[19] Same 139

¹I Jiova o Ni sa dikevi au ka kilai au.

²O Ni sa kila na noqu tiko sobu kei na noqu tucake; o ni sa kila na lomaqu, ni sa yawa tiko.

³O Ni sa vakaraica vinaka na noqu i lakolako kei na noqu davo sobu, o Ni sa kila deivaki na noqu i valavala kecega.

⁴Sa sega ni dua na vosa ni yamequ, Jiova, o Ni sa sega ni kila, o Ni sa kila kecega.

⁵O Ni sa tiko e liu, o Ni sa tiko talega e dakuqu, sa tabaki au tikoga na ligamuni.

⁶Na vuku vaka o ya sa rui dua tani sara, sa rui cecere, au sa sega ni yacova rawa.

⁷Me'u lako tani vakacava mai na Yalomuni? Me'u dro tani vakacava mai na Matamuni?

⁸Kevaka, au sa lako cake ki lomalagi, o Ni sa tiko mai kina; Kevaka, au sa kauta sobu na noqui mocemoce ki Eli, o Ni sa tiko mai kina.

⁹Kevaka au sa vakatabana me vaka e dua na mataka ka me'u la'ki tiko vakayawa sara ena taba ni wasawasa ka dua,

¹⁰Mai kea, na Ligamuni ena liutaki au kei na Ligamuni i matau ena tauri au.

¹¹Kevaka, au sa tukuna, sa dina, na butobuto ena ubi au, na bogi sa na qai noqu rarama sara;

¹²Io, na butobuto ena sega ni vuni mai vei Kemuni, na bogi mada ga ena rarama me vaka na siga; na butobuto kei na rarama sa tautauvata vei Kemuni.

¹³O Ni sa buli au e loma ka ubi au ena loma ni ketei tinaqu.

¹⁴Au na vakavinavinaka vei Kemuni, ni'u sa buli vakavinaka ka vakamatau. Sa totoka na cakacaka ni Ligamuni Na yaloqu sa kila vinaka na ka o ya.

¹⁵Na kequ i bulibuli sa sega ni vuni vei Kemuni, Ni'u sa buli vakavuni tiko, ka buli tiko vakamatau mai na ruku i vuravura.

¹⁶Na Matamuni sa raica rawa tiko na veika au na buli mai kina, era sa volai kece ena Nomuni i Vola, me caka tiko veisiga, e dina ga ni ra se bera ni buli.

¹⁷Sa ka taleitaki talega vei au na Nomuni vakanananu, noqu Kalou! Sa sivia na kenai wiliwili kece!

¹⁸Kevaka me'u na wilika, ena levu cake ka lailai na mata ni nuku; Ni'u sa yadra mai, au sa tikoga kei Kemuni.

¹⁹E dina, ni o Ni na vakamatei ira na tamata ca, na Kalou! Dou lako tani vei au, oqo, oi kemudou na tamata sa dauvinakata na veivakamatei.

²⁰Ni ra sa vosataki Kemuni vakaca; o ira na Kemuni meca era sa vakawalena na Yacamuni.

²¹E sega li ni'u cati ira, I Jiova, o ira era cati Kemuni? Ia, e sega li ni'u vakasisilataki ira era sa tu cake me veivala kei Kemuni?

²²Au sa cati ira ena veicati e taucoko; Au wiliki ira me kequ meca.

²³Mo Ni vakadikevi au, na Kalou, ka kila na yaloqu; Mo Ni vakatovolei au, ka kila na noqu nuiqawaqawa;

²⁴Ka raica, se sa dua nai valavala e ca vei au, Ka tuberi au ena sala ni bula sega ni mudu.