[19] Same 9

¹Au na vakavinavinakataki Kemuni Jiova ena yaloqu taucoko ka na tukuna kecega na veivakakurabuitaki ni ka o Ni dau cakava.

²Au na marau ka reki tikoga vei kemuni, au na seretaka na vakavinavinaka ki na yacamuni, na Kalou cecere.

³Ni ra sa lesu tale mai na kequ meca, era sa na lutu ka rusa e Matamuni.

⁴O Ni sa maroroya tiko na noqu dodonu kei na noqu i tosotoso, o Ni sa dabe tiko e na i tikotiko vakaturaga, ka lewa vakadodonu tiko.

⁵O Ni sa cudruva na veimatanitu. O Ni sa vakarusa na tamata ca, O Ni sa bokoca na yacadra, me sega ni mudu.

⁶Oi kemudou na meca, sa oti tu na nomudou vakarusai, me sega ni mudu! Dou sa vakacacana na veikoro kei na kedra i vakananumi sa yali.

⁷Na Kalou o Jiova, sa tudei ka sega ni mudu, sa vakarautaka na Nona i tikotiko vakaturaga me ia kina na veilewai.

⁸E na lewai vuravura ena dodonu, ka na vakatauca na Nona lewa vei ira sa dodonu sara.

⁹Ai drodro o Jiova vei ira sa vakararawataki, ai drodro talega vei ira sa vakacacani.

¹⁰Kei ira talega, era sa kila na Yacamuni ka vakararavi vei Kemuni; ni sa i kemuni Jiova sa sega ni guilecavi ira sa vakasaqarai Kemuni.

¹¹Dou lagasere ka vakacecerei Jiova, sa tiko mai Saioni! Dou tukuna na Nona cakacaka vinaka vei ira na tamata.

¹²Sa sega ni guilecava na nodra tagi na malumalumu sa nanuma ka sauma vakadodonu na vakadave dra.

¹³I Jiova mo Ni yalololoma mai! O Ni sa kila na nodra vakaleqai o ira sa cati au o Ni sa keveti au cake mai na matamata ni mate,

¹⁴Me'u na tukuna ga kina na vakavinavinaka vei Kemuni, e na matadra na goneyalewa ni Saioni. Au na rekitaka na Nomuni veivakabulai levu.

¹⁵Na veimatanitu, era sa lutu ga kina qara era sa kelia; sa coriti na yavadra, e na dai ga era sa biuta vakavuni tu.

¹⁶Sa kilai o Jiova, ena lewa sa vakadavora; na tamata ca ena vesuki ga ena kena i cori. Sela

¹⁷Era na vakagolei kece ki Eli na tamata ca kei na veimatanitu sa guilecava na Kalou.

¹⁸E ra na sega ni guilecavi tiko ga na vakaloloma kei na nodra nanamaki na dravudravua ena oti mai.

¹⁹Ni tucake mai Jiova, me kua ni vakayaco lomana na tamata; me ra lewai talega na veimatanitu e Matamuni.

²⁰I Jiova, me ra vakadatuvutaki: me ra kila na lewe ni veimatanitu, ni ra sa ka wale ga. Sela