[19] Same 7

¹Jiova na noqu Kalou, vei kemuni au sa vakararavi kina; Ni vakabulai au mai vei ira kecega na via veilewaitaki au; ka mo ni vakagalalataki au,

²De ra basuraki au me vaka sa daucakava na laioni vakamatailalai sara, io sa sega e dua sa vakagalalataki au.

³Jiova na noqu Kalou, kevaka au sa vakayacora na ka oqo, kevaka sa tu e ligaqu na ca oqo,

⁴Kevaka, au sa sauma na ca vei koya sa caka vinaka vei au, se vakalolomataka na tamata ni sa sega na vuna,

⁵Laivi ira na meca me ra toboki au, ka siviti au; io, me butuki au sobu ki na qele, kei na noqu dokai ki na kuvu ni soso.

⁶Ni tucake ena Nomuni cudru Jiova? O Ni sa cecere, ka levu ena vukudra na meca; mo Ni yadravi au tiko ena vuku ni lewa o ni sa vakatauca!

⁷O ira nai soqosoqo levu ni tamata, era sa vakavolivoliti kemuni; ena vukudra, mo ni lesu talke ki na nomuni tikotiko vakaturaga.

⁸O Jiova ena lewai ira na tamata, mo Ni lewai au mai Jiova, me vaka na Nomuni yalododonu, me vaka na dina sa tu vei au.

⁹O Jiova ena lewai ira na tamata ca, me vakadeitaki na dodonu, ni sa vakatovolea na yalo kei na vakanananu kecega ni tamata na Kalou dodonu.

¹⁰Na noqu taqomaki, sa mai vua na Kalou, sa vakabulai koya sa dodonu sara ena Yalona.

¹¹Na Kalou, sa Turaganilewa dodonu, ka sa daucudruvi ira nai valavala ca e veisiga.

¹²Kevaka sa sega ni lesu tale mai o Koya, Na Kalou ena vakagata na Nona i sele; Na Kalou ena vakarautaka na Nona dakai.

¹³Ena vakarautaka talega na i yaragi ni veivakamatei; ena cakava talega na Nona gasau me kama voli.

¹⁴Raica, sa yavala na tamata ca ena ca, sa kunekunetaka na leqa, ka sa vakasucuma na lasulasu.

¹⁵Sa kelia e dua na qara, sa kelia tiko ga, sa lutu ga kina o koya.

¹⁶Sa lesuvi koya tale na nona leqa, kei na nona i valavala kaukauwa ena lutuka tale na uluna.

¹⁷Au na vakavinavinaka vua na Kalou, ena vuku ni Nona yalododonu, au na seretaka na vakavinavinaka ki na yaca i Jiova, sa cecere sara.