[19] Same 40

¹Sa golevi au mai o Jiova, ni'u sa waraki koya tiko; ka sa rogoca na noqu tagi.

²Sa kauti au cake mai o koya, mai na qara rerevaki, mai na qele lolobo, sa qai vakatucaketaki au ena dela ni vatu, qai vakadeitaka na noqu i kalawa.

³Sa biuta na sere vou ki na gusuqu, na vakavinavinaka ki vua na noda Kalou, e lewe levu era na raica ka rere, Au na vakararavi ga vei Jiova.

⁴Sa kalouvinaka na tamata sa vakararavi vei Jiova, sa sega ni dokai ira na dokadoka, se sa lesu tale ki na lasu.

⁵I Jiova na noqu Kalou; sa rui totoka ka levu na Nomuni cakacaka, o koya o ni sa cakava; kei na Nomuni vakanananu me baleti keimami, sa sega ni rawa ni tuvani yani. Kevaka ena tukuna se vosa kina, sa levu qai sega ni wili rawa; kevaka me'u na tukuna se vosa kina, sa rui levu ka sega ni wili rawa.

⁶Nai soro kei na i madrali, o ni sa sega ni vinakata; o ni sa dolava na daligaqu; nai soro kama kei na i soro ni valavala ca o Ni sa sega ni vakadonuya.

⁷Au sa qai tukuna, "Raica au sa lako mai; E nai Vola vivigi sa volai au.

⁸Au sa marautaka na cakava na Lomamuni, noqu Kalou, kei na Nomuni vunau sa tiko e lomaqu."

⁹Au sa vunautaka nai tukutuku vinaka vei ira na yalododonu, e nai soqosoqo levu, sa dina, au na sega ni vakagaluya na gusuqu; I Jiova, Oi Kemuni ga o ni sa kila.

¹⁰Au sa sega ni vunitaka na Nomuni yalododonu e lomaqu. Au sa vunautaka tiko na Nomuni yalodina kei na nomuni veivakabulai. Au sa sega ni via ubia na Nomuni Dina, mai vei ira nai soqosoqo levu.

¹¹Jiova, Mo ni kua ni tarova na Nomuni yalololoma dina mai vei au; Na Nomuni yalovinaka kei na Nomuni yalodina me maroroi au tikotiko ga.

¹²Sa vakavuqa na ca sa vakavolivoliti au; na noqu ca sa ulabaleti au, o koya, au sa sega kina ni rawa ni rai cake; era sa levu mai na drau ni uluqu; o koya oqo, au sa druka ena vuku ni yaloqu.

¹³Mo ni yalovinaka Jiova, ni sereki au, mo ni totolo ka vukei au!

¹⁴Me ra vakamaduataki, vakasesei, me ra vakasukai tale o ira sa via mai sagai au. Me ra vakasukasuka ka vakamaduataki, o ira kecega era sa vinakata me'u ca.

¹⁵Me ra sa vakamaduataki, o ira kecega sa tukuna mai vei au "Ue! Ue!"

¹⁶O ira kecega sa vakasaqarai Kemuni, me ra reki ka marautaki kemuni. O ira kecega sa taleitaka na Nomuni veivakabulai, me ra tukuna, tikoga, "Me vakacerecerei o Jiova!"

¹⁷Au sa dravudravua ka vakaloloma; oi kemuni na noqui vukevuke, oi kemuni na dauniveisereki mo ni kakua ni vakaberabera, na noqu Kalou.