[19] Same 107

¹Mo vakavinavinaka vei Jiova, ni sa rui vinaka o Koya! Na Nona yalololoma sa tudei ka sega ni mudu.

²Me ra tukuna na veivakabula i Jiova, o ira sa vakabulai ira mai na liga ni meca,

³O ira sa vakasoqoni vata mai ki na vanua, mai na Tokalau ki na Ra, mai na Vualiku talega ki na Ceva.

⁴E ra sa vakasaqaqara ena vanua liwa; era sa sega ni kunea e dua na koro me ra tiko kina.

⁵Era viakana ka viagunu, sa ciba na yalodra e lomadra.

⁶Era sa tagi vua na Kalou ena nodra rarawa, Sa vakabulai ira mai na nodra dredre.

⁷Sa qai liutaki ira vakadodonu ena sala me ra lako ki na koro me ra tiko kina.

⁸Me ra vakavinavinaka kina vei Jiova o ira na tamata ena vuku ni Nona vinaka, Kei na Nona cakacaka vinaka, vei ira na luve ni tamata!

⁹Ni sa sotava na yalo sa gagadre tiko, Ka vakatawa na yalo sa viakania tiko na veika vivinaka.

¹⁰O ira sa tiko ena butobuto, ena yaloyalo ni mate, ka vesuki vakararawa ena senidodo.

¹¹Baleta ni ra vuki tani, mai na vosa ni Kalou, ka bese ni muria na Nona i vakasala o Koya sa cecere saraO

¹²O koya oqo, sa vakabobulataka na yalodra ena oca ni cakacaka. Era sa bale sobu ka sa sega e dua me veivuke.

¹³Era sa qai kaci vua na Kalou ena nodra rarawa. Sa qai vakabulai ira ena nodra leqa.

¹⁴Sa kauti ira tani mai na butobuto kei na i yaloyalo ni mate sa musuka na kedra i vesu vakalalai.

¹⁵Me vakavinavinaka kina na tamata vei Jiova ena vuku ni Nona vinaka kei na Nona cakacaka vinaka vei ira na luve ni tamata!

¹⁶O Jiova sa basuka na matamata varasa, ka taya rua na bai kaukamea.

¹⁷Era sa lialia ena vuku ni nodra talaidredre, era sa vakacacani ena vuku ni nodra ka vakasisila.

¹⁸Na yalodra sa gadreva na kakana kecega, ka sa kauti ira voleka ga ki na matamata ni mate.

¹⁹Era sa qai tagi vei Jiova mai na nodra rarawa, sa qai vakabulai ira o Koya mai na nodra leqa kecega.

²⁰Sa tala na Nona vosa, ka sa vakabulai ira ka vakagalalataki ira mai na veivakarusai.

²¹Me ra vakavinavinaka kina na tamata vei Jiova ena vuku ni Nona vinaka kei na Nona cakacaka vinaka vei ira na luve ni tamata!

²²Me ra vakacabora nai soro ni vakavinavinaka, ka tukuna na vinaka ni Nona cakacaka vinaka ena reki vakaidina.

²³O ira sa veilakoyaki ena waqa, ka caka bisinisi ena wasawasa levu,

²⁴Era sa raica na cakacaka i Jiova kei na Nona vinaka ena vanua titobu.

²⁵Sa vakarota me tubu mai na cagi kaukauwa, me vakatubura mai na ua ni wasawasa.

²⁶Era tubu cake ki lomalagi, era lako sobu tale ki na titobu; sa waicala na yalodra baleta na nodra leqa.

²⁷Era lako vaka ka vaka, ena ceba me vaka na tagane mateni, era sa yacova sara na kenai yacoyaco.

²⁸Era sa qai tagi vei Jiova mai na nodra leqa, sa qai kauti ira tani mai na nodra leqa o Koya.

²⁹Sa vakamaravutaka na cagi, me sa malumu kina na kena ua.

³⁰Era sa qai marau baleta ni ra sa tiko malua; Sa qai tuberi ira o Koya ki na vanua era sa gadreva.

³¹Io, me ra vakavinavinaka kina vei Jiova o ira na tamata, ena vuku ni Nona vinaka, kei na totoka ni Nona cakacaka!

³²Me ra laveti Koya talega ena i soqosoqo levu ni tamata, ka vakacerecerei Koya ena nodra soqoni vata na qase.

³³Sa vukica o Koya na veiuciwai me vanua dravuisiga, kei na veimataniwai me vanua mamaca;

³⁴Na vanua vuavuai me vanua lala ena vukudra na vakasisila sa tiko kina.

³⁵Sa vukica tale na vanua dravuisiga, me sinai kina na wai, kei na vanua mamaca me mata ni wai vinaka.

³⁶Sa biuti ira kina na via kana me ra tiko kina. Ka tara e dua na koro me nodra i tikotiko,

³⁷Me ra kakaburaki ka tea na were ni vaini, me vuavuai kina na tamamusuki.

³⁸Sa vakasaututaki ira, ka vakalewevuqataki ira sara; sa sega ni vakatara me lailai na kena manumanu.

³⁹Ni ra sa vakalewelailaitaki ka vakalolovirataki ena veivakasaurarataki, veivakamavoataki kei na rarawa,

⁴⁰Sa sova na beci vei ira na kena cauravou, ka vakavuna na nodra veilakoyaki ka sese voli ena lekutu;

⁴¹Io, sa vakatikori ira e cake na dravudravua, me ra yawa mai na veika rarawa, ka sa vakayacori ira na veiwekani mera lako vata.

⁴²E ra sa raica o ira na yalododonu, ka ra sa marau, era sa galu ga na tamata vakasisila.

⁴³O ira sa yalomatua, era na vakaraica na ka oqo, ka era na kila deivaki ni sa yalovinaka o Jiova.