[20] Vakaibalebale 18

¹Na tamata dau murimuri lomana ena lako taudua tikoga; ka na dau cata na lewa vakayalomatua kecega.

²Na lialia ena sega ni rekitaka na vuku, Sa vakaraitaka tiko ga na ka sa tiko e lomana.

³Ni ra sa lako mai na tamata ca, sa lako vata mai na veicoqacoqa; na veibeci sa salavata na vakabebe.

⁴Na vosa mai na gusu ni tamata sa wai titobu; Nai vurevure ni yalomatua sa mataniwai drodro tikoga.

⁵Sa sega ni ka vinaka na nodra vakaduiduitaki na tamata ca, se, na nodra vuaviritaki na yalododonu ena lewa.

⁶Na tebenigusudra na lialia ena basika ga kina na veiba, na gusuna ena kaciva tikoga na i vacu.

⁷Na gusuna na lialia, sa nona vakarusai, kei na tebenigusuna sai cori ni yalona.

⁸Na nona vosa na daunivosa sa kanakana vaka na niuniu, sa kakana ki loma sara.

⁹O koya sa vucesa vakalevu, e rau sa veitacini kei na dauveivakarusai.

¹⁰Na yaca i Jiova sa kaukauwa ka cecere; era cici kina o ira na yalododonu ka ra sa vakabulai.

¹¹Na nona i yau na vutuniyau sa nona koro kaukauwa, sa nanuma ga o koya ni sa bai cecere.

¹²Na yalo viavialevu sa muri koya na rusa, Na yalo vinaka sa muri koya na veidokai.

¹³O koya sa sauma na taro ni se bera na taro, sa ka lialia ka veivakamaduataki vei koya.

¹⁴Na yalo ni tamata sa dauveimaroroi ena gauna ni tauvimate, O cei beka sa rawa ni vosota na yalo sa kavoro oti?

¹⁵Na yalodra na yaloqaseqase sa rawata na vuku kei na daligadra na yalomatua sa vakasaqara na kila ka.

¹⁶Na nona i solisoli e dua na tamata, sa dolava vua na katuba, ka sa kauti koya mai ki vei ira na tamata rogo.

¹⁷Na i matai ni tamata sa lako mai me vakamacalataki koya sa rairai dodonu sara, Me yacova ni sa lako mai e dua tale me vakadikevi koya.

¹⁸Na vakawirimadigi sa vakamalumutaka na veisei, ka wasei ira vakayawa na qaqa.

¹⁹Na tacida sa vakamavoataki na yalona sa dredre sara me rawai lesu ka rawarawa mo rawa lesu e dua na koro.

²⁰Sa vakamamautaki na tamata mai na vua ni gusuna; mai na vua ni tebenigusuna sa vakasinaiti kina o koya.

²¹Na mate kei na bula sa rawa mai na kaukauwa ni yamemu, o ira sa taleitaka, era na kania na vuana.

²²O koya sa kunea na watina, sa kunea e dua na ka vinaka, sa rawata na veitokoni mai vei Jiova.

²³Na tamata dravudravua sa dauvakamamasu, Na tamata vutuniyau sa dau vosa vakaukauwa.

²⁴Na tamata sa vakaveiwekani me vinaka sara na nona veiwekani, Sa tiko ga e so era sa veiwekani vinaka sara mai vei ira.