[20] Vakaibalebale 3

¹Na luvequ mo kua ni guilecava na noqu vosa, na yalomu me maroroya na noqu i vakaro;

²Ni na vakaikuritaki kina vei iko na veisiga, na bula balavu kei na sautu.

³Me kua ni yali vei iko na yalololoma kei na dina, mo vakaisalusalu kina, vola sara ki na vu ni yalomu,

⁴O na qai kunea na veitokoni kei na rogo vinaka, ena mata ni Kalou kei ira talega na tamata.

⁵Nuitaki Jiova ena yalomu taucoko, ka kua ni nuitaka na ka o kila;

⁶Ena veika kecega, vakaliuci Koya, ena qai vakadodonutaka na nomu i lakolako o Koya.

⁷Mo kua ni raici iko ena nomu vuku; mo rerevaka ga na Kalou ka lako tani mai na ca kecega.

⁸Ena bulabula kina na yagomu, na nomu sui talega ena kaukauwa mai.

⁹Doka na Kalou ena ka o taukena, kei nai sevu ni nomu vuata kei na i yau e vuqa e tu vei iko;

¹⁰Ena qai sinai sara na nomu lololo, kei na saqa ena sinai ena waini vou.

¹¹Na luvequ, kua ni o beca ni sa vakavulici iko o Jiova, se mo cata na nona veivakadodonutaki;

¹²O Jiova sa lomani ira ga, sa soli ira me ra vakadodonutaki, me vaka na tama ni gone vua na luvena.

¹³Sa ka ni marau vua e dua na tamata ni sa kunea na yalomatua ka sa rawata na kila ka;

¹⁴Na nona cakacaka ena uasivi mai na kena e rawa mai na siliva kei na tubu e rawa mai na koula.

¹⁵Ai yau levu o koya mai na rupi, ka rau na sega ni vakatauvatani kei na ka talei kecega o nanuma rawa.

¹⁶E na ligana i matau sa tiko kina na bula balavu, e nai mawi sa tiko kina nai yau kei na vakarokoroko.

¹⁷Sa vinaka kecega na nona sala, ka sa veivakacegui na nona i lakolako kecega.

¹⁸Sa kau ni bula vei ira sa taura matua tiko, sa vu ni marau sara vei ira sa dei tiko vua.

¹⁹O Jiova sa tauyavutaki vuravura ena yalomatua: Ena vuku sa vakadeitaki kina o lomalagi;

²⁰Ena nona kila sa basuka kina na titobu, ka sa vakalutuka kina na tegu, na vei o.

²¹Na luvequ me ra kakua ni yali mai matamuO maroroya na yalomatua dina kei na lewa maqosa;

²²Era na ka ni bula ki na yalomu ka sai salusalu ni domomu.

²³O na qai lako vakavinaka ena nomu sala, ka na sega ni tacaqe na yavamu.

²⁴Ni o sa davo sobu o na sega ni rere, Io, ena kamikamica sara na nomu moce.

²⁵Kua ni rerevaka na ka e dauveivakarerei, se na nodra veivakaleqai na tamata ca;

²⁶E na nomu i vakadei o Jiova, ka na sega ni vakatara me vesuki na yavamu.

²⁷Kua ni tarova na vinaka e dodonu me nona e dua tale, ni se tiko e ligamu na kena kaukauwa, cakava sara.

²⁸Kua ni tukuna vua na wekamu, "Wawa mada, ni mataka au na qai solia vei iko cakava oqo." Ni se tiko e ligamu.

²⁹Kua ni cakava na ka ca vua na kai nomu, ni sa maroroi tiko o koya, ena nomudrau tiko vata.

³⁰Kua ni veileti kei na dua, ni sega na vuna kevaka e sega ni cakava vei iko e dua na ka.

³¹Kakua ni vakatara me rawai iko na nona i valavala na tamata kaukauwa, kua talega ni digitaka na nona sala;

³²Sa ka vakasisila vei Jiova na yalovakatani, ia, na nona vosa vuni sa tu ga vei ira sa dodonu sara.

³³Na nona veirukaki na Kalou sa tu ena nodra vale na tamata ca, ia, sa vakalouvinakataka na nodra i tikotiko na dodonu.

³⁴Sa dau vakalialiai ira na dauveivakalialiai o Jiova, ia, sa solia na loloma vei ira na yalomalumalumu.

³⁵O ira na yalomatua era na taukena na ka vakaiukuuku, ia, na madua sa nodra ga na tamata lailia.