[20] Vakaibalebale 4

¹Dou rogoca na luvequ, na nona i vakavuvuli na tamamudou, vakanamata kina mo kila deivaki sara;

²Au sa solia vei iko na i vakavuvuli vinaka, kakua ni biuta tani nai vunau.

³Oi au na luvei tamaqu duabau, o tinaqu sa dau vakamenemenei au, ni'u sa nona gone ni toko,

⁴Sa dauvakavulici au ka tukuna tiko, "Na yalomu me maroroya na noqu vosa, mo bula ni o sa dabe dei ena noqu i vakaro.

⁵Mo yalomatua, mo kila deivaki sara! Kua ni guilecava se vuki tani mai na vosa ni gusuqu.

⁶Kua ni vuki tani mai vei koya, e na qai maroroi iko dina o koya.

⁷Sa ka levu dina na yalomatua, o koya oqo mo rawata mada na yalomatua, ena ka kece mo rawata, mo rawata na kila na ka.

⁸Vakacerecerea na yalomatua, ena qai laveti iko cake o koya; ena kauta mai vei iko na dokai kevaka o sa vakamareqeta na yalomatua.

⁹Ena vakaisalataki iko ena i rairai ni bula totoka; nai sala vakaiukuuku ena solia vei iko."

¹⁰Rogoca na luvequ, taura na ka au sa tukuna, ena levu kina na veiyabaki ni nomu bula.

¹¹Au sa vakavulica vei iko nai valavala ni yalomatua, au sa tuberi iko ki na sala vinaka.

¹²Ni o sa lako kina, o na sega ni vakataotaki, ni o sa cici, o na sega ni tacaqe.

¹³Taura matua nai vakavuvuli, kua ni biuta, maroroya, ni sa nomu bula o koya.

¹⁴Kua ni curuma na nodra sala na tamata ca, kua talega ni muria na nodra i valavala.

¹⁵Tu vakadua ka vuki tani mai kina, ka lako sara yani.

¹⁶Era na sega ni moce, me yacova ni ra sa cakava e dua na ka ca; era na sega ni moce me yacova ni ra sa vakabalea rawa e dua.

¹⁷Era sa kania na madrai ni ca, ka gunuva talega na wai ni vakacaca.

¹⁸Na nodra sala na dina sa vaka na siga e serau tu, sa rarama cake tiko ga, me vaka na siga e taucoko.

¹⁹Na nodra i valavala na tamata ca, sa butobuto ga; era sa sega ni kila na cava e vakatarabetaki ira.

²⁰Na luvequ, mo vakanamata ki na noqu vosa; vakatu daligamu ki na ka au sa tukuna.

²¹Me ra kakua ni yali mai matamu, maroroya ena vu ni yalomu;

²²Sa ka ni bula vei ira sa kunea, sa bula talega ki na yagodra taucoko.

²³Maroroya vinaka na yalomu, ni sa lako mai kina na i vurevure ni bula.

²⁴Biuta tani na gusu tatakelokelo, na tebenigusu veve mo biuta tani sara mai vei iko.

²⁵Me rai tiko vakadodonu na matamu kei na yaloka ni matamu me rai tiko ki liu.

²⁶Lewa vinaka nai lakolako ni yavamu, ka me vakadeitaki talega na sala o muria.

²⁷Kua ni gole ki nai matau se ki nai mawi; kalawa tani na yavamu mai na sala ca.