[20] Vakaibalebale 26

¹Me vaka na uca cevata ena vula i katakata kei na uca ena gauna ni tatamusuki sa vaka kina na dokai vei ira na lialia.

²Me vaka na nodra wacece na separo kei na nodra veivukayaki na kakabace, sa vaka kina na nodra veirulaki ni na sega ni yaco, ni sega na kena dina.

³Na kuita vua na ose, Nai tatarovi vua na asa, Nai waro ena dakuna na lialia.

⁴Kua ni sauma vua na lialia me vaka na nona lialia, Qarauna mo kua ni vakataki koya.

⁵Sauma na lialia me vaka na nona lialia, Me rawa ni yalomatua mai na nona rai.

⁶O koya sa vakauta nai tukutuku ena ligana na lialia, sa musuka laivi na yavana vakai koya, ka sa gunuva na wai ni veivakasaurarataki.

⁷Me vaka na yavana na lokiloki sa vakalili yava, Oqori na vosa vakaibalebale ena gusuna na lialia.

⁸Me vaka e dua sa biuta na vatu ena i vakawiri me viritaka, sa vaka kina o koya sa doka na lialia.

⁹Me vaka ni sa coba e dua na voto ni kau ki na ligana na daumateni, sa vaka kina na vosa vakabalebale ena gusuna na lialia.

¹⁰Na Kalou levu o koya sa lewa na ka kecega Sa solia vua na lialia na nona i votavota kei na talaidredre na kena i sau.

¹¹Me vaka sa lesu tale na koli ki na nona lua sa vakakina na lialia ki na nona lialia.

¹²O sa raica mada e dua na tamata sa dodonu ga vua na rai ni matana? Ena levu cake na ka e nuitaka na tamata lialia mai vei koya.

¹³Sa tukuna na tamata vucesa, "Sa tiko e dua na laioni e gaunisala. E dua na laioni cudrucudru sa tiko ena salatu!"

¹⁴Me vaka na kena veitosoyaki na katuba, Sa vaka kina na vucesa ena nona i mocemoce.

¹⁵Na tamata vucesa sa tonia kece na ligana ki na loma ni tere kakana, ka sa qai vakaleqai koya ena nona biuta e gusuna.

¹⁶Na tamata vucesa sa vuku ga e matana mai vei ira e lewe vitu na gusu matau.

¹⁷Na tamata somisise ka siosio sa vaka ga e dua sa taura cake na koli e daligana.

¹⁸Me vaka e dua na tamata lialia sa veiviri ena bukawaqa, moto, kei na mate,

¹⁹Sa iko oqo na tamata sa vakaisina na wekana, ka qai tukuna, " Au a qito tiko ga!"

²⁰Ni sa sega na kau, sa boko na buka; Ni sa sega na dau vakauvosa, sa oti na veivala.

²¹Me vaka na qilaiso kina koala waqa kei na kau kina yameyame, sa vaka kina na tamata dau vakatubu ca sa vakawaqara na veileti.

²²Na nona vosa na dauvakauvosa sa gasagasa me vaka na ka wale, ka sa curuma sara ga na lomada.

²³Na tebenigusu dauveitemaki sa lako mai na yalo e ca, sa vaka nai bulibuli qele, sa boro ena wai siliva.

²⁴O koya sa yalo ca ka sa qai ubia ena gusuna, Sa binia tiko ga vua na veivakaisini;

²⁵Ni sa vosa mai vakavinaka, kua ni vakabauta Ni sa vitu tale na ka ca sa tu e lomana;

²⁶E dina ni sa ubia na yalona ca na veivakaisini, Na nona caka ca ena sereki e matadra na tamata kecega.

²⁷O koya sa kelia na qara ena lutu ga kina. O koya sa vakaqiqica na vatu ena qiqici koya lesu tale na vatu.

²⁸Na yame lasulasu sa cati ira, o ira sa lasutaki oti, Kei na gusu veicavilaki sa veivakarusai.