[19] Same 136

¹Dou vakavinavinaka vei Jiova, ni sa rui vinaka o Koya! Ni sa sega ni mudu na Nona yalololoma.

²Dou vakavinavinaka vua na Kalou ni veikalou! Ni sa sega ni mudu na Nona yalololoma.

³Dou vakavinavinaka vei Jiova na Turaga ni veituraga! Ni sa sega ni mudu na Nona yalololoma:

⁴Vei Koya duadua ga sa cakava na ka lelevu, Ni sa sega ni mudu na Nona yalololoma;

⁵Vei koya ena Nona vuku sa bulia kina na lomalagi kei na vuravura, Ni sa sega ni mudu na Nona yalololoma;

⁶Vei Koya sa vakadavora na vanua mamaca ena dela ni wai, ni sa sega ni mudu na Nona yalololoma;

⁷Vei Koya sa cakava na rarama levu, ni sa sega ni mudu na Nona yalololomaO

⁸Na mata ni siga me lewa ena siga, ni sa sega ni mudu na Nona yalololoma;

⁹Na vula kei na kalokalo me lewa ena bogi, Ni sa sega ni mudu na Nona yalololoma.

¹⁰Vei Koya sa samuta na ulumatua mai Ijipita ni sa sega ni mudu na Nona yalololoma;

¹¹Sa qai kauti ira tani na Isireli mai kea, Ni sa sega ni mudu na Nona yalololoma;

¹²Ena Liga kaukauwa kei na Liga sa dodo yani, Ni sa sega ni mudu na Nona yalololoma;

¹³Vei Koya sa wasea rua na Wasawasa Damudamu, Ni sa sega ni mudu na Nona yalololoma;

¹⁴Era sa lako kina na Isireli ena vanua mamaca, Ni sa sega ni mudu na Nona yalololoma;

¹⁵Sa vuaviritaki Fero kei na nona mataivalu mai na Wasa Damudamu, ni sa sega ni mudu na Nona yalololoma;

¹⁶Vei Koya sa vakamalumalutaki ira na tui qaqa, Ni sa sega ni mudu na Nona yalololoma;

¹⁷Kivei koya sa vakadavori ira na tui lelevu, ni sa sega ni mudu na Nona yalololoma;

¹⁸Sa vakamatei ira na tui rogo, Ni sa sega ni mudu na Nona yalololomaO

¹⁹Sailo na tui ni Amorai, Ni sa sega ni mudu na Nona yalololoma;

²⁰O Oki na tui Pasani, Ni sa sega ni mudu na Nona yalololoma “

²¹Sa solia na nodra vanua mei votavota, Ni sa sega ni mudu na Nona yalololoma;

²²Nai votavota vei Isireli na Nona tamata, Ni sa sega ni mudu na Nona yalololoma.

²³Sa nanumi keda, ena noda vakaloloma tu, Ni sa sega ni mudu na Nona yalololoma;

²⁴Sa vakabulai keda mai vei ira na meca, Ni sa sega ni mudu na Nona yalololoma;

²⁵Sa solia na kakana ki vei ira kecega na bula, Ni sa sega ni mudu na Nona yalololoma.

²⁶Io, vakavinavinaka Vua na Kalou ni lomalagi! Ni sa sega ni mudu na Nona Yalololoma.