[19] Same 34

¹Au na vakacaucautaki Jiova ena gauna kecega; na Nona vakavinavinaka ena tiko ga ena gusuqu.

²Na yaloqu sa boletaki Jiova; ni ra sa rogoca na yalomalumalu era na reki.

³Me daru mai seretaki Jiova, me daru mai laveta cake vata na yacana.

⁴Au a vakasaqarai Jiova, ka sa rogoci au o koya, ka vakabulai au mai na noqu rere kecega.

⁵Era sa rai tiko ga ki vua ka sigege tiko, ka sa sega ve ira na madua.

⁶Sa tagi na dravudravua, o Jiova sa rogoci koya ka sa vakabulai koya mai na nona leqa.

⁷Na agilosi i Jiova, sa dauvoliti ira sa rerevaki koya me vakabulai ira.

⁸Mai tovolea ka raica ni sa vinaka o Jiova, sa kalouvinaka o koya sa vakararavi vua!

⁹Dou rerevaki Jiova, oi kemudou na Nona tamata! Sa sega na ka e yali vei ira sa rerevaki koya.

¹⁰E na via kana na luve ni laioni; ia o ira sa vakasaqarai Jiova, ena sega ni yali vei ira e dua na ka vinaka.

¹¹Ragone, dou lako mai ka vakarorogo vei Au, Au na vakavulica vei kemudou na rerevaki Jiova.

¹²O cei na tamata sa via raica na bula kei na veigauna vinaka?

¹³Qarauna na yamemu mai na ca, kei na tebenigusumu mai na vosataka na ka lasu.

¹⁴Lako tani mai na ca, caka vinaka, vakasaqara na veivinakati ka ciciva sara.

¹⁵Na Mata i Jiova sa tiko vei ira na yalododonu, sa vakarorogo tu na Daligana ki na nodra tagi.

¹⁶Sa duatani na Mata i Jiova vei ira sa dau kitaka na ka ca, me musuka laivi kina na kedra i vakananumi e vuravura.

¹⁷Era na tagi na yalododnu, o Jiova e na rogoci ira, ka vakabulai ira sa dasila na yalodra.

¹⁸Sa voleka o Jiova vei ira sa ramusu na yalodra, sa vakabulai ira sa dasila na yalodra.

¹⁹Sa levu na nona vakararawataki na yalododonu, o Jiova sa vakabulai ira mai na dredre kece oqo.

²⁰Sa maroroya kece na suidra, ka sa sega e dua me ramusu.

²¹Na ca ena vakabalea na tamata ca, kei ira sa cati ira na yalododonu era na vakacacani.

²²O Jiova ena vakabula na yalodra na Nona tamata, sa sega ni dua e vakararavi vua me na vakacacani.