[19] Same 146

¹Dou vakavinavinakataki Jiova, Na yaloqu, mo vakavinavinaka vei Jiova!

²Au na vakavinavinaka vei Jiova, ni'u se bula tiko. Ena noqu bula taucoko au na vakavinavinaka vua na noqu Kalou.

³Kua ni vakararavi vei ira na luve ni tui, se ki vei ira na luve ni tamata, ni sa sega vei ira na veivuke.

⁴Na yalona ena lako tani vua, sa lesu tale o koya ki na qele; na siga vata ga o ya, sa oti vakadua na nona tuvatuva.

⁵Me marau o koya sa taura tiko na Kalou i Jekope me nonai vukevuke, o koya sa vakanuinui tiko vei Jiova na Kalou,

⁶O Koya sa bulia na lomalagi kei na vuravura, na wasawasa kei na ka kecega sa tu kina, o Koya sa maroroya na dina me sega ni mudu,

⁷O Koya sa lewa vakadodonu ena vukudra era sa vakasaurarataki: Sa vakani ira sa via kana.

⁸Sa vakamataraitaki ira na mataboko o Jiova: Sa vakadodonutaki ira na vakalairoro o Jiova: Sa lomani ira na yalododonu o Jiova.

⁹O Jiova, sa maroroi ira na vulagi, Sa vakabulai ira na luveniyali kei na yada: Ia, na nodra i valavala na tamata ca, sa vakatoboicutaki.

¹⁰Sa vakatulewa o Jiova me sega ni muduO Na Nomu Kalou i Saioni, ki nai tabatamata kecega. Mo vakavinavinaka vei Jiova!