[19] Same 88

¹I Jiova na Kalou ni noqu vakabulai, Au sa dautagi vei Kemuni ena siga kei na bogi.

²Me lako mai Matamuni na noqu masu; Me gole mai na Daligamuni ki na noqu tagi.

³Sa sinai na yaloqu ena leqa, ka sa voleka tikoga na noqu bula ki nai bulubulu.

⁴Au sa wili vata kei ira sa lako sobu ki na qara; au sa vaka na tamata sa sega vua na kaukauwa,

⁵Au sa ciri vata tiko kei ira na mate, me vaka taki ira sa vakamatei ka tu mai nai bulubulu, o koya era sa sega ni nanumi tale, o ira sa kau tani mai na Ligamuni.

⁶O Ni sa vakadavori au ena qara lolovira sara, ena butobuto, ena titobu talega.

⁷Na Nomuni cudru katakata sa tarai au vakabibi, o Ni sa vakamavoataki au ena Nomuni ka kecega. Sela.

⁸O Ni sa biuta tani sara na noqu kila, vakayawa sara mai vei au; O Ni sa vakayacora me'u ca sara vei ira; Au sa sogota ka sega ni rawa na dro.

⁹Na mataqu sa malumu sobu ga, baleta na veivakararamataki i Jiova, au sa kaci tiko yani ena veisiga; sa dodo tiko yani na ligaqu vei Kemuni.

¹⁰O Ni na cakava beka na ka vovou vei ira na mate? Era na tucake beka na mate ka vakacaucautaki Kemuni? “ Sela.

¹¹Na Nomuni yalololoma vinaka sara, ena rawa beka ni tukuni tikoga ena i bulubulu? Se na Nomuni yalodina ena vanua ni veivakarusai?

¹²Ena kilai beka na veika vovou o Ni kilai kina ena vanua butobuto? Kei na Nomuni yalododonu ena vanua sa sega ni nanumi kina e dua na ka?

¹³Io, ki vei Kemuni, au sa kaci yani kina Jiova, kei na veimataka, sa daulako yani vei Kemuni na noqu masu.

¹⁴I Jiova, o Ni sa biuti au, ena vuku ni cava? Ena cava o Ni sa vunitaki au kina?

¹⁵Au sa vakararawataki; ka tu vakarau me'u mate mai na noqu cauravou; Au sa sotava na veika dredre Au sa vakalialiai.

¹⁶Na Nomuni cudru katakata sa ubi au mai, kei na nomuni gaunisala dredre sa sogoti au.

¹⁷E ra sa lakovi au mai me vaka na wai ena siga taucoko, era sa kani au kece.

¹⁸O Ni sa biuti ira tani mai vei au na noqu i tokani kei ira na noqu daulomani, na noqu kila na butobuto.