[19] Same 27

¹O Jiova na noqu rarama kei na noqu bula talega; o, cei me'u rerevaka? O Jiova sa kaukauwa ni noqu bula; o cei me'u taqayataka?

²Ni ra sa lako mai na tamata ca me veivala kei au, me ra kani au, o ira na kequ meca, era na tacaqe ka davo.

³Kevaka sa tuva i valu vei au e dua na mataivalu, na yaloqu ena sega, ni rere; kevaka sa ia mai na kaba vakaivalu me'u valuti kina, E na ka ga oqo au sa na nuidei kina.

⁴E dua ga na ka au sa gadreva vakalevu, o koya au na vakasaqara; me'u tiko ga ena Vale i Jiova, ena veisiga au sa bula kina, me'u vakasarava na Nona i ukuuku, ka me'u vakatataro tiko e na Nona Vale Tabu.

⁵E na gauna dredre, o Jiova ena vunitaki au ena Nona vale cecere; ena tikina vuni ni Nona vale, ena vunitaki au; ka vakatikori au ena uluvatu.

⁶Ia oqo sa laveti cake na uluqu me cecere cake vei ira na kequ meca era vakavolivoliti au; o koya au na vakacabora kina nai soro ni reki ena Nona Vale Tabu; Au na sere, io, au na seretaka na vakavinavinaka kivei Jiova.

⁷Mo Ni rogoca, Jiova, na tagi ni domoqu! Mo Ni lomani au mai, Ni rogoci au mai.

⁸O Ni sa tukuna, "Vakasaqara mai na Mataqu," sa tukuna yani na yaloqu, "Na Matamuni au na vakasaqara."

⁹Mo ni kakua ni vunitaki kemuni mai vei au; Mo Ni kua ni vuki tani ena cudru; o Ni sa dau vukei au tiko; mo Ni ka kua ni biuti au se laivi au' Na Kalou ni noqu vakabulai.

¹⁰Ni rau sa biuti au na tamaqu kei na tinaqu, o Jiova sa qai keveti au.

¹¹Jiova, ni vakavulica vei au na Nomuni sala, mo Ni tuberi au ena sala vinaka, ena vukudra ga na kequ meca.

¹²Ni kakua ni soli au ki na nodra veitalia na meca; ni sa tubu cake tikoga na veibeitaki vakailasu me baleti au. Ia sa vaka ni sa uvucaki mai nai valavala kaukauwa.

¹³E rawa ni yali vakadua na yaloqu, kevaka me'u a sega ni yalovinaka vei Jiova e na nodra vanua na bula.

¹⁴Waraki Jiova ga mo tamata qaqa, e na qai vakaukauwataka na yalomu, mo wawa, au sa tukuna!