[19] Same 89

¹Au na seretaka na yalololoma i Jiova me sega ni mudu; E na gusuqu, au na vakaraitaka na Nomuni yalodina ki nai tabatamata kecega.

²Me vaka au sa tukuna oti, "Ena tarai cake na yalololoma me sega ni mudu; na Nomuni yalodina o Ni na vakadeitaka ena veiyasana vakalomalagi."

³"Au sa cakava na veiyalayalati kei ira na Noqu digitaki, Au sa yalataka vei Tevita na Noqu tamata:

⁴'Na vuamu, Au na vakataudeitaka me sega ni mudu, na nomu i tikotiko vakaturaga me na yacova nai tabatamata kecega. Sela.'"

⁵Na lomalagi ena vakacaucautaka na Nomuni totoka, I Jiova; na Nomuni dau dina talega, ena kedra maliwa nai soqosoqo ni Nomuni digitaki.

⁶O cei sa tiko mai lomalagi me vakatautauvatataki vei Jiova? Se, o cei vei ira na luve ni qaqa, e rau sa tautauvata kei Jiova?

⁷Na Kalou me rerevaki vakalevu sara e nai soqosoqo ni Nona digitaki, ka me vakarokorokotaki vei ira sa tiko vakavolekati koya.

⁸I Jiova na Kalou ni lewevuqa, o cei sa qaqa me vakataki Kemuni, i Jiova? Sa vakavolivoliti Kemuni na Nomuni yalodina.

⁹O Ni sa lewa na wasawasa cudrucudru, ni sa tubu mai na kena biau, oi Kemuni ga sa vakamaravutaka.

¹⁰O Ni sa vorolaki Reapi sara vakalalai, me vaka e dua sa vakamatei; o Ni sa vakasesei ira na Kemuni meca ena Ligamuni kaukauwa.

¹¹Sa Nomuni o lomalagi, o vuravura talega sa Nomuni, o vuravura kei na ka kecega sa tu kina o Ni sa tauyavutaka.

¹²Na vualiku kei na Ceva o Ni sa tauyavutaka; o Tepori kei Erimoni, e rau sa rekitaka na Yacamuni.

¹³Sa tiko vei Kemuni na Liga sa kaukauwa sara, Sa rui kaukauwa na Ligamuni, Sa rui cecere na Ligamuni i matau.

¹⁴Na dodonu kei na lewa donu sai koya na yavu ni Nomuni i tikotiko vakaturaga; Na yalololoma kei na dina sa lako voli e Matamuni.

¹⁵Sa kalouvinaka o ira na tamata era sa kila na rorogo vinaka oqo! I Jiova, era sa lako voli ena rarama kei na i serau ni Matamuni.

¹⁶Na Yacamuni, era na rekitaka ena siga taucoko kei na Nomuni yalododonu, era sa laveti cake kina.

¹⁷Ni sai Kemuni nai ukuuku ni nodra kaukauwa kei na Nomuni veitokoni, sa laveti cake kina na neimami kaukauwa.

¹⁸Sa Nona na Kalou na neimami sasabai, na neimami Tui na ka Tabu ni Isireli.

¹⁹O Ni sa vosa ena raivotu vei koya na Nomuni ka Tabu ka tukuna, "Au a vukei koya sa kaukauwa sara; au sa vakacerecereya e dua sa digitaki mai vei ira na tamata.

²⁰Au sa kunea na Noqu tamata o Tevita; ena Noqu waiwai tabu, Au sa lumuti koya kina,

²¹Vei koya, ena vakadeitaka na Ligaqu; Na Ligaqu talega ena vakaukauwataki koya.

²²E na sega ni rawa ni qaqa vua na meca, se, me ra vakamavoataki koya rawa na meca.

²³Au na vakadavori ira kece na kena meca e matana, ka vakatu vakaduataki ira sa cati o ya.

²⁴"Na Noqu dau dina kei na Noqu yalololoma ena tiko vata kei koya, ia, ena Yacaqu ena laveti kina na nona kaukauwa.

²⁵Au na dodoka na ligana ki na wasawasa, na ligana i matau ki na veiuciwai.

²⁶Ena tagi mai vei au o koya, 'Oi Kemuni na Tamaqu, na noqu Kalou, kei na vatudei ni noqu vakabulai.'

²⁷Au na vakayacori koya na Noqu ulumatua, me cecere duadua vei ira na tui e vuravura.

²⁸Na Noqu yalololoma, Au na maroroya vua me kua ni mudu, na Noqu veiyalayalati sa tudei tikoga vei Koya.

²⁹Na Nona kawa ena tudei tikoga me sega ni mudu, kei na Nona i tikotiko vakaturaga me vaka na veisiga vakalomalagi.

³⁰"Kevaka era sa besetaka na luvena na Noqu i vunau ka ra sa sega ni muria na noqu lewa,

³¹Kevaka era sa voroka na Noqu i lesilesi ka sega ni maroroya na Noqu i vunau,

³²Io, Au na totogitaka na nodra talaidredre ena kuita, kei na nodra caka cala e nai wau.

³³Sa dina sara na Noqu yalovinaka, Au na sega sara ni kauta tani mai vua, se vakatara na Noqu yalodina me yali vua.

³⁴Au na sega ni voroka na Noqu veiyalayalati se veisautaka na vosa sa lako oti mai na Gusuqu.

³⁵Na ka Au sa yalayala oti kina ena Noqu savasava e tabu sara; Au na sega ni lasu vei Tevita.

³⁶Na nona kawa ena tudei ka sega ni mudu, Na nona i tikotiko vakaturaga, ena vaka na matanisiga e Mataqu;

³⁷E na vakataudeitaki me sega ni mudu me vaka na vula, ia me vaka nai vakadinadina daudina ni lomalagi." Sela

³⁸Ia, o ni sa biuti au ka sega ni taleitaki au, o Ni sa cudruva na Nomuni lumuti.

³⁹O Ni sa cata na veiyalayalati kei koya na Nomuni tamata; o Ni sa vakawaletaka na nona i sala vaka Tui, ena Nomuni viritaka ki na qele.

⁴⁰O Ni sa basuka kece na nona bai kei na nona bai vakaivalu kaukauwa o Ni sa vakacacana kece.

⁴¹O ira kece sa lako sivia, e ra sa butakoci koya, e sa ka ni veiwali o koya vei ira na kai nona.

⁴²O Ni sa laveta cake na ligadra i matau na kena meca; o Ni sa vakamarautaki ira na meca.

⁴³O Ni sa vukica lesu na nona i seleiwau ka sega ni vukei koya e nai valu.

⁴⁴O Ni sa vakaotia na nona lagilagi, na nona i sala vakatui, o Ni sa viritaka ki na qele.

⁴⁵O Ni sa vakalekalekataka na nona yabaki vakacauravou; o Ni sa ubi koya ena madua. Sela.

⁴⁶Me cava soti na kena dede, Jiova? Mo Ni vunitaki Kemuni tiko me sega ni mudu? Me kama tiko li, vakabukawaqa na Nomuni cudru?

⁴⁷O Ni sa kila, sa lekaleka na noqu bula, sa ka wale beka na nodra bula na luve ni tamata?

⁴⁸Na tamata cava e rawa ni bula me sega ni raica na mate? E rawa beka vua me drotaka na kaukauwa ni bulubulu? Sela.

⁴⁹I Jiova, sa E vei na Nomuni yalovinaka sa dau tu e liu? O koya o Ni yalataka vei Tevita ena Nomuni yalodina?

⁵⁰Mo Ni nanuma Jiova, na nodra sa beitaki vakaca na Nomuni tamata O ena noqu vosota na kena mosi na nodra veivakacacani o ira na tamata kece oqo,

⁵¹O koya era sa veibeitaki vakaca tiko kina na kemuni meca, i Jiova, ka ra sa vakacacana na kalawa ni nomuni lumuti e duabau ga.

⁵²Me vakacaucautaki na Turaga o Jiova me sega ni mudu! Emeni. Emeni.