[20] Vakaibalebale 2

¹Na luvequ, mo taura na noqu vosa, vakamareqeta na noqu i vakaro,

²Mo vakarorogo ki na yalomatua ka me kabita na yalomu na vuku;

³Io, mo tagica na kila na ka, tagica vakalevu na kilai deivaki ni ka,

⁴Vakasaqarai koya me vaka na siliva, se qara vakaukauwa me vaka nai yau vuni;

⁵O na qai kila dina na rerevaki Jiova, ka kunea na kila ka Vakalou.

⁶Ni sa solia na Kalou na yalomatua; mai na gusuna sa lako mai kina na kila na ka kei na kila sara na ka;

⁷Sa kumuna tiko na yalomatua e titobu me nodra o ira sa dodonu sara; sai sasabai o koya vei ira sa lako vakadodonu tiko;

⁸Sa vakatawa na gaunisala ni lewa dodonu, ka sa maroroya na nodra i lakolako na nona tamata.

⁹O na qai kila dina na yalododonu kei na lewa dodonu, kei na lewa vinaka io, na sala vinaka kecega.

¹⁰Ni sa curuma na yalomu na yalomatua ka sa kamikamica ki lomamu na kila na ka,

¹¹Na vuku dina ena taqomaki iko, Na kila ka dina ena maroroi iko,

¹²Me vakabulai iko mai na sala kecega e ca, mai vei ira talega na tamata sa dau cavuta na ka kecega e ca,

¹³Mai vei ira kecega sa biuta na sala dodonu, ka lakova na sala ni butobuto;

¹⁴Mai vei ira kecega sa marautaka na cakava na ka ca ka gadreva tikoga na nodra i valavala na tamata ca;

¹⁵O ira talega sa yaloveve ka sa ca sara ena sala;

¹⁶Me vakabulai iko mai vei ira na yalewa ca, o ira sa dauveitemaki gaga ena gusudra,

¹⁷O koya sa biuta na nona i tokani dina mai na gone, sa yali talega vua na veiyalayalati ni Kalou.

¹⁸Sa liutaki na nona vale ki na mate, na nona sala vei ira na mate;

¹⁹Sa sega ni dua e lako vua me lesu bula mai se me kunea tale na sala ki na bula.

²⁰Mo lakova na sala vinaka ka maroroya na sala dina ni yalododonu.

²¹O ira na dodonu sara era na tiko ena vanua, Kei ira na sega ni cala era na tikoga;

²²O ira na tamata ca, era na musuki tani mai vuravura, kei ira na tamata sega ni dina, era na cavuti tani mai.