[19] Same 119

¹Sa kalouvinaka o ira sa sega ni cala ena sala, ni ra sa lako tiko ena vunau i Jiova!

²Sa kalouvinaka o ira sa maroroya na Nona vosa, ka qarai Koya ena yalodra taucoko!

³Era sa sega ni cakava e dua na ka ca; ni ra sa lako tiko ena Nona sala.

⁴O Ni sa vakaroti keimami, me keimami maroroya na Nomuni lesilesi.

⁵Me vakadodonutaki mada na noqu i lakolako me'u maroroya kina na Nomuni lesilesi!

⁶Au na sega ni madua kina, ni'u sa vakaraica kece na Nomuni vakaro.

⁷Au na vakacerecerei Kemuni ena yalo e dodonu sara, ni'u sa vulica na dodonu ni Nomuni vakatulewa.

⁸Au na maroroya na Nomuni lesilesi; Mo ni kakua ni biuti au laivi!

⁹Me vakasavasavataka vakacava na nona sala e dua na gonetagane? Ni sa qarauni koya me maroroya na Nomuni vosa.

¹⁰Au sa qarai kemuni ena yaloqu taucoko, io, me'u sa kakua ga ni lako tani mai na Nomuni Vakaro!

¹¹Na Nomuni vosa au sa vunia ki na lomaqu, me'u kua ni valavala ca kina vei Kemuni.

¹²Mo Ni vakacaucautaki Jiova! Mo Ni vakavulica vei au na Nomuni lesilesi.

¹³Ena tebenigusuqu au sa tukuna oti na veika kece sa lewa na Gusumuni.

¹⁴Au sa reki tiko e nai valavala ni Nomuni lesilesi, me vaka sa tu vei au nai yau kecega.

¹⁵Au na vakanananu ki na Nomuni vosa ka na sega ni vakaqitora na Nomuni sala.

¹⁶Au na vakamarautaki au ena Nomuni lesilesi; au na sega ni guilecava na Nomuni vosa.

¹⁷Mo ni caka vinaka vua na Nomuni tamata, me'u bula kina ka maroroya na Nomuni vosa.

¹⁸Mo ni dolava na mataqu me'u raica rawa kina na veika veivakurabuitaki sa tu ena Nomuni vunau.

¹⁹Au sa rui vulagi ena vuravura oqo, Mo ni kakua ni vunitaka vei au na Nomuni veivakaro.

²⁰Na yaloqu sa kavoro ena gadreva DINA, ena veigauna kecega, na Nomuni lewa dodonu.

²¹Mo Ni vunauci ira na dokadoka kei ira sa rukaki oti, o ira sa lako sese mai na Nomuni vakaro.

²²Mo Ni kauta tani vei au na veivakalialiai kei na veibeci, ni'u sa maroroya tiko na Nomuni tukutuku.

²³O ira na turaga lalai era sa dabe ka vosacataki au; ia, na Nomuni tamata, sa vakanananu tu ga ki na Nomuni vakaro.

²⁴Na Nomuni tukutuku sa vu ni noqu marau. Ka sa noqu daunivakasala talega.

²⁵Na yaloqu sa kabita na kuvunisoso; Mo ni vakabulabulataki au me vaka na Nomuni vosa.

²⁶Au sa vakaraitaka na noqui lakolako, ka o Ni sa sauma vei au; Mo Ni vakavulica vei au na Nomuni lesilesi.

²⁷Mo Ni vakavulici au me'u kila vinaka na Nomuni vunau; me'u dau vakanananu tu ki na talei ni Nomuni cakacaka.

²⁸Sa waicala na yaloqu ena vuku ni colacola bibi; Mo Ni vakaukauwataki au me vaka na Nomuni vosa.

²⁹Mo Ni kauta tani vei au nai valavala ni lasulasu, ka dolava vei au vakayalovinaka na Nomuni vunau.

³⁰Au sa digitaka na sala ni dina; na Nomuni lewa dodonu, au sa biuta tu oqo e mataqu.

³¹Au sa kabita na Nomuni tukutuku; I Jiova, mo ni kakua ni vakamaduataki au!

³²Au na ciciva na sala ni Nomuni vakaro, ni oi Kemuni sa na vakalevutaka ga na yaloqu.

³³Mo Ni vakavulica vei au Jiova nai valavala ni Nomuni lesilesi, me'u maroroya kina me yacova nai vakataotioti.

³⁴Mo Ni solia vei au na kila vinaka, au na qai maroroya kina vaka vinaka na Nomuni vunau; io, au na muria e yaloqu taucoko.

³⁵Mo Ni bulia vei au na sala me'u lako voli kina ena Nomuni vakaro, ni'u sa rui taleitaka vakalevu.

³⁶Mo Ni vakota na yaloqu ki na Nomuni tukutuku, ka me kakua ki na kocokoco.

³⁷Mo Ni vukica tani na mataqu me kakua ni raica tiko na veika e sega ni yaga, ka vakabulabulataki au ga ki na Nomuni sala.

³⁸Mo Ni vakadeitaka na Nomuni vosa vua na Nomuni tamata, ni sa musuki koya oti tu ki na rerevaki Kemuni.

³⁹Mo Ni kauta tani na kequ i rogorogo ca ni'u sa sega ni taleitaka, ni sa dina ga na Nomuni lewa dodonu.

⁴⁰Mo Ni kila, ni'u sa gadreva dina na Nomuni vakavuvuli; mo Ni vakabulabulataki au me vaka na Nomuni yalododonu.

⁴¹Me lako talega mai vei au na Nomuni yalololoma JiovaOna Nomuni veivakabulai me vaka na Nomuni vosa.

⁴²Me dua kina na i sau ni taro vua sa dauveivakalialiai vei au, Ni'u sa vakararavi ki na Nomuni vosa.

⁴³Mo Ni kua nai kauta tani na vosa dina mai na gusuqu, ni'u sa vakanuinui tiko ki na Nomuni vakaro.

⁴⁴Au na maroroya tikotikoga na Nomuni vunau me sega ni mudu.

⁴⁵Au na lako ena galala, ni'u sa vakasaqara tiko ga na Nomuni vunau.

⁴⁶Au na tukuna tikoga na Nomuni tukutuku ena matadra na tui, ka'u na sega ni madua kina.

⁴⁷Au na vakamarautaki au ena Nomuni vakaro, o koya au sa dau lomana.

⁴⁸Au na laveta cake na ligaqu ki na Nomuni vakaro, o koya au sa dau lomana, Au na vakanananu tu ga ki na Nomuni lesilesi.

⁴⁹Mo ni nanuma na vosa ni Nomuni tamata, o koya o ni sa vakavuna kina vei au na vakanuinui.

⁵⁰Oqo na noqu vakacegui ena gauna ni rarawa, ni Nomuni vosa sa solia vei au na bula.

⁵¹O ira na dokadoka era sa vakavuna na noqu dau vakalialiai, ia, au sa dau sega ni vuki tani mai na Nomuni vunau.

⁵²Au sa dau nanuma na Nomuni lewa dodonu mai liu sara, i Jiova, oqo ga au sa dau vakacegui au kina.

⁵³Sa tarai au na taqaya, ni ra sa sega ni via muria na Nomuni vunau na tamata ca.

⁵⁴Sa dau noqu sere na Nomuni lesilesi, ena loma ni vale au sa vulagi kina.

⁵⁵Ena veibogi au sa dau nanuma na Yacamuni Jiova, au dau maroroya ga na Nomuni vunau.

⁵⁶Sa noqu tiko oqo, baleta ni'u sa maroroya na Nomuni vunau.

⁵⁷I Jiova, Oi Kemuni sa noqu i votavota; au sa tukuna oti, ni'u na maroroya na Nomuni vosa.

⁵⁸Au sa masuta na Nomuni veitokoni ena yaloqu taucoko; Mo Ni yalololoma vei au me vaka na Nomuni vosa.

⁵⁹Au sa dau vakananuma na noqu i lakolako, au sa vakagolea ga na yavaqu ki na Nomuni tukutuku.

⁶⁰Au sa vakatotolo ka sega ni vakaberabera me'u maroroya ga na Nomuni vakaro.

⁶¹Na kedra i vesu nai valavala ca sa vauci au, au sa sega ga ni guilecava na Nomuni vunau.

⁶²Ena lomaloma ni bogi, au na tucake ka vakavinavinaka vei Kemuni, ena vuku ga ni Nomuni lewa dodonu.

⁶³Au sa nodra i tokani, o ira kecega sa rerevaki Kemuni, kei ira era sa dau maroroya na Nomuni vakavuvuli.

⁶⁴Sa sinai o vuravura ena Nomuni loloma, Jiova; Mo Ni vakavulica vei au na Nomuni lesilesi.

⁶⁵O Ni sa caka vinaka vua na Nomuni tamata, I Jiova, me vaka na Nomuni vosa.

⁶⁶Mo Ni vakavulica vei au na lewa vinaka kei na kila ka, ni'u sa vakabauta na Nomuni vakaro.

⁶⁷Ni se bera ni dau tarai au na dredre ni bula, au sa dau lewalewai au tu ga, oqo au sa qai maroroya na Nomuni vosa.

⁶⁸O Ni sa rui vinaka ka dau caka vinaka, Mo Ni vakavulica vei au na nomuni tukutuku

⁶⁹O ira na dokadoka era sa tukuna na lasu me baleti au. Ia, au na maroroya na Nomuni vakaro ena yaloqu taucoko.

⁷⁰O ira sa urouro na yalodra, ia, oi au, au sa taleitaka ga na Nomuni vakaro.

⁷¹Sa yaga ka vinaka me tarai au na dredre ni bula, me rawa ni'u vulica kina na Nomuni lewa dodonu.

⁷²Nai vunau mai na Gusumuni e vinaka cake vei au mai na dua na udolu na tikini koula kei na siliva.

⁷³Na Ligamuni sa buli au ka tuli au, Mo Ni solia vei au na loma kasa, me'u vulica kina na Nomuni vakaro.

⁷⁴O ira sa rerevaki kemuni era na marau ni raici au, baleta ni'u sa nuitaka tikoga na Nomuni vosa.

⁷⁵I Jiova, au sa kila ni sa dodonu dina ga na Nomuni lewa, kei na Nomuni dau dina o Ni sa vakatovolei au kina ena ka rarawa.

⁷⁶Na Nomuni yalololoma kei na Nomuni yalovinaka sa yaco me'u vinaka kina, me vaka na Nomuni vosa vua na Nomuni tamata.

⁷⁷Me lako mai vei au na Nomuni yalololoma dina, me'u bula kina; Ni'u sa rui taleitaka dina na Nomuni vunau.

⁷⁸Me ra vakamaduataki na daubeitaki au vakailasu ka cala talega; au sa dau vakanananu tu ga ki na Nomuni vakaro.

⁷⁹O ira sa rerevaki Kemuni, me ra gole mai vei au, o ira sa kila na Nomuni tukutuku.

⁸⁰Me sa sega ni cala na yaloqu me vaka na Nomuni lesilesi, me'u kua ni madua kina.

⁸¹Sa malumalumu na lomaqu ki na Nomuni veivakabulai, ia au sa vakanananu tu ga ki na Nomuni vosa.

⁸²Na mataqu sa malumu mai ni vakasaqara tiko na Nomuni vosa, au sa taroga kina, ni naica o Ni na vakacegui au kina?"

⁸³Au sa vaka na taga ni waini ena kubou ni kama, ia, au sa sega ga ni guilecava na Nomuni lesilesi.

⁸⁴Sa vo beka e vica na veisiga ni Nomuni tamata? O Ni na vakayacora na Nomuni vosa vei ira sa vakacacani au?

⁸⁵O ira na dokadoka era sa kelia na kequ qara, oqori sa sega ni vaka nai vunau.

⁸⁶Na Nomuni vakaro kecega sa dau dina; o ira oqo era sa vakacacani au vakailasu; Mo ni vukei au!

⁸⁷Sa voleka sara ni ra vakaoti au mai vuravura, raica, au na sega ga ni lako tani mai na Nomuni vakasala.

⁸⁸Mo Ni vakabulabulataki au me vaka na Nomuni yalololoma vakaidina, me rawa ni'u maroroya tiko ga kina nai tukutuku mai na Gusumuni.

⁸⁹Sa tudei ka sega ni mudu Jiova, sa vakadeitaki mai lomalagi na Nomuni vosa.

⁹⁰Na Nomuni dau dina sa tudei ki nai tabatamata kecega; o Ni sa tauyavutaki vuravura ka sa vakarorogo.

⁹¹Era sa vakarorogo tikoga me vaka na Nomuni veivakaroti, era sa Nomuni dauveiqaravi kecega.

⁹²Baleta ga ni'u sa rui taleitaka na Nomuni vunau, e dodonu me'u a sa rusa sara ena noqu vakararawataki.

⁹³Au na sega ni guilecava na Nomuni vakaro, ni Kemuni a solia kina vei au na bula.

⁹⁴Au sa Nomuni, mo Ni vakabulai au, ni'u sa vakasaqara na Nomuni vunau.

⁹⁵Era sa waraki au na tamata ca me ra vakarusai au, ia au sa nanuma ga na Nomuni tukutuku.

⁹⁶Au sa raica na vakataudeitaki ni veika kece e taucoko, ia, na Nomuni vakaro sa uasivia na veika kece.

⁹⁷Au sa lomana dina na Nomuni vunau! Sa dau noqu vakanananu ena siga taucoko.

⁹⁸Oi Kemuni, ena Nomuni vakaro, sa vakavuna na noqu yalomatua cake mai vei ira na meca, Ni ra sa tiko ga kei au.

⁹⁹Sa levu na noqu kila vinaka sara mai vei ira kece na qasenivuli; baleta na Nomuni tukutuku sa veika ga au dau vakanananu kina.

¹⁰⁰Au sa kila na veika sa oti, na veika mai liu sara, baleta ni'u sa maroroya tikoga na Nomuni tukutuku.

¹⁰¹Au sa tarova na yavaqu mai na veika kecega e ca, me'u maroroya ga kina na Nomuni vosa.

¹⁰²Au sa sega ni lako tani mai na Nomuni lewa, baleta ni Oi Kemuni ga sa vakavulici au.

¹⁰³Au sa tovolea oti na Nomuni vosa ka sa kamikamica dina, sa kamikamica cake mai na oni ena gusuqu!

¹⁰⁴Mai na Nomuni vosa, au sa rawata kina na kena kilai deivaki na ka; o koya oqo au sa besetaka kina na veika kecega e lasu.

¹⁰⁵Na Nomuni vosa sa cina ki na yavaqu ka sa rarama ki na noqu gaunisala.

¹⁰⁶Au sa yalataka ka vakadeitaka ni'u na maroroya na Nomuni lewa dodonu.

¹⁰⁷Au sa vakararawataki vakalevu; Mo Ni vakabulabulataki au, Jiova, me vaka na Nomuni vosa.

¹⁰⁸I Jiova, Mo Ni ciqoma na vakavinavinaka ni gusuqu, ka Mo Ni vakavulica vei au na Nomuni vunau.

¹⁰⁹Sa tikotiko ga e ligaqu na noqu bula, io, au sa sega ga ni guilecava na Nomuni vunau.

¹¹⁰O ira na tamata ca era sa birika na kequ dai, ia, au sa sega ga ni lako tani mai na Nomuni lesilesi.

¹¹¹Na Nomuni tukutuku au sa taura me noqui votavota me sega ni mudu, ni ra sa ka ni reki dina ki na yaloqu.

¹¹²Au sa nakita e yaloqu me'u vakayacora na Nomuni lesilesi, vakadua me sega ni oti rawa.

¹¹³Au sa cati ira na lomaloma rua, au sa lomana ka taleitaka ga na Nomuni vunau.

¹¹⁴Oi Kemuni na noqu i vunivuni kei na noqu i sasabai; au sa nuitaka na Nomuni vosa.

¹¹⁵Dou lako tani vei au oi kemudou sa dau cakava na ka ca, ni'u na maroroya ga na i vakaro ni Kalou!

¹¹⁶Mo Ni kua ni vakatara me'u madua ena vuku ni veika au sa nuitaka.

¹¹⁷Mo Ni tauri au cake, au na qai taqomaki tiko, au na qai muria tiko na Nomuni lesilesi.

¹¹⁸O Ni sa cati ira kece sa lako tani mai na Nomuni lesilesi, ni nodra ka ni veivakaisini na lasulasu.

¹¹⁹O Ni sa biuti ira tani kece na tamata ca e vuravura me vaka na benu; o koya oqo au sa lomana ga kina na Nomuni tukutuku.

¹²⁰Sa sautanini na lewequ ena vuku ni rerevaki Kemuni, ni'u sa rerevaka na Nomuni lewa dodonu.

¹²¹Au sa cakava na veika e dina ka dodonu; Mo Ni kua ni biuti au tu vei ira na dau veitabaki sobu.

¹²²Mo sai vakadei vei ira na wekamu ka me vakadua sara. Me kua ni ra vakabibitaki Au o ira na dokadoka.

¹²³Na mataqu sa sega ni rawata me vakasaqara tiko na bula mai vei Kemuni kei na Nomuni vosa vakadodonu.

¹²⁴Mo Ni tara na Nomuni tamata me vaka na Nomuni yalololoma, ka vakavulica vei au na Nomuni lesilesi.

¹²⁵Au sa Nomuni tamata, mo Ni solia vei au na loma kasa me'u kila kina na Nomuni tukutuku.

¹²⁶I Jiova, oqo mo ni qai cakacaka, ni ra sa taura na Nomuni vunau me vaka e dua na ka wale.

¹²⁷Au sa lomana na Nomuni vakaro me uasivi mai na koula, io, na koula dina!

¹²⁸Na Nomuni vakaro me baleta na veika kecega, au sa raica ni sa dina ka dodonu; au sa sega ni taleitaka kina na veika kecega sa lasulasu.

¹²⁹Sa rui taleitaki na Nomuni tukutuku; oqo sa vinakata ga kina na yaloqu me maroroya.

¹³⁰Ni sa curu yani na Nomuni vosa, sa solia na rarama; sa solia na kila deivaki vei ira na tamata wale.

¹³¹Au sa dalaga ka cegu mada, ni'u sa gadreva dina na Nomuni vakaro.

¹³²Mo Ni raici au mai ka yalololoma mai, Ni sa Nomuni i valavala mo Ni dau lomani ira sa dau lomana na Yacamuni.

¹³³Mo Ni vakagolea na noqu i kalawa ena Nomuni vosa, me kua ni lewai au kina nai valavala ca.

¹³⁴Mo Ni vakabulai au mai na nodra veivakabobulataki na tamata, me'u maroroya kina na Nomuni vakaro.

¹³⁵Na Matamuni me serau tiko yani vua na Nomuni tamata, Mo ni vakavulica vei au na Nomuni lesilesi.

¹³⁶Na veiuciwai ni wai sa drodro sobu ga mai mataqu baleta ni o ira na tamata era sa sega ni via maroroya na Nomuni vunau.

¹³⁷O Ni sa dodonu sara, Jiova, na Nomuni lewa sa dodonu dina.

¹³⁸Na Nomuni tukutuku, o ni sa vakarota, sa dodonu sara qai dau dina.

¹³⁹Na noqu sasaga sa vesuki au, ni o ira na kequ meca era sa guilecava na Nomuni vosa.

¹⁴⁰Sa savasava sara na Nomuni vosa; na Nomuni tamata sa rui lomana vakalevu.

¹⁴¹Au sa rui lailai ka beci, au sa sega ga ni guilecava na Nomuni vakaro.

¹⁴²Na Nomuni yalododonu, sa dodonu ka sega ni mudu, kei na Nomuni vunau sa ka dina sara.

¹⁴³Na leqa kei na rarawa sa siviti au sara, ia, na Nomuni vakaro sa ka ni reki dina vei au.

¹⁴⁴Na dodonu ni Nomuni tukutuku sa sega ni mudu; Mo Ni solia vei au na kila dina me'u bula kina.

¹⁴⁵Au sa tagi yani ena yaloqu taucoko; Mo ni rogoci au, Jiova! Au na maroroya na Nomuni lesilesi.

¹⁴⁶Au sa tagi yani vei Kemuni; Mo Ni vakabulai au, au na maroroya na Nomuni tukutuku.

¹⁴⁷Au sa duri cake ni bera ni kida na mataka ka tagica na veivuke; au sa nuitaka na Nomuni vosa.

¹⁴⁸Sa yadra tiko na mataqu ena noqu yadrava tiko na bogi, me'u cavuqaqataka tiko kina na Nomuni vosa.

¹⁴⁹Mo Ni rogoca na domoqu me vaka na Nomuni yalololoma. I Jiova mo Ni vakabulabulataki au me vaka na Nomuni lewa dodonu.

¹⁵⁰Era sa toso voleka mai o ira sa muria nai valavala ca; era sa yawa mai na Nomuni vunau.

¹⁵¹O Ni sa rui voleka Jiova, na Nomuni vakaro kece sa dina.

¹⁵²Me baleta na Nomuni tukutuku, au sa kila makawa sara, ni sa i kemuni ga sa tauyavutaka me sega ni mudu.

¹⁵³Mo Ni raica na noqu vakararawataki ka sereki au, ni'u sa sega ni guilecava na Nomuni vunau.

¹⁵⁴Mo Ni nanuma na noqu i lakolako ka vakabulai au; mo Ni vakabulabulataki au me vaka na Nomuni vosa.

¹⁵⁵Na vakabulai sa yawa sara mai vei ira na daucaka ca, ni ra sa sega ni vakasaqara na ka o Ni sa lesia.

¹⁵⁶Sa rui levu na Nomuni yalololoma, Jiova; Mo Ni vakabulabulataki au me vaka na Nomuni lewa dodonu.

¹⁵⁷Sa levu sa daubeitaki au ka ra sa kequ meca talega, au sa sega ga ni gole tani mai na Nomuni tukutuku.

¹⁵⁸Au sa raica na veivakaisini ka'u sa rarawa kina vakalevu, baleta ni ra sa sega ni maroroya na Nomuni vosa.

¹⁵⁹Mo Ni kila mada na levu ni noqu lomana na Nomuni vakaro, mo Ni vakabulabulataki au me vaka na Nomuni loloma levu.

¹⁶⁰Nai soqoni taucoko ni Nomuni vosa na dina, na Nomuni lewa dodonu sa tudei ka sega ni mudu.

¹⁶²Au sa rekitaka na Nomuni vosa, me vaka e dua sa kunea nai yau levu e talei sara.

¹⁶³Au sa besetaka ni maroroya na lasu, Au sa lomana ga na Nomuni vunau.

¹⁶⁴Vakavitu ena dua na siga, au sa dau vakacerecerei Kemuni, baleta na Nomuni lewa dodonu.

¹⁶⁵Na vakacegu levu sa nodra o ira sa dau lomana na Nomuni vunau, ni sa sega na ka e tu me ra tarabe kina.

¹⁶⁶I Jiova, au sa nuitaka ga na Nomuni veivakabulai, ka'u na cakava ga na ka o Ni sa vakarota.

¹⁶⁷Na yaloqu sa maroroya na Nomuni i tukutuku, ka au sa lomana dina sara vakalevu.

¹⁶⁸Au sa maroroya na Nomuni vakaro kei na Nomuni tukutuku, ni sa tu kecega e matamuni na noqu i valavala.

¹⁶⁹Me lako cake yani ki vei Kemuni Jiova na noqui tagi; Mo Ni solia vei au na kila ka me vaka na Nomuni vosa.

¹⁷⁰Me lako cake yani ki vei Kemuni na noqu vakatakerekere; Mo Ni sereki au me vaka na Nomuni vosa.

¹⁷¹Na tebenigusuqu ena vakacerecerei Kemuni, ni Kemuni sa vakavulica vei au na Nomuni lesilesi.

¹⁷²Na yamequ ena tukuna ga na Nomuni vosa, ni sa dodonu kecega na Nomuni vakaro.

¹⁷³Na Ligamuni me sa noqu i vukevuke, ni'u sa digitaka na Nomuni vakaro.

¹⁷⁴Au sa gadreva na bula mai vei Kemuni Jiova, ni'u sa taleitaka na Nomuni vunau.

¹⁷⁵Me bula na yaloqu, ka'u na vakavinavinaka vei Kemuni; me vukei au na Nomuni lewa dodonu.

¹⁷⁶Au sa lako sese me vaka e dua na sipi; Mo Ni vakasaqara na Nomuni tamata, ni'u sa sega ni guilecava na Nomuni vakaro.

¹⁶²¹Era sa vakasaurarataki au na turaga ka sa sega na vuna, ia, na yaloqu sa tu ga ena Nomuni vosa.