[19] Same 145

¹Au na vakacaucautaki Kemuni na noqu Kalou, na noqu Tui; ena sega ni mudu na noqu vakavinavinaka ki na Yacamuni.

²Ena veisiga kece au na vakacaucautaki Kemuni, ena sega ni mudu na noqu vakavinavinakataki na Yacamuni.

³Sa levu o Jiova, e dodonu me vakavinavinakataki vakalevu; sa sega ni kilai rawa na kena levu.

⁴Era na seretaka na Nomuni cakacaka na i taba tamata sa veitaravi, ka tukuna na Nomuni kaukauwa.

⁵Au na tukuna tikoga na lagilagi ni Kemuni i rogorogo e Vakaturaga, kei na Kemuni i rogorogo e vakaqoroqoroi.

⁶Na tamata era na veitalanoataka na qaqa kei na totoka ni Nomuni cakacaka. Au na tukuna na Nomuni cecere.

⁷Era na tukuna tikoga na veika me nanumi kina na Nomuni loloma, ka seretaka na Nomuni daucaka dodonu.

⁸Sa dauloma soli o Jiova, sa dauberabera ni cudru, sa rui levu na Nona loloma.

⁹Sa yalovinaka o Jiova vei ira na tamata kecega; sa yacova na Nona cakacaka kecega na Nona yalololoma.

¹⁰Na Nomuni cakacaka kecega era na vakavinavinaka vei Kemuni, Jiova, o ira na Nomuni tamata era na vakacaucautaki Kemuni.

¹¹Era na tukuna na lagilagi ni Nomuni Matanitu, ka veivosakitaka na Nomuni kaukauwa,

¹²Ena vakatakilai vei ira na luve ni tamata na vinaka ni ka sa cakava o Koya kei na lagilagi ni Nona matanitu.

¹³Na Nomuni Matanitu e Matanitu sa sega ni mudu. Kei na Nomuni lewa sa tudei ke nai tabatamata kecega.

¹⁴O Jiova sa dau keveti ira sa malumalumu ka sa dauvakaturi ira cake na tamata sa vakacuvai sobu.

¹⁵Na mata kece sa nanamaki vei Kemuni, ka o Ni sa solia na kakana ena kena gauna donu ga.

¹⁶O Ni sa dedeka na Ligamuni, ka vakamaumautaka na gagadre ni ka bula kecega.

¹⁷Sa dodonu sara o Jiova ena Nona veika kecega. Sa vakayalovinakataka na cakacaka ni Ligana kecega.

¹⁸Sa voleka sara o Jiova vei ira sa dau masuti Koya; vei ira sa dau masuti Koya vakaidina.

¹⁹Ena sotava na nodra gagadre o ira sa rerevaki Koya; ena rogoca tale ga na nodra tagi ka vakacegui ira.

²⁰O Jiova sa daumaroroi ira sa lomani Koya, o ira na tamata ca, era na vakarusai.

²¹Na gusuqu ena tukuna na vinaka nei Jiova, me ra vakacaucautaki Koya na ka bula kecega, mai na gauna oqo ki na gauna kecega.