[19] Same 33

¹Dou rekitaki Jiova oi kemudou na yalododonu! Sa rui totoka na vakavinavinaka mai vua na yalododonu.

²Dou vakavinavinaka vei Jiova ena api, dou cakava na rorogo vei Koya ena i yaya ni vakatagi e tini na kena wa.

³Dou seretaka Vua na sere vou; qiria vakamatau na rorogo ni reki.

⁴Baleta na vosa i Jiova sa dodonu, na Nona cakacaka kecega sa caka ena dina.

⁵O Jiova sa lomana na dodonu kei na lewa; sa sinai o vuravura ena yalovinaka i Jiova.

⁶E na vosa i Jiova sa buli kina o lomalagi, kei ira kece ga sa tiko kina e nai cegu ni gusuna.

⁷Sa kumuna kecega na wai ni waitui me vaka na i kovukovu; sa biuta na titobu ena vale ni maroroi.

⁸Me rerevaki Jiova o vuravura kecega; me ra vakaqoroqoroi koya o vuravura taucoko.

⁹Baleta ni sa vosa o Koya sa yaco na ka kecega, sa vakarota o Koya sa tu na ka kecega.

¹⁰O Jiova sa vakatawayagataka na nodra i vakasala na veimatanitu; sa sega ni yaco na nodra i tuvatuva na tamata.

¹¹Nai vakasala i Jiova sa tudei ka sega ni mudu, nai tuvatuva ni Yalona, ki nai tabatamata kecega.

¹²Sa kalouvinaka na matanitu sa nodra Kalou o Jiova, kei ira sa digitaki Koya me nona i votavota.

¹³Sa rai mai lomalagi o Jiova ka raici ira na luve ni tamata.

¹⁴Mai na Nona i tikotiko, sa vakaraici ira kece na lewe i vuravura;

¹⁵Sa bulia vakamatua na yalodra yadudua, sa vakaraica vinaka na nodra cakacaka.

¹⁶Sa sega ni bula na tui ena levu ni nona mataivalu; se na tamata qaqa mai na nona kaukauwa.

¹⁷Sa ka wale na vakanuinui ki na ose me ra bula kina; se ki na kena kaukauwa me veivakabulai.

¹⁸Raica, na mata i Jiova sa tiko ga vei ira sa rerevaki Koya, vei ira sa vakanuinui tiko ki na Nona yalololoma,

¹⁹Me vakabulai na yalodra mai na mate, ka vakabulai ira tiko mai na dausiga.

²⁰Sa waraki Jiova tiko na yaloi keimami; o Koya na neimami i vukevuke kei na neimami i sasabai.

²¹Na yaloi keimami ena marautaki Jiova ni keimami sa vakararavi ki na Yacana Tabu.

²²I Jiova na Nomuni yalololoma me sa tiko ga kei keimami me vaka ni keimami vakanuinui tiko vei Kemuni.