[19] Same 32

¹Sa kalouvinaka o koya sa vosoti na nona caka cala, ka sa ubi na nona i valavala ca.

²Sa kalouvinaka na tamata, sa sega ni wilika vua na Kalou na nona cakacaka ca, kei ko ya sa sega na ka sa beitaki kina ena yalona.

³Ni'u sa galu ga, sa qase mai na suiqu, ena vuku ni noqu vutugu tiko ena siga taucoko.

⁴E na siga kei na bogi sa rui bibi vei au na Ligamuni, sa mamaca mai na noqu gacagaca me vaka na mamaca ena gauna ni dausiga. Sela

⁵Au sa vakadinadinataka na noqui valavala ca vei Kemuni, Au sa sega ni vunitaka na noqu ca, Au sa tukuna, "Au na vakatusa na noqu talaidredre vei Jiova," Ka o ni sa vosota nai valavala e ca. Sela

⁶E na tikina oqo, o ira kece sa vaKalou na nodra bula, era na masu. E na gauna o ni sa kune kina; Io ena waluvu levu, era na sega ni lako voleka mai vua.

⁷Oi Kemuni na noqu i vunivuni. o Ni na veimaroroi mai na noqu leqa; o ni sa dauvoliti au ena sere ni veisereki. Sela

⁸Au na vakarota vei iko ka vakavulica vei iko ena sala mo ni lako kina; na yaloka ni Mataqu ena tuberi iko.

⁹Mo kua ni vakataka na ose se meule, e sega na ka era kila. Me vesuki na gusudra e nai vesu, era na qai sega ni lako tani mai vei iko.

¹⁰Na rarawa ena levu vei ira na tamata ca, ia na yalololoma ena vakavoliti koya sa vakararavi vei Jiova.

¹¹Oi kemudou na yalododonu, dou marau ka rekitaki Jiova, dou kaila ka reki, oi kemudou sa dodonu sara na yalomudou!