[19] Same 46

¹Na Kalou sa noda i drodro kei na noda kaukauwa sa tu vakarau me vukei keda ena gauna ni leqa.

²O koya oqo eda na sega kina ni rere. Kevaka mada ga sa kautani o vuravura, se sa kautani yani na veiulunivanua ki na wasawasa titobu;

³Kevaka sa vadugu mai na wasawasa qai veivakarerei; kevaka sa yavala mai na ulunivanua. Sela

⁴Sa dua na uciwai, na kena so ni wai sa vakamarautaka na koro ni Kalou, na vanua Tabu nei Koya sa cecere sara.

⁵Sa tiko kina na Kalou, o koya oqo eda na sega kina ni yavalati, Na Kalou ena vukei keda ni se qai kabu vakayawa mai na mataka.

⁶E ra sa cudru mai na veimatanitu, era sa yavavala mai na veivanua; sa vosa yani o koya, era sa waicala.

⁷Sa tiko vata kei keda o Jiova ni lewevuqa; Na Kalou i Jekope sa noda i drodro. Sela

⁸Dou mai raica na cakacaka i Jiova, o koya sa vakacacana na vuravura.

⁹Sa vakatuvakaduataka nai valu e vuravura, sa musuka na veqa ni dakai titi, sa musuka rua na kena moto; ka sa vakama nai sema ni qiqi ni valu.

¹⁰Dou tu vakadua, mo dou kila ni sai Au na Kalou; Au na vakacerecerei e vuravura taucoko ena kedra maliwa na veimatanitu!

¹¹Sa tiko vata kei keda o Jiova ni lewevuqa, na Kalou i Jekope sa noda i drodro. Sela.