[19] Same 69

¹Me'u bula, na Kalou! Sa yaco na wai e domoqu.

²Au sa luvu tu oqo ena lolobo, e sega ni tu rawa na yavaqu, Au sa tu oqo ena wai titobu, sa vakaluvuci au na waluvu levu.

³Au sa oca ena tagi; sa mamaca na noqui tilotilo, sa malumu mai na mataqu ena noqu waraka tiko na Kalou.

⁴O ira sa cati au ni sa sega na ka e vakavuna, era na sivia nai wiliwili ni drau ni uluqu; Era sa kaukauwa ka rawa ni vakarusai au. Ni ra sa kequ meca vakacalai; E dina ni sega na ka au butakoca, e dodonu ga me'u sauma.

⁵O ni sa kila na noqu lialia, na Kalou; sa sega ni vunitaki na noqu lialia mai vei Kemuni.

⁶Me ra kakua ni madua o ira sa dau waraki kemuni na Kalou o Jiova, ena vukuqu. O ira sa waraki kemuni, me kua ni dua e vakalesui ena vukuqu, na Kalou ni Isireli.

⁷Io, ena vukumuni au sa dau beitaki kina, na noqu madua sa ubia na mataqu.

⁸Au sa vulagi vei iratou na taciqu, ka kai tani vei ira na luvei tinaqu;

⁹Na lomakatakata ni Nomuni vale sa kani au, kei na veibeitaki me baleti Kemuni, sa tau vei au.

¹⁰Ni sa vakawai na mataqu, ka'u sa via totogitaki au ena lolo, sa vakavuna tale na noqu beitaki.

¹¹Au sa vakaisulu taga talega, Au sa vu ni nodra veitalanoa tale; Au sa ka ni veitalanoa vei ira.

¹²O ira sa tiko ena matamata ni koro, era sa vosa vakacataki au, Au sa nodra qaqa ni sere na daumateni.

¹³Io, vei au, oi Kemuni ga, au sa masu kina, I Jiova ena gauna ni veiciqomi; na Kalou, ena levu ni Nomuni yalololoma, Mo ni rogoci au vakaidina ena Nomuni veivakabulai.

¹⁴Me'u kau tani mai na lolobo, me'u kua talega ni luvu, me'u sa sereki mai vei ira sa cati au, io, mai na wai titobu talega.

¹⁵Me kua ni luvuci au na waluvu, me kua talega ni tilomi au na titobu; me kua talega ni buluti au na qara titobu.

¹⁶Mo Ni rogoci au Jiova, ni sa rui vinaka na Nomuni yalovinaka. Mo ni golevi au mai me vaka na vakavuqa ni Nomuni yalololoma.

¹⁷Mo Ni kakua ni vunitaka na matamuni mai vua na Nomuni tamata, Au sa leqa tu oqo; me vakatotolo na Nomuni rogoci au.

¹⁸Mo Ni volekata mai na yaloqu, ka volia lesu tale; Me'u vakabulai, baleti ira na meca.

¹⁹O Ni sa kila na noqu beitaki, na noqu madua kei na noqu beci; o ira kece na kequ meca, era sa tu e Matamuni.

²⁰Na veibeitaki, sa voroka na yaloqu, au sa vakabibitaki; au a qara e dua me lomani au, ia, sa sega ga; o ira talega na dauveivakacegui, io, sa sega ga.

²¹Era sa solia na ka gaga me kequ kakana. Era vakacegui au ena wai wiwi.

²²Na nodra teveli ni kana me kedra dai, kei na nodra tiko vinaka me kedra i cori.

²³Me ra mataboko ka sega ni rai rawa. Na vure ni ketedra, me sa ninini tu ga.

²⁴Mo Ni sova yani na Nomuni cudru vei ira, Na Nomuni cudru katakata me vesuki ira.

²⁵Me sa vakacacani sara na nodra i tikotiko; me kua ni dua e tiko ena nodra vale laca.

²⁶Era sa beitaki Koya o Ni sa kuitataka, ka ra veitalanoataka na nona rarawa o Koya ni sa vakamavoataka.

²⁷Mo Ni vakaikuritaka na ca ki na nodra ca, me ra kakua ni lako mai ki na Nomuni yalododonu.

²⁸Me ra boko laivi mai nai vola ni bula, ka me ra kua sara ga ni volai vata kei ira sa yalododonu.

²⁹Ia, oi, au sa dravudravua ka rarawa vakalevu sara; Na Kalou, me laveti au cake sara na Nomuni veivakabulai.

³⁰Au na laveta na yaca ni Kalou ena sere, au na vakadokadokataki Koya ena vakavinavinaka.

³¹Oqo ena vakalomavinakataka na Kalou, me vinaka cake mai na bulumakau se bulumakau kila, o koya sa vakaileu ka vaka i vava.

³²O ira na yalomalumalu, era na raica ka marau; kei kemuni sa vakasaqara na Kalou, ena bula na yalomuni.

³³Ni sa rogoci ira na dravudravua o Jiova, ka sega ni guilecavi ira na vesu tu.

³⁴Me vakacerecerei Kemuni o Lomalagi kei vuravura, Na wasawasa kei na ka kecega sa tu kina.

³⁵Na Kalou ena vakabulai Saioni, Ena tara tale na vei koro e Juta, me ra tiko kina ka taukena.

³⁶O ira talega na kawa nei koya na Nona tamata era na taukena, o ira talega sa lomana na Yacana, era na tiko kina.