[19] Same 90

¹I Jiova, o Ni sa neimami tikotiko ena i tabatamata kecega.

²Ni se bera ni toso mai na veiulunivanua Ni se bera ni buli na vuravura Mai na Sega ni mudu ki na sega ni mudu, O Ni sa bula, o Ni sa Kalou.

³O Ni sa vakarusa na tamata, ka tukuna, "Lesu mai oi kemudou na luve ni tamata."

⁴Na dua na udolu na yabaki e Matamuni, sa vaka ga ena noa ni sa oti yani, sa vaka ga na yadra ena dua na tiki ni bogi.

⁵O Ni sa kauti ira yani me vaka e dua na ualuvu; era sa vaka ga e dua sa moce, ena mataka era sa vaka na co sa tubu cake:

⁶Ena mataka sa bulabula ka tubu cake; ena yakavi sa lauta ka malai.

⁷Sa kani keimami na Nomuni yalo katakata Ena Nomuni cudru katakata keimami sa rere vakalevu.

⁸Na neimami caka cala sa tu e Matamuni. Na neimami valavala ca se vuni tu sa tu ena rarama ni Matamuni.

⁹Na neimami veisiga kece sa lako yani ena Nomuni cudru; Keimami sa vakayalia na neimami veiyabaki me vaka ga e dua na tadra.

¹⁰Na veisiga ni neimami bula, sa vitusagavulu ga na yabaki; Sa ka ga ni kaukauwa kevaka sa walusagavulu na yabaki, io, na nodra dokadokataka sa basika ga kina na oca kei na rarawa; vakasauri sa oti yani, eda sa yali yani.

¹¹O cei sa kila na kaukauwa ni Nomuni cudru? Me vaka na rere vei Kemuni Sa vaka kina na Nomuni cudru.

¹²Mo Ni vakavulici veikeimami ena wilika na neimami veisiga, me tubu kina na neimami yalomatua.

¹³Mo Ni lesu mai Jiova! E sa cava soti na kena dede? Mo Ni lomani ira mai na Nomuni tamata.

¹⁴Io, mo Ni vakacegui keimami vakatotolo ena Nomuni yalololoma, me keimami reki kina ka marau ena veisiga kece!

¹⁵Mo Ni vakamarautaki keimami me vaka na levu ni siga keimami vakararawataki tiko kina, me vaka na veiyabaki keimami raica tiko kina na ca.

¹⁶Me basika mai na Nomuni cakacaka vei ira na Nomuni tamata, kei na Nomuni lagilagi vei ira na luvedra.

¹⁷Na totoka kei nai taucoko ni Kalou me sa tu vei keda, me vakataucokotaka na cakacaka ni ligada vei keda; Io, me vakataucokotaki na cakacaka ni ligada.