[19] Same 103

¹Vakacaucautaki Jiova, na yaloqu, kei na ka kecega sa tu e lomamu, mo vakacaucautaka na Yacana Tabu!

²Vakacaucautaki Jiova, na yaloqu, kakua ni guilecava na ka vivinaka kecega sa cakava vei iko o Koya:

³Sa vosota na nomu caka cala kecega, Sa vakabulai iko mai na kemu mate kecega,

⁴Sa vakabulai iko mai na veivakarusai, Sa vakaisalataki iko ena yalovinaka kei na Nona yalololoma kecega,

⁵Sa vakamamautaka na gusumu ena ka vinaka kecega, o koya oqo sa vakavoutaki tale kina na nomu tubu cake me vaka na ikeli.

⁶Sa cakava na ka dodonu o Jiova kei na lewa dodonu vei ira sa vakabobulataki.

⁷Sa vakatakila vei Mosese na Nona sala, kei na Nonai valavala vei ira na luvei Isireli.

⁸O Jiova sa rui yalololoma ka yalovinaka ka sa cudru vakamalua, sa levu na Nona yalololoma.

⁹Ena sega ni veivala tiko vata kei keda, se cudruvi keda tiko me sega ni mudu.

¹⁰Sa sega ni cakacaka vei keda me vaka na noda i valavala ca, se vunauci keda me vaka na noda caka cala.

¹¹Me vaka sa rui cecere o lomalagi mai ki vuravura, sa vaka kina na Nona yalololoma vei ira sa rerevaki Koya;

¹²Me vaka mai nai cabecabe ki nai dromudromu sa vaka kina, na Nona vakayawataka na noda caka cala mai vei keda.

¹³Me vaka sa lomana na luvena e dua na tama, sa lomani ira vakakina o ira sa rerevaki Koya.

¹⁴Sa kila vinaka o Koya na keda i bulibuli Sa kila o koya ni da sa kuvu ni soso ga.

¹⁵Io, na tamata, na nona siga sa vaka ga na veisiga ni co; sa vaka ga na vei senikau ni vanua, era seraka tu.

¹⁶Sa liwa ga yani na cagi, sa yali tale, Sa guilecavi tale na vanua e toka kina.

¹⁷Ia, na yalololoma i Jiova sa ka mai na sega ni mudu ki na sega ni mudu ki vei ira sa rerevaki Koya, kei na Nona yalododonu vei ira na luvedra na luvedra,

¹⁸Vei ira sa maroroya na Nona veiyalayalati, Vei ira talega sa nanuma ka cakava sara na Nona i vakaro.

¹⁹O Jiova sa vakadeitaka na Nona i tikotiko Vakaturaga mai lomalagi, na Nona matanitu sa veiliutaki ena ka kecega.

²⁰Dou vakacaucautaki Jiova, oi kemudou na Nona agilosi, oi kemudou sa levu sara na nomudou kaukauwa, dou sa muria na Nona vosa, dou sa vakaio kina domo ni Nona vosa.

²¹Dou vakacaucautaki Jiova, oi kemudou na Nona soqoni levu, kemudou na Nona daucakacaka, oi kemudou sa dau vakalomavinakataki koya.

²²Mo ni vakacaucautaki Jiova, oi kemuni kece na Nona cakacaka ena vanua kecega ni Nona matanitu. Na yaloqu mo vakacaucautaki Jiova!