[19] Same 135

¹Dou vakavinavinaka vei Jiova, Dou vakavinavinaka ki na Yacana; dou vakavinavinaka Vua, oi kemudou na tamata i Jiova!

²Oi kemudou sa tiko ena vale i Jiova, ena loma ni bai ni vale ni Kalou,

³Dou vakavinavinaka vei Jiova, ni sa rui vinaka o Koya. Dou lagata na vakavinavinaka vei Koya, ki na Yacana talega, ni sa dodonu oqo.

⁴Sa digitaki Jekope o Jiova me Nona, o Isireli me nona i yau talei.

⁵Au sa kila ni sa levu vakaidina o Jiova. Ni sa levu duadua vei ira kecega o Jiova.

⁶Sa cakava o Jiova, na ka ga sa via cakava mai lomalagi, e vuravura, e wasawasa kei na vanua kecega sa titobu.

⁷Sa cakava na kabu me tubu cake ki nai yalayala kei vuravura; sa cakava na livaliva mai na uca; sa kauta mai na cagi mai na Nona lololo.

⁸Sa vakamatei ira na ulumatua mai Ijipita, na luve ni tamata kei na luve ni manumanu.

⁹Sa vakaraitaka nai vakatakilakila mai na nomu vanua Ijipita, vei Fero kei ira na nona tamata.

¹⁰Sa vakadruka na veimatanitu, ka vakamatei ira na kena tuiO

¹¹O Sailo na nodra tui na Amoraiti o Oki na nodra tui na Pasani kei ira kece na matanitu mai Kenani.

¹²Sa solia na nodra qele mei votavota vei Isireli na Nona tamata.

¹³Na Yacamuni i Jiova, sa tudei ka sega ni mudu, Na Kemuni rogorogo Jiova, ki nai taba tamata kecega.

¹⁴Ena lewai ira na Nona tamata o Jiova Ena lomani ira na Nona dauveiqaravi.

¹⁵Na matakau ni veimatanitu sa siliva kei na koula, ka sa cakacaka ga ni liga ni tamata.

¹⁶Era vakagusuna, ia era sa sega ni vosa rawa; Era sa vakamatana, ia era sa sega ni rai rawa;

¹⁷Era sa vakadaligana, ia era sa sega ni rogo rawa; Sa sega talega nai cegu e gusudra.

¹⁸O ira sa buli ira, era sa vakataki ira, sa vaka kina o ira sa vakararavi kina.

¹⁹Dou vakacaucautaki Jiova, oi kemudou na vale i Isireli! Dou vakacaucautaki Jiova, oi kemudou na vale nei Eroni!

²⁰Dou vakacaucautaki Jiova oi kemudou na vale nei Livai! Oi kemudou kece sa rerevaki Jiova, dou vakacaucautaki Koya!

²¹Me vakacaucautaki o Jiova mai Saioni, o koya sa tiko e Jerusalemi! Me vakavinavinakataki o Jiova!