[19] Same 147

¹Dou vakavinavinaka vei Jiova! Ni sa vinaka na sere vei Jiova, sa taleitaki ka rairai vinaka na vakavinavinaka.

²O Jiova a tarai Jerusalemi cake; o Koya talega sa vakasoqoni ira mai na Isireli era sa vakasavi.

³Sa vakabulai ira sa ramusu na yalodra ka vauca na nodra mavoa.

⁴Sa wilika na kalokalo kecega, ka kacivi ira ena yacadra.

⁵Sa levu o Jiova, sa levu na Nona kaukauwa Na Nona kila sa sega ni yalani.

⁶O Jiova sa laveti ira cake na yalomalumalumu; sa butuki ira ki na qele na tamata ca.

⁷Dou sere vei Jiova ena vakavinavinaka, seretaka na vakavinavinaka ena api vua na Kalou,

⁸O Koya sa ubia na lomalagi ena o, sa vakarautaka na uca ki na qele, sa vakatubura na co ki na veiulunivanua.

⁹Sa solia vei ira na manumanu na kedra, sa vakani ira talega na luve ni reveni ni ra tagi.

¹⁰Sa sega ni marautaka o koya na kaukauwa ni ose; se taleitaka na yava ni tamata.

¹¹Sa marautaka ga o Jiova, na tamata sa rerevaki Koya ka nuitaka tiko na Nona yalololoma.

¹²Dou vakavinavinaka vei Jiova, Jerusalemi! Vakavinavinaka vua na Kalou, Saioni!

¹³Sa vakaukauwataki na bai ni nomu matamata Sa vakalouvinakataki ira na gone sa tiko kina.

¹⁴Sa cakava na veivakasaututaki ena nomu i yalayala, ka vakasinaita ena kakana.

¹⁵Sa vakatala na Nona i vakaro ki vuravura, Na Nona vosa sa cici yani vakatotolo.

¹⁶Sa solia na uca vulavula me vaka na vuti ni sipi: Sa kaburaka na tegu me vaka na dravusa;

¹⁷Sa vakatauca na wai cevata me vaka na meme ni kakana: O cei sa na vosota rawa na Nona batabata?

¹⁸Sa tala na Nona vosa ka sa vakawaicalataki ira; sa vakaliwava na Nona cagi, sa drodro yani na wai.

¹⁹Sa tukuna na Nona vosa vei Jekope, na Nona i vunau kei na Nona lewa vei Isireli.

²⁰Sa sega ni cakava vakaoqo ki na dua tale na matanitu; era sa sega talega ni kila na Nona lewa. Me vakavinavinakataki o Jiova!