[19] Same 118

¹Me vakavinavinakataki o Jiova, ni sa vinaka o Koya! Kei na Nona yalololoma sa tudei ka Sega ni mudu.

²Me ra tukuna tikoga na Isireli, "Ni sa tudei ka sega ni mudu na Nona yalololoma."

³Me ra tukuna tikoga na vale nei Eroni, "Ni sa tudei ka sega ni mudu na Nona yalololoma."

⁴Me ra tukuna o ira sa rerevaki Jiova, "Ni sa tudei ka sega ni mudu na Nona yalololoma."

⁵Au a kacivi Jiova ena gauna dredre, sa rogoci au o Jiova, ka sa vakadaberi au ena vanua vinaka.

⁶Sa totaki au o Jiova, au na sega ni rere, Na cava ena rawa ni cakava vei au na tamata?

⁷Na Kalou sa tiko ena kedra maliwa sa dau vukei au; o koya oqo au na raica na ka au gadreva vei ira sa cati au.

⁸Sa vinaka na vakararavi vei Jiova, ka ca vei ira na tamata.

⁹Sa vinaka na vakararavi vei Jiova, ka ca, vei ira na ravouvou.

¹⁰E ra sa vakavolivoliti au na veimatanitu, ia, ena Yaca i Jiova, au na vakarusai ira.

¹¹E ra sa vakavolivoliti au, io, era sa vakavolivoliti au, io, ena Yaca i Jiova, au na vakarusai ira.

¹²E ra sa vakavolivoliti au me vaka na oni era sa vakayali me vaka sa kama na vei co; ena Yaca i Jiova, au sa vakarusai ira kina.

¹³Au sa biligi vakaukauwa, me'u bale kina, Ia, o Jiova sa vukei au.

¹⁴O Jiova sa noqu kaukauwa, ka noqu sere talega, Ka sa yaco me noqu i vakabula.

¹⁵Na domo ni reki kei na bula sa tiko ena nodra vale laca na yalododonu; na Liga Matau i Jiova sa cakacaka vakadodonu tiko.

¹⁶Sa laveti na Liga i Matau i Jiova, na Liga i Jiova sa cakacaka vakadoudou tiko.

¹⁷Au na sega ni mate, au na bula tikoga, Au na tukuna na cakacaka i Jiova.

¹⁸Sa vakavulici au vakararawa o Jiova, ia sa sega ga ni soli au ki na mate.

¹⁹Dolava vei au na matamata ni yalododonu; Au na curu kina, au na vakavinavinaka vei Jiova.

²⁰Oqo na matamata i Jiova, era na curu kina na tamata yalododonu.

²¹Au na vakavinavinaka vei Kemuni, ni sai Kemuni ga sa rogoci au mai, ka o Ni sa noqu i vakabula.

²²NA VATU ERA A CATA NA MATAI NI VALE, SA YACO MEI VAKADEI ENA TUTU NI VALE.

²³Oqo na ka ga e cakava o Jiova, ka sa rui vakaqoroqoroi e matada.

²⁴Oqo na siga sa bulia o Jiova, eda na reki ka marau kina.

²⁵I Jiova, Mo Ni veivakabulai oqo, au kerea, I Jiova, Mo Ni veivakasaututaki oqo, au kerea.

²⁶Sa kalouvinaka o koya sa lako mai ena yaca i Jiova! Keimami sa vakalouvinakataki iko mai na vale i Jiova.

²⁷Sa Kalou o Jiova, sa solia vei keda na rarama, dou vauca na i soro ena dali, ena tutu e cake ni cabocabo ni soro.

²⁸Sai Kemuni na noqu Kalou, au na vakavinavinaka vei Kemuni; sai Kemuni na noqu Kalou, au na vakacerecerei Kemuni.

²⁹Solia na vakavinavinaka vei Jiova, ni sa vinaka ga o Koya! "Ni sa sega talega ni mudu na Nona loloma."