[19] Same 102

¹Mo Ni rogoca na noqu masu Jiova, na noqu tagi me lako yani vei Kemuni.

²Mo Ni kua ni vunitaki Kemuni mai vei au ena siga ni noqu rarawa; mo Ni vakarorogo mai ena siga au kaci yani kina, mo Ni rogoci au mai vakatotolo.

³Na noqu veisiga sa vesuki oti me vaka na kubou, Na noqu sui kece sa kama oti me vaka na matadravu,

⁴Sa valuti oti na yaloqu ka sa vaka na co sa malai mai, au sa guilecava kina me'u kania na kequ madrai.

⁵Sa rui rogo levu na noqu vutugu, sa lili tiko na suiqu ena kuliqu.

⁶Au sa vaka na belo ena vanua lala, sa vaka talega na lulu ena vanua mamaca.

⁷Au sa davo ka yadra tiko, sa vaka na kakabace ena dela ni vale.

⁸Era sa torovi au mai na meca ena siga taucoko, o ira na dauveibutakoci, era sa yalayala mera caka ca vei au.

⁹Au sa kania tiko na dravusa me vaka na madrai. Sa veiwaki na mequ gunu vata kei na wai ni mata,

¹⁰Baleta na Nomuni rarawataka na ca kei na Nomuni cudru katakata, o Ni sa laveti au ka viritaki au tani.

¹¹Na noqu veisiga sa vaka na yaloyalo sa vakabalavutaki ka sa malai tani me vaka na co.

¹²Oi Kemuni Jiova sa tudei ka sega ni mudu, kei na nanumi ni yacamuni ki nai taba tamata kecega.

¹³Mo Ni tucake ka yalololoma vei Saioni; ni sa kena gauna me tokoni ka totaki, Io, sa kena gauna sara ga oqo.

¹⁴O ira na Nomuni tamata era sa marautaka na kena veivatu, ka ra sa tokona na kena kuvu ni soso.

¹⁵Me ra rerevaka kina na Yaca i Jiova na veimatanitu, kei ira kece na tui ni veivanua mera rerevaka na Nomuni Ukuuku.

¹⁶O Jiova ena tarai Saioni cake tale. O Saioni ena basika ena i Ukuuku i Jiova.

¹⁷Ena rogoca o Koya na nodra masu na dravudravua, ena sega ni vakawaletaka na nodra masu.

¹⁸Oqo ena volai tu me baleti ira nai taba tamata ena muri mai, me ra vakacerecerea kina na Kalou, o ira nai taba tamata era na qai basika mai.

¹⁹Ni sa rai sobu mai o Koya mai na dela ni nona Vale Tabu, mai Lomalagi sa vakaraici vuravura sobu mai na Kalou,

²⁰Me rogoca na domodra na kaivesu sa vutugu tiko, me ra sereki o ira sa lesi oti tu me ra vakamatei,

²¹Me kacivaki yani na Yaca i Jiova e Saioni kei na nona vakacaucautaki e Jerusalemi,

²²Ni ra sa vakasoqoni mai o ira na tamata kei ira na veimatanitu me ra qaravi Jiova.

²³Sa vakamalumalumutaka o Koya na noqu kaukauwa ena sala, sa vakalekalekataka na noqu veisiga.

²⁴Au sa tukuna kina, "Na Noqu Kalou, me'u kakua ni kautani mai na loma ni noqu veisiga. Na Nomuni veiyabaki sa yacova nai taba tamata kecega.

²⁵Mai liu sara o Ni sa biuta na yavu kei vuravura, kei na lomalagi sa cakacaka ga ni Ligamuni.

²⁶Era na rusa kece, Ia oi Kemuni o Ni na tudei ga, na ka kece era na qase mai me vaka nai sulu, o Ni na veisautaki ira, era na qai veisau.

²⁷O Ni sai Koya koya tikoga, na Nomuni veiyabaki ena sega ni oti.

²⁸Na luvedra na Nomuni tamata era na vakakuria kei ira na nodra kawa ena vakadeitaki e Matamuni."