[19] Same 109

¹Mo Ni kakua ni galu tiko, na Kalou ni noqu vakavinavinaka!

²Era sa vosa tiko na tamata vakasisila, Era sa vosa tiko na tamata dauveivakaisini. Era sa vosa vakacacataki au tiko ena yame lasulasu.

³Era sa vakavolivoliti au tiko ena vosa ni veicati, era sa veivala tiko kei au, ni sa sega na vuna.

⁴Mei sau ni noqu loloma, era sa beitaki au, io, au sa soli au tikoga, ki na masu.

⁵O koya oqo, era sa sauma vei au na ca mai na vinaka, na veicati mai na veilomani.

⁶Me lewai koya e dua na tamata ca, Me dua na dauveibeitaki me tu ena yasana i matau.

⁷Ni sa lewai, me kilai ni sa cala, me sa valavala ca tale na nona masu.

⁸Me lekaleka na nona veisiga, ka me dua tale e taura na nona i tutu.

⁹Me ra luveniyali na luvena, ka me sa yada na watina.

¹⁰O ira na luvena, me ra sa gone vakaloloma ka daukerekere; me ra sa dauvakasaqaqara ena vanua sa sega kina.

¹¹Me sa vesuki kece na nona i yaya mai vei ira na dauveivoli, kei ira sa lako tu, me ra tauca na vua ni ka sa oca kina o koya.

¹²Me kua ni dua e solia na loloma vei koya se me dua e totaki ira na luvena era luveni yali.

¹³Me ra musuki tani na nona kawa, mai na veitabatamata kecega ka me bokoci tani talega na yacadra.

¹⁴Me nanuma tikoga o Jiova na nodra caka cala kece na nodra qase, nai valavala ca talega nei tinana me kua ni boko laivi.

¹⁵Me ra sa tiko ga ena matai Jiova, ka me sa tagutuva vakadua o Koya na kena vakanananu e delai vuravura;

¹⁶Baleta ni sa sega ni vinakata me vakaraitaka na yalololoma, ia, sa vakasaurarataki ira ga na dravudravua kei na vakaloloma, me yacova mada ga na nodra vakamatei na yalomalumalumu.

¹⁷Me vaka ni sa rekitaka o koya na ruru me lako tale mai vei koya; ni sa sega ni rekitaka nai veivakalouvinakataki, io, me sa ka e yawa sara mai vua.

¹⁸Ni sa vakaisulutaki koya ena ruru me vaka na kote, io, me sa curuma na yagona me vaka na wai, io, me vaka na waiwai ki na nona sui.

¹⁹Me vakakina vei koya, me vaka na kote sa ubi koya taucoko, me vakatalega na beleti sa vesuki koya dina tiko ga.

²⁰Me sai koya oqo na Nona veisausaumi o Jiova vei ira sa dau ruru vei au, kei ira sa dau vosavosa ca vei au.

²¹Ia, vei Kemuni na Kalou o Jiova, mo Ni cakacaka vei au ena vuku ni Yacamuni; sa rui vinaka na Nomuni yalololoma, mo Ni sereki au.

²²Au sa rui dravudravua ka vakaloloma, Sa mavoa tiko na yaloqu e lomaqu.

²³Au sa yali me vaka e dua nai yaloyalo ni tamata ni sa kala na siga: au sa cagina yani me vaka na vodre.

²⁴Sa malumalumu na duruqu ena lolo, ka'u sa lila mai.

²⁵Au sa vakalialiai mai vei ira sa raici au, era sa kuretaka na uludra.

²⁶Mo Ni vukei au Jiova na Noqu Kalou! Mo Ni vakabulai au me vaka na Nomuni yalololoma,

²⁷Me ra kila, ni sa cakacaka tiko oqo na ligamuni “ ni sai Kemuni Jiova sa cakava oqo!

²⁸Me ra ruru o ira, ia oi Kemuni Mo ni veivakalouvinakataki; ni ra sa tucake, me ra kune madua, ia, me reki tiko ga na Nomuni tamata.

²⁹O ira sa beitaki au tiko, me ra vakaisulu ena madua, me ra sa vakaisulutaki ira ena ka beci, me vaka na salusalu.

³⁰Na gusuqu ena vakavinavinaka tiko ga vakalevu vei Jiova, io, au na vakavinavinaka tikoga vua ena kedra maliwa na lewevuqa.

³¹E na tucake tu o Koya ena ligana i matau na dravudravua. Me Vakabulai koya.