[19] Same 91

¹O koya sa tiko ena yasana vuni nei Koya sa Cecere sara, ena vakarurugi tikoga ena yaloyalo i Koya sa Kaukauwa.

²Au sa tukuna ena vuku i Jiova, "Na noqu i Drodro kei na noqu Bai ni valu; na noqu Kalou, sai Koya ga au sa vakadinata."

³Sa dina, ena vakabulai iko mai na nodra vere kece na dauveiveretaki kei na veitauvi ni mate ca kecega.

⁴Ena vakarurugi iko ena Tabana, ena nomu i drodro na ruku ni Tabana; na Nona Dina, ena nomu i Sasabai.

⁵O na sega ni rerevaka na ka dauveivakarerei ena bogi, se na gasau sa vuka voli ena siga,

⁶Se na mate ca sa lako voli ena butobuto, Se na veivakarusai sa toka vuni ena sigalevu.

⁷E udolu era na bale e yasamu, ka tini na udolu ena ligamu i matau. Ena sega e dua me na torovi iko mai.

⁸Ena matamu dina ga, o na raica nai sau ni nodra i valavala na tamata ca.

⁹Baleta ni o sa vakatara me nomu i Drodro o Jiova kei Koya sa cecere sara me nomuni tikotiko,

¹⁰Ena sega i tarai iko na ca se dua na mate ca me torova mai na nomu i tikotiko;

¹¹Ni na soli ira na Nona agilosi me ra lewa ena vukumu, ka maroroi iko ena gauna kecega.

¹²Era na keveti iko cake ena ligadra, De qai mavoa na yavamu ena vatu.

¹³O na butuki ira na laioni kei gata, o ira na luve ni laioni kei na gata, o na butu qaqia.

¹⁴"Baleta ni sa vagolea mai vei Au na nona loloma, o koya oqo, Au na vakabulai koya ka vakacerecerei koya, ni sa Kila na Yacaqu.

¹⁵Ena qai kaci mai, Au, na qai rogo yani vei koya; Au na laki tiko vata kei koya ena gauna ni leqa, Me'u vakabulai koya ka dokai koya.

¹⁶Au na sotavi koya ena bula balavu, ka vakaraitaka vua na Noqu veivakabulai."