[19] Same 10

¹I Jiova o Ni sa tu vakayawa ena vuku ni cava? O Ni sa tu vakavuni ena gauna ni dredre ena vuku ni cava?

²E na nona dokadoka na tamata ca, sa vakalolomataki kina na dravudravua; me vesuki ira ga na nodra dauveivakalolomataki era sa dau kitaka.

³Sa dau dokadokataka na gagadre ni yalona na tamata ca, sa dau vosavinakataka na kocokoco, ia sa beca na Kalou.

⁴Na tamata ca, na dokadoka ni kena i rairai sa sega ni vakasaqara kina na Kalou; sa sega na Kalou ena nona vakanananu kecega.

⁵Na veivakararawataki sa nona i valavala ena veisiga kecega, na Nomuni lewa Jiova sa yawa sivita cake na ka sa raica na matana; me vaka vei ira na kena meca, sa vakalialiai ira o koya.

⁶Sa tukuna ki na lomana, "Au na sega sara ni vakayavalati; au na sega ni vakamavoataki."

⁷Na gusuna sa sinai ena vosa ni cudru, na veivakaisini kei na veitabaki sobu; na yamena sa sinai ena ruru kei na veivakacacani.

⁸Sa dabe vakavuni toka ena veikoro; sa labati ira vuni na sega cala; sa coba vuni toka na matana vei ira na dau rawai vakarawarawa.

⁹Sa wawa tiko vakavuni, me vaka na laioni ena nona qara; sa wawa tiko me toboka na dravudravua ni sa vakayarayarataki koya ki na nona dai.

¹⁰Sa qasi o koya, ka tiko sobu, me vesuki koya sa malumalu, mai na nona kaukauwa.

¹¹Sa tukuna e lomana, "Na Kalou sa guilecava; sa vunitaki koya; ena sega ni raica rawa."

¹²Mo ni tucake Jiova! Na Kalou ni laveta cake na ligamuni, kua ni guilecavi ira na malumalumu.

¹³E na cava era sa bese kina ni qarava na Kalou o ira na tamata ca? Ka tukuna e lomana, "Sa sega na kena yaga."

¹⁴Ia, Oi Kemuni o Ni sa raica oti na leqa kei na rarawa kecega, na ligamuni ena sauma kecega oqo. Sa vakararavi vei Kemuni o ira na malumalumu; o ni sa dauvukei ira na luveniyali.

¹⁵Me raramusumusu na ligadra na tamata ca kai tovo ca; me kilai vakayadudua sara na nodra i valavala e ca, me oti sara.

¹⁶O Jiova, sa Tui ka Sega ni mudu; na veimatanitu sa rusa ena Nona vanua.

¹⁷I Jiova o Ni sa rogoca na nodra gagadre na yalomalumalumu; o Ni sa vakarautaka na yalodra; o Ni na rogoca vakaidina,

¹⁸Mo Ni lewa vakadodonu vei ira na luveniyali kei na vakalolovirataki, me ra kila na tamata kecega e vuravura ni tabu na veivakalolovirataki.