[19] Same 108

¹Na Kalou, na yaloqu sa dei tiko: Au na sere ka vakavinavinaka tiko, io, ena noqu i ukuuku.

²Dou yadra mai, na soliteri, na api! Au na vakayadrata na kida ni mataka.

³Au na vakacerecerei kemuni Jiova, ena kedra maliwa na tamata, au na seretaka na vakavinavinaka vei Kemuni ena kedra maliwa na veimatanitu.

⁴Na Nomuni yalololoma sa rui cecere ka sivia sara na lomalagi, na Nomuni dina sa sivia sara na vei o.

⁵O Ni sa cecere Jiova, sa sivia na lomalagi. Na Nomuni ukuuku sa uasivia na vuravura;

⁶Me rawa ni vakagalalataki na Nomuni daulomani Mo Ni rogoci au, na Ligamuni i matau me ia tiko na veivakabulai.

⁷Sa vosa na Kalou ena Nona savasava Tabu; "Au na reki tikoga; Au na wasei Sikeni, Au na vakarautaka na Buca mai Sakoca.

⁸Sa Noqu o Kiliati; Sa Noqu o Manasa; O Efereimi nai sala ni Uluqu; O Juta sa dau solia na Noqu lewa.

⁹O Moapi sa dau savata na Noqu kuro; Kei Itomi me raica na Noqu i vava; Au na qaqa ena vuku i Filisitia."

¹⁰O cei ena kauti Au ki na koro kaukauwa? O cei ena liutaki Au ki Itomi?

¹¹Sa sega beka ni Oi Kemuni ga, na Kalou? Oi Kemuni ga, na Kalou, sa sega ni lako vata kei ira na mataivalu?

¹²Mo Ni solia vei keimami na veivuke, ni sa ka wale na veivuke ni tamata.

¹³Ena vuku ni Kalou, eda na gugumatua Ni sai Koya ga sa butuki ira sobu na keda meca.