala ni yalomatua,

⁶Me kila sara na vakabalebale kei na kena vakamacala, na vosa ni vuku kei na vosa vakatautauvata.

⁷Na rerevaka na Kalou sai vakatekivu ni vuku kei na kila ka, o ira na lialia, era sa cata na vuku kei nai vakavuvuli.

⁸Na luvequ, rogoca nai vakavuvuli i tamamu kakua ni biuta nai vunau nei tinamú;

⁹E ra na rairai vinaka me vaka nai ukuuku ena ulumu kei nai taube ena domomu.

¹⁰Na luvequ, kevaka sa temaki iko e dua mo bese ga.

¹¹Kevaka era sa tukuna, "Tou mai wawa vakavuni mada, medatou vakadavea na dra Sega ni Cala oqori;

¹²Me ra tilomi bulabula vaka nai bulubulu, o ira kece me vaka ki na qara;

¹³E da na kunea nai yau talei kecega, eda na vakasinaita na noda vale ena i toki ni valu;

¹⁴Me da sa kumukumuni ga, ka, me sa dua ga na noda taga ni i lavo".

¹⁵Na luvequ, kua ni lako vata kei ira, tarova na yavamu mai na nodra sala;

¹⁶Sa ciciva na ca na yavadra, ka ra sa kusarawa ni vakadavea na dra.

¹⁷E dina sa sega ni yaga na biri dai e matadra na manumanu vuka;

¹⁸E ra sa cakava ga na ka me vakaleqai ira ga, e ra sa toka vuni me ra coko tale ena nodra vere.

¹⁹Sa vakakina, na nodra i valavala kecega me ra kocova na ka sa sega vei ira.

²⁰Sa dau kacikaci vakadomoilevu o vuku e tautuba, e na veisaqata sa dau kaci vakarogolevu sara.

²¹Sa kaci vakarogolevu ena vanua era sa soqoni kina na tamata, ka tukuna yani:

²²"Oi kemudou na yalowai, sa vaka soti E vei na nomudou vinakata tiko na yalowai? Dou marau tiko ena nomudou veivakalialiai, dou sa cata na vuku.

²³Dou lesu mai ki na Noqu i vunau, raica au na sovaraka na yaloqu vei kemudou, ka vakatakila na Noqu vosa vei kemudou.

²⁴Ni'u a daukaci, dou a bese ga, Ni'u a dau dodoka yani na ligaqu, dou sa sega ni kauwaitaka,

²⁵Dou a dauvakawaletaka na noqu i vakavuvuli, ka sega ni vinakata na noqu vunau,

²⁶Oi au talega, au na dredrevaka na nomudou vakaloloma; ni sa yaco mai na nomudou rere, au na vakalialiai kemudou,

²⁷Ni sa yacovi kemudou mai na rere, me vaka na cagi leca, ni sa yacovi kemudou mai na ca, me vaka na covulaca, ni sa yacovi kemudou mai na rarawa kei na yaluma.

²⁸"Era na qai kaci mai, au na sega ni rogo yani; era na qai vakasaqarai au, era na sega ni kunei au.

²⁹Ni ra sa cata na vuku, era sa sega ni digitaka na rerevaki Jiova,

³⁰Era sa besetaka ga na Noqu i vakavuvuli: ka beca na Noqu vunau kecega.

³¹Era na kania kina na vua ni nodra i valavala, era na mamau talega ena nodra lewa.

³²Na nodra vuki tani na yalowai era na mate kina, kei na nodra sautu na lialia era na rusa kina;

³³Ia, o koya sa vakarorogo vua na Kalou ena tiko vinaka, ka vakacegu tiko, ka sega ni rerevaka e dua na ka ca."