[20] Vakaibalebale 25

¹Oqo talega na vosa vakaibalebale i Solomoni, o koya era sa vakamurimuria na tamata i Esekaia na tui kei Juta:

²Sa ka lagilagi vua na Kalou na kena maroroi na ka, Na nodra lagilagi na tui, sai koya na kena vakasaqarai na ka.

³Me vaka na cecere kei lomalagi kei na titobu kei vuravura, Sa vaka kina na yalona na tui ni sa sega ni kilai rawa.

⁴Kauta tani na duka mai na siliva ena qai kune na siliva dina.

⁵Kauti ira tani na tamata ca mai na matana na tui, ena vakadeitaki ena i tikotiko vakaturaga na yalododonu.

⁶Kua ni laveti iko cake na mata ni tui, mo kua talega ni tu ena nodra i tutu na turaga;

⁷Ni vinaka cake me tukuna vei iko na tui, "lako cake mai ke", mai na nomu vakalailaitaki e matadra na turaga, o ira o sa veiraimata tiko vakalevu kei ira.

⁸Kua ni lako vakatotolo ki na mataveilewai, se na cava o na cakava ena gauna mai muri ni ra na vakamaduataki iko na wekamu?

⁹Drau veivosakitaka kei na wekamu na nomu leqa, kua ni tukuna na nomu ka vuni vua e dua tale na tamata;

¹⁰De qai talanoataki iko vakaca ka qai vakacacani na kemu i rogorogo.

¹¹Na vosa dodonu vosataki ena gauna taudonu sa vaka nai bulibuli koula ena tere siliva.

¹²Me vaka na sau koula kei na i ukuuku koula vinaka sara, na dauvunau yalomatua ki na daliga dau vakarorogo.

¹³Me vaka na uca cevata ena gauna ni tatamusuki, sa vaka kina na i talai vakabauti vei koya sa veitalai, ni sa dau vakabulabulataka na yalona na nona turaga.

¹⁴O koya sa yalayala ka lasu tale sa vaka na o kei na cagi sa sega na kena uca.

¹⁵Na veiliutaki sa vakananumi ena vosota, kei na vosa vakaturaga sa tara ga na sui.

¹⁶O sa kunea na de ni oni? Kania ga vakarauta, ni o sa kania vakalevu, o na lua tale.

¹⁷Me vakagauna ga na nomu lako ki na vale nei koya na wekamu, de qai sosa tale, o na wekamu qai cati iko.

¹⁸Na tamata sa beitaka vakailasu na wekana, sa vaka e dua nai wau, e dua nai seleiwau, sa vaka e dua na gasau momoto.

¹⁹Nomu vakabauta e dua na tamata sega ni dina ena gauna dredre, sa vaka e dua na batimu sa ca tiko, sa vaka talega na yavamu i ra sa sega ni sema tiko.

²⁰Sa vaka e dua sa luvata e dua na i sulu ena vula i batabata, sa vaka kina o koya sa lagasere tiko vua na yalobibi.

²¹Kevaka sa via kana na kemu meca, solia vua na madrai me kania, kevaka sa via gunu vakagunuvi koya ena wai;

²²O sa binia tiko kina e uluna na qilaiso waqa, ka o na saumi vinaka kina mai vei Jiova.

²³Na cagi mai na vualiku sa kauta ga mai na uca kei na dauveikaseti sa vakavuna ga na veivala.

²⁴Sa vinaka na tiko ena tutu ni vale e cake ka ca na tiko vata na yalewa dauveivala.

²⁵Me vaka na wai batabata ki na loma karamaca sa vaka kina nai tukutuku vinaka mai na vanua vakayawa.

²⁶Na tamata yalododonu sa veivakabekabei, ena matadra na tamata ca sa vaka nai vurevure vuni kei na wai veiwaki.

²⁷Sa sega ni vinaka mo kania vakalevu na deni oni; Na lagilagi e vakasaqarai, oqori, sa sega ni lagilagi.

²⁸O koya sa sega ni lewa na yalona, sa vaka na koro ka basuraki sobu ka sega na kena bai.