[19] Same 31

¹Vei kemuni Jiova, au sa vakararavi kina; me'u kakua ni madua; mo ni vakabulai au ena nomuni yalododonu.

²Me kala mai na Daligamuni ki vei au, Ni sereki au vakatotolo; Na noqu Vatudei ni drodro, nai vakaruru e veitaqomaki me vakabulai au.

³Oi Kemuni na noqu vatudei kei na noqu i vakaruru, o koya oqo, ena vuku ni Yacamuni, mo ni liutaki au ka tuberi au.

⁴Me'u kau tani mai na lawa sa biu vuni tu me coriti au, ni sai Kemuni na noqu kaukauwa.

⁵Ki na Ligamuni, au sa vakacabora kina na yaloqu; o ni sa vakabulai au, I Jiova na Kalou dina.

⁶Au sa cati ira e ra sa guta na ka wale; ia oi au, sa vakararavi ga vei Jiova.

⁷Au na marau ka reki ena Nomuni yalololoma, ni Kemuni sa raica na noqu leqa; o ni sa kila na yaloqu ena gauna dredre,

⁸O ni sa sega talega ni sogoti au, ena ligadra na meca; o ni sa vakaturi au ena vanua galala.

⁹I Jiova, mo ni yalololoma mai ena gauna ni noqu leqa; sa mamaca mai na mataqu ena noqu rarawa, io na yaloqu kei na yagoqu talega!

¹⁰Sa levu na noqu rarawa, na veiyabaki ni vutugu; sa yali na noqu kaukauwa ena vuku ni ca.

¹¹Au sa rogorogo ca vei ira na kequ meca kecega, vakauasivi vei ira na noqu i tokani voleka, era sa dro o ira sa kilai au voleka, kei ira sa kilai mai taudaku.

¹²Au sa guilecavi me vaka na tamata mate sa sega ni kilai koya; au sa vaka na bilo sa kakavorovoro.

¹³Au sa rogoca na nodra veivakacacani; na rere sa tu ena veiyasana kecega, Ni ra sa daubose me baleti au, era sa tuvatuva me ra kauta tani na noqu bula.

¹⁴Ia, oi au, au sa vakararavi vei Kemuni Jiova, Au sa tukuna oti, "Oi Kemuni na noqu Kalou."

¹⁵Na noqu gauna, sa tiko kecega ena Ligamuni, mo Ni sereki au mai na ligadra na meca, mai vei ira sa via vesuki au.

¹⁶Na Matamuni me rai tiko yani vua na Nomuni tamata; me ra madua na ca; me ra galu vakadua e nai bulubulu.

¹⁷I Jiova, me'u kua ni madua; Ni'u sa kaci tiko yani vei Kemuni; me ra madua na ca; me ra galu vakadua ena i bulubulu.

¹⁸Me ra vagalui na gusu lasulasu, ni ra sa dau vosalevu, vosaviavialevu, vosa ni veivakalialia vei ira na yalododonu.

¹⁹Sa rui levu na Nomuni yalovinaka, o Ni sa dausolia vei ira sa rerevaki Kemuni, o Ni sa vakarautaka talega vei ira sa vakararavi vei Kemuni, ena matadra na luve ni tamata!

²⁰O Ni na vunitaki ira ena Nomuni tikina vuni ni Nomuni i tikotiko mai na nodra vere na tamata; o Ni na vunitaki ira e na Nomuni vale levu, mai na veivakacacani ni yame.

²¹Me vakacaucautaki o Jiova, ni sa vakatakila mai vei au na totoka ni nona yalovinaka mai na koro kaukauwa!

²²Au a tukuna vakatotolo, "Au sa tamusuki mai na Matamuni;" ia, o Ni sa rogoca na domo ni noqu kerekere, ni'u sa tagi tiko yani e Matamuni.

²³Io, mo ni lomani Jiova, oi kemuni kece na Nona tamata! Ni sa dau maroroi ira sa dinati koya o Jiova, sa dausaumi ira vakadodonu nai valavala dokadoka.

²⁴Mo ni yaloqaqa, ni na vakaukauwataka na yalomuni o koya, oi kemuni kece sa vakanuinui vei Jiova.